കോവിഡ് മൂലം രണ്ടു വർഷത്തെ ഇടവേളയ്ക്കു ശേഷം 2022 മാർച്ചിലാണ് സിംഗപ്പുർ വധശിക്ഷകള്‍ നടപ്പാക്കിത്തുടങ്ങിയത്. അതിനു ശേഷം സരിദേവി ഉൾപ്പെടെ 15 പേർ കൊല്ലപ്പെട്ടു കഴിഞ്ഞു. 2016 മുതൽ ആറു വർഷത്തിനിടയിൽ 10 വിദേശികളെയെങ്കിലും സിംഗപ്പുരിൽ തൂക്കിലേറ്റപ്പെട്ടിട്ടുണ്ടെന്ന് മനുഷ്യാവകാശ പ്രവർത്തകർ പറയുന്നു. സിംഗപ്പുർ ജനതയുടെ 30 ശതമാനവും വിദേശികളാണ്. ആകെയുള്ള തൊഴിൽശേഷിയുടെ മൂന്നിലൊന്നും ഇവർ തന്നെയാണ്. 

അതേസമയം, അയൽരാജ്യങ്ങളായ മലേഷ്യയും തായ്‍ലൻഡും തീർത്തും വ്യത്യസ്തമായ രീതിയിലാണ് ഈ പ്രശ്നത്തോടു പ്രതികരിക്കുന്നത്. 2018 മുതൽ വധശിക്ഷയ്ക്ക് മോറട്ടോറിയം പ്രഖ്യാപിച്ച (താൽക്കാലികമായി തടഞ്ഞ) രാജ്യമാണ് മലേഷ്യ. ഇതിനു പിന്നാലെ 2022 ഏപ്രിൽ ആദ്യം മലേഷ്യൻ പാർലമെന്റ് വധശിക്ഷ നിർത്തലാക്കിക്കൊണ്ടുള്ള നിയമവും പാസാക്കി. മറ്റൊരു അയൽരാജ്യമായ തായ്‍ലൻഡ് ആവട്ടെ, കഞ്ചാവ് നിയമവിധേയമാക്കുകയാണ് ചെയ്തത്. കഞ്ചാവ് വളർത്തുന്നതും വിൽക്കുന്നതും 2022 ജൂണിൽ ഇവിടെ കുറ്റകൃത്യമല്ലാതായിത്തീരുകയും ചെയ്തു. അതേസമയം, വ്യക്തിഗത ഉപയോഗവും പൊതുവിടങ്ങളിലുള്ള ഉപയോഗവും നിരുത്സാഹപ്പെടുത്തുന്ന ശിക്ഷാ നടപടികളും ഒപ്പമുണ്ട്. 

∙ പിടിക്കപ്പെടുന്നതും വധശിക്ഷയ്ക്കിരയാകുന്നതും ‘പാവങ്ങൾ’

സിംഗപ്പുരിൽ ലഹരിമരുന്നിനെതിരെ പ്രഖ്യാപിച്ചിരിക്കുന്ന പോരാട്ടത്തിന്റെ പേരിൽ നടക്കുന്ന വധശിക്ഷ അങ്ങേയറ്റം പ്രാകൃതമാണെന്നാണ് ഈ വിഷയത്തിൽ നിയമപോരാട്ടം നടത്തുന്ന ‘ട്രാൻസ്ഫോമേറ്റിവ് ജസ്റ്റിസ് കലക്ടീവ്’ എന്ന സംഘടന പറയുന്നത്. വധശിക്ഷ നടപ്പാക്കുന്നതുകൊണ്ട് ലഹരിമരുന്ന് കടത്ത് അടക്കമുള്ളവ നിയന്ത്രിക്കാൻ കഴിയുന്നു എന്നു സർക്കാർ പറയുമ്പോൾ പൊള്ളത്തരം മാത്രമാണ് ഈ വാദത്തിലുള്ളത് എന്നാണ് ഈ സംഘടനയുമായി ബന്ധപ്പെട്ട് പ്രവർത്തിക്കുന്നവർ പറയുന്നത്. ലഹരിമരുന്ന് കടത്തിന്റെ തലപ്പത്തിരിക്കുന്നവരെ തൊടാൻ പറ്റുന്നില്ലെന്ന് രാജ്യത്തെ നിയമമന്ത്രി കെ. ഷൺമുഖം 2022 ൽ സമ്മതിച്ചിട്ടുണ്ടെന്ന് ഇവർ ചൂണ്ടിക്കാട്ടുന്നു. 

‘‘താഴേക്കിടയിൽ ലഹരിമരുന്ന് എത്തിക്കുന്നവരെയും അതു കടത്തുന്നവരെയുമെല്ലാം വേട്ടയാടാനാണ് സർക്കാർ ഈ നിയമം ഉപയോഗിക്കുന്നത്. പലപ്പോഴും ഇവരുടെ സാഹചര്യങ്ങളാണ് ഈ ജോലിയിലേക്ക് പലരെയും എത്തിക്കുന്നത്’’– സംഘടന പറയുന്നു. മാനസികാസ്വാസ്ഥ്യങ്ങളുള്ളവരെയും ലഹരിമരുന്നിന് അടിമകളായവരെയുമൊക്കെ വധശിക്ഷയ്ക്കു വിധേയമാക്കുന്നത് ഒരു പരിഷ്കൃത സമൂഹത്തിന് ചേരുന്നതല്ലെന്നും ഇവർക്ക് ചികിത്സയും പുനരധിവാസവുമാണ് വേണ്ടതെന്നും വധശിക്ഷയെ എതിർക്കുന്നവർ പറയുന്നു.

മാത്രമല്ല, പലപ്പോഴും നീതിയുക്തമായല്ല അന്വേഷണവും വിചാരണയും നടക്കുന്നതെന്നും ആരോപണങ്ങളുണ്ട്. തങ്കരാജുവിനെ വധശിക്ഷയ്ക്കു വിധേയനാക്കിയത്, ലഹരിമരുന്ന് കടത്തിയവരുടെ ഫോണിൽ അയാളുടെ നമ്പർ ഉണ്ട് എന്ന കാരണം കണ്ടെത്തിയായിരുന്നു. ലഹരിമരുന്ന് കടത്തിയ ഒരാൾ കുറ്റവിമുക്തനാവുകയും മറ്റൊരാൾ ജീവപര്യന്തം ശിക്ഷയ്ക്കു വിധിക്കപ്പെടുകയും ചെയ്തപ്പോൾ ഫോൺ നമ്പർ‌ കണ്ടെത്തി എന്ന പേരിൽ തങ്കരാജുവിനെ വധശിക്ഷയ്ക്കിരയാക്കി എന്നതിലെ വിരോധാഭാസമാണ് പലരും ചോദ്യം ചെയ്യുന്നത്. 

ഇതിന്റെ മറ്റൊരുദാഹരണമായിരുന്നു 2009 ൽ 42.72 ഗ്രാം ഹെറോയിനുമായി പിടിയിലായ നാഗേന്ദ്രൻ ധർമലിംഗത്തെ 2022 ഏപ്രിലിൽ വധശിക്ഷയ്ക്ക് വിധേയനാക്കിയത്. ഇന്ത്യന്‍ വംശജനായ മലേഷ്യൻ പൗരനായിരുന്നു നാഗേന്ദ്രൻ. ബൗദ്ധികവെല്ലുവിളി നേരിടുന്നയാളാണു നാഗേന്ദ്രൻ എന്നു പരിശോധനയിൽ തെളിഞ്ഞിരുന്നു. ഐക്യു സ്കോർ 69 മാത്രമുള്ള നാഗേന്ദ്രന്റേത് മാനസിക വൈകല്യമായിത്തന്നെ കണക്കാക്കണമെന്ന് വിദഗ്ധർ അഭിപ്രായപ്പെടുകയും ചെയ്തു. എന്നാൽ കാര്യങ്ങളിലെ ശരിയും തെറ്റും തിരിച്ചറിയാൻ നാഗേന്ദ്രന് കഴിയുമെന്നും വധശിക്ഷ നീട്ടിവയ്ക്കാനുള്ള പുതിയ തന്ത്രങ്ങളാണ് ഈ വാദങ്ങളെന്നുമായിരുന്നു സർക്കാരിന്റെ നിലപാട്. 12 വർഷത്തെ തടവിനു ശേഷം നാഗേന്ദ്രനെ തൂക്കിലേറ്റി.

∙ വിചാരണയ്ക്കു വന്നാൽ ജഡ്ജിക്കും തോന്നണം

മിസ്‍യൂസ് ഓഫ് ഡ്രഗ്സ് ആക്ട് (എംഡിഎ) എന്ന, ലഹരിമരുന്നുമായി ബന്ധപ്പെട്ട കർശനമായ നിയമമുള്ള രാജ്യമാണ് സിംഗപ്പുർ. ഇത‌നുസരിച്ച് നിശ്ചിത അളവിനു മുകളിൽ കഞ്ചാവ്, െഹറോയിൻ, കൊക്കെയ്ൻ, കെറ്റമിൻ തുടങ്ങിയവ കടത്തിയാൽ വധശിക്ഷ ലഭിക്കാം. അരക്കിലോയിൽ കൂടുതൽ കഞ്ചാവോ 15 ഗ്രാമിൽ കൂടുതൽ ഹെറോയിനോ കടത്തുന്നത് വധശിക്ഷയ്ക്ക് കാരണമാകുമെന്നും നിയമം പറയുന്നു. എന്നാൽ പലപ്പോഴും ഇത് കേസ് കേൾക്കുന്ന ജഡ്ജിമാരെക്കൂടി ആശ്രയിച്ചാണിരിക്കുന്നത്. അതിന്റെ ഉദാഹരണമാണ് സരിദേവിയുടെ കേസ്. വിചാരണയിലെ വാദങ്ങൾ പലപ്പോഴും ആ രീതിയിലായിരുന്നു. 

30.72 ഗ്രാം ഹെറോയിൻ കടത്തി എന്നതായിരുന്നു സരിദേവിയുടെ പേരിലുള്ള കേസ്. മുഹമ്മദ് ഹൈക്കലിനെതിരെ, 28 ഗ്രാം ഹെറോയിൻ പിടികൂടിയെന്നും കേസെടുത്തു. മിസ്‍യൂസ് ഓഫ് ഡ്രഗ്സ് ആക്ട്’ അനുസരിച്ച് രണ്ടുപേർക്കും വധശിക്ഷ ഉറപ്പായിരുന്നു. എന്നാൽ വിധി വന്നപ്പോൾ സരിദേവിക്കു വധശിക്ഷയും ഹൈക്കലിന് ജീവപര്യന്തവും ചാട്ടവാറടിയും. ഒരു ‘കുറിയർ’ (കടത്തുകാരൻ) ആയി പ്രവർത്തിക്കുക മാത്രമേ ഹൈക്കൽ ചെയ്തിട്ടുള്ളൂ എന്നാണ് കോടതി നിരീക്ഷിച്ചത്. അതേസമയം, സരീദേവിയുടെ മൊഴികളിൽ വൈരുധ്യമുണ്ടെന്നു ചൂണ്ടിക്കാട്ടിയായിരുന്നു വധശിക്ഷ.

2014 ൽ ശിക്ഷ കഴിഞ്ഞിറങ്ങിയ ശേഷം ലഹരിമരുന്ന് ഉപയോഗിക്കാറില്ല എന്നായിരുന്നു അറസ്റ്റിലായ സമയത്ത് പൊലീസിനു നൽകിയ മൊഴിയിൽ സരിദേവി പറഞ്ഞിരുന്നത്. എന്നാൽ കോടതിയിൽ വന്നപ്പോൾ, താൻ സ്ഥിരമായി ഹെറോയിൻ ഉപയോഗിച്ചിരുന്നുവെന്നും അത് ലഭിക്കാത്തതിനാലുള്ള അസ്വസ്ഥതകൾ അനുഭവിക്കുന്ന ആളാണെന്നുമായിരുന്നു മൊഴി. പക്ഷേ തെളിവുകളെല്ലാം സരിദേവിക്ക് എതിരാണ് എന്നായിരുന്നു വിധി. ലഹരിമരുന്നിന് അടിമയായിട്ടുള്ള 370 പേർക്ക് ഒരാഴ്ച ഉപയോഗിക്കാനുള്ളത്ര ഹെറോയിൻ സരിദേവിയുടെ കയ്യിലുണ്ടെന്നായിരുന്നു കോടതി നിരീക്ഷിച്ചത്.