∙ കോൺ‌ഗ്രസിനെ ചാരി ന്യൂനപക്ഷങ്ങളെ ആശയക്കുഴപ്പത്തിലാക്കൽ

ഏക വ്യക്തിനിയമത്തെക്കുറിച്ചു പ്രധാനമന്ത്രി നരേന്ദ്ര മോദി സംസാരിച്ചു മണിക്കൂറുകൾക്കുള്ളിൽ തന്നെ അതിനെ കോൺഗ്രസ് നിരാകരിച്ചിരുന്നു. നിയമനിർമാണം മുസ്‌ലിങ്ങൾക്കു മാത്രമല്ല, ആദിവാസികൾ ഉൾപ്പെടെയുള്ള ഹിന്ദു സമൂഹത്തിനും തിരിച്ചടിയാകുമെന്നു പ്രഖ്യാപിച്ച കോൺഗ്രസ്, വിശാലാർഥത്തിൽ എല്ലാ വിഭാഗങ്ങളുടെയും വക്കാലത്തുമായാണു രംഗത്തു വന്നത്. നിയമനിർമാണം ഹിന്ദു–മുസ്‌ലിം വിഷയമാക്കി മാറ്റാനുള്ള ബിജെപിയുടെ നീക്കം അപകടകരമാണെന്നും അവർ പ്രഖ്യാപിച്ചു. കോൺഗ്രസിൽ ഏതു കാര്യം ചർച്ച ചെയ്താലും വ്യത്യസ്ത അഭിപ്രായങ്ങൾ ഉണ്ടാകാറുണ്ട്. അതുപോലെ ഏതാനും ചിലർ ഏക വ്യക്തിനിയമം വരട്ടെ എന്ന സമീപനമാണു സ്വീകരിച്ചത്. ഉൾപ്പാർട്ടി ജനാധിപത്യമെന്ന ചെല്ലപ്പേരു കൊടുത്ത് കോൺഗ്രസ് അതിനെ വിശേഷിപ്പിച്ചെങ്കിലും മറ്റു രാഷ്ട്രീയ പാർട്ടികൾ അംഗീകരിച്ചില്ല. കോൺഗ്രസിനുള്ളിലും രണ്ടു ചേരി ഉണ്ടെന്ന് അവർ പ്രചരിപ്പിച്ചു. 

ആ വാൾ കേരളത്തിൽ വീശാൻ സിപിഎമ്മും തീരുമാനിച്ചു. ന്യൂനപക്ഷങ്ങളെ ഒപ്പം നിർത്തിയാൽ ലോക്സഭ തിരഞ്ഞെടുപ്പിൽ കേരളത്തിൽ മെച്ചപ്പെട്ട പ്രകടനം കാഴ്ചവയ്ക്കാമെന്ന പ്രതീക്ഷയാണ് സിപിഎമ്മിനുള്ളത്. നിലവിലെ ഒരു സീറ്റ് രണ്ടാക്കിയാലും 100 ശതമാനം നേട്ടമെന്ന് സിപിഎം നേതാക്കൾ അവകാശപ്പെടുമെന്ന് കോൺഗ്രസുകാർ പറയാറുണ്ട്. പക്ഷേ, ഭൂരിപക്ഷം സീറ്റുകൾ സ്വന്തമാക്കാനുള്ള ആസൂത്രണങ്ങളാണു സിപിഎം നടത്തുന്നത്. എന്തായാലും വ്യക്തി നിയമത്തിനെതിരായ പോരാട്ടം സമൂലം സ്വന്തമാക്കാൻ സിപിഎം നിശ്ചയിച്ചു. കോൺഗ്രസിന് ഉറച്ച നിലപാട് ഇല്ലെന്ന മുഖവുരയോടെയാണ് സിപിഎം വിഷയത്തിൽ കൈവച്ചത്. ന്യൂനപക്ഷ സംരക്ഷണത്തിനു തങ്ങളാണു മുന്നിലെന്നു വരുത്താൻ സിപിഎം നേതാക്കളാകെ രംഗത്തുവന്നു. സാമൂഹിക മാധ്യമങ്ങളിലും പൊതുമധ്യത്തിലുമെല്ലാം ന്യൂനപക്ഷാവകാശ സംരക്ഷകരായി സിപിഎം അണിനിരന്നു. മാത്രമല്ല, കോൺഗ്രസിനുള്ളിലെ വ്യത്യസ്ത അഭിപ്രായങ്ങളെ പല മട്ടിൽ അവതരിപ്പിച്ച് ന്യൂനപക്ഷങ്ങളെ ആശയക്കുഴപ്പത്തിലാക്കുന്നതിലും സിപിഎം ഒരുപരിധിവരെ വിജയിച്ചിട്ടുണ്ട്. ലക്ഷ്യമിട്ട പദ്ധതി ശരിയായ ദിശയിൽ മുന്നോട്ടു പോകുന്നുവെന്ന് സിപിഎം കണക്കുകൂട്ടിയിരിക്കുമ്പോഴായിരുന്നു ചരിത്രത്തിന്റെ ഓർമപ്പെടുത്തലുകൾ ഒന്നൊന്നായി പുറത്തുവന്നത്. 

‌സിപിഎം ജനറൽ സെക്രട്ടറി ഇ.എം.എസ്.നമ്പൂതിരിപ്പാട് മുതൽ ഇപ്പോഴത്തെ വനിത കമ്മിഷൻ അധ്യക്ഷ പി.സതീദേവി വരെ വ്യക്തി നിയമത്തെക്കുറിച്ചു നടത്തിയ അഭിപ്രായപ്രകടനങ്ങൾ കർശനമായിരുന്നു. ഇ.എം.എസിന്റെ നിലപാട് മലയാള മനോരമ പുറത്തു വിട്ടപ്പോൾ അതിനെ പ്രതിരോധിക്കാൻ തോമസ് ഐസക്ക് ശ്രമിച്ചു. നമ്പൂതിരിപ്പാടിന്റെ അഭിപ്രായത്തെ വളച്ചൊടിച്ചുവെന്നു പറഞ്ഞ ഐസക്, അതിനു പുതിയ വ്യാഖ്യാനങ്ങൾ ചമയ്ക്കാൻ ശ്രമിച്ചു. പുരോഗമന കലാസാഹിത്യ സംഘം ജനറൽ സെക്രട്ടറി അശോകൻ ചരുവിലിനെപ്പോലുള്ളവർ ആ വാദങ്ങളുടെ പ്രചാരകരായി അണിനിരന്നു. പക്ഷേ, ‘ഏക വ്യക്തി നിയമത്തിനു സമയമായി’ എന്ന ഇ.എം.എസിന്റെ ആഹ്വാനത്തെക്കുറിച്ചുള്ള ‘ദേശാഭിമാനി’ വാർത്ത ഉൾപ്പെടെ പലതും പുറത്തുവന്നതോടെ നേതാക്കൾക്കു മറുപടി ഉണ്ടായില്ല. 

∙ വ്യക്തിനിയമത്തെക്കുറിച്ച് ഇ.എം.എസ്. പറഞ്ഞത് എന്തൊക്കെ? 

രാജീവ് ഗാന്ധി പ്രധാനമന്ത്രിയായിരിക്കെ 1985 ഏപ്രിലിൽ ഷാബാനു കേസിൽ വിധി വന്നപ്പോൾ തന്നെ സിപിഎമ്മിന്റെ നയം ജനറൽ സെക്രട്ടറിയായിരുന്ന ഇ.എം.എസ്. നമ്പൂതിരിപ്പാട് പ്രഖ്യാപിച്ചു. ഏക വ്യക്തി നിയമത്തിനുവേണ്ടി പാർട്ടി നിലകൊള്ളുന്നുവെന്ന് അദ്ദേഹം നിരന്തരം ഓർമിപ്പിച്ചു. ചിന്ത വാരികയിലെ ചോദ്യോത്തര പംക്തിയിലും പാർട്ടിയുടെ മറ്റു പ്രസിദ്ധീകരണങ്ങളിലും ഏക വ്യക്തി നിയമത്തിന്റെ പ്രസക്തിയെക്കുറിച്ച് അദ്ദേഹം എഴുതിക്കൊണ്ടിരുന്നു. 1985ൽ ഏക വ്യക്തി നിയമത്തെക്കുറിച്ച് ഡൽഹിയിൽ നടന്ന സെമിനാറിൽ പ്രസംഗിച്ച ഇ.എം.എസിന്റെ വാക്കുകൾ ഇങ്ങനെ: ‘വ്യക്തി നിയമത്തിനുവേണ്ടി ജനങ്ങളെ അണിനിരത്താൻ എഴുത്തുകാരും അഭിഭാഷകരും പത്രപ്രവർത്തകരുമൊക്കെ തയ്യാറാകണം. സ്ത്രീകളെ അടിമകളാക്കി വച്ചിരിക്കുന്ന കാര്യം എഴുത്തുകാർ വനിതകളോടു പറയണം. അങ്ങനെ അവരുടെ സമരത്തിലൂടെ ഏകീകൃത വ്യക്തി നിയമത്തിനു രാജ്യത്ത് അന്തരീക്ഷം സൃഷ്ടിക്കണം.’