∙ പ്രപഞ്ചത്തിന്റെ ഉൽപ്പത്തി എങ്ങനെ?

ദക്ഷിണ ധ്രുവത്തിലെ ഭീമൻ ഗർത്തങ്ങൾ പ്രപഞ്ചത്തിന്റെയും ഭൂമിയുടെയും ഉൽപ്പത്തിയെക്കുറിച്ചുള്ള രഹസ്യങ്ങൾ വെളിപ്പെടുത്തിയേക്കുമെന്ന പ്രതീക്ഷയും ഗവേഷകർക്കുണ്ട്. കാലങ്ങളായി സൂര്യപ്രകാശം പതിയാതെ തണുത്തുറഞ്ഞു കിടക്കുന്ന, ഇരുൾ നിറഞ്ഞ പ്രദേശങ്ങളിൽനിന്ന് ചന്ദ്രയാന്റെ റോവർ വഴി സാംപിൾ ശേഖരിക്കുന്നുണ്ട്. ഇതിന്റെ കാലഗണനാ പരിശോധനയിലൂടെ പ്രപഞ്ചത്തിലുണ്ടായ മാറ്റങ്ങളുടെ ചുരുളഴിഞ്ഞേക്കും. അവിടെ നിന്നു ഫോസിലുകൾ ലഭിച്ചേക്കുമെന്ന പ്രതീക്ഷയുമുണ്ട്. അവിടെയുള്ള പർവതങ്ങളിലെ കൊടുമുടിയിൽ ദീർഘകാലം സൂര്യപ്രകാശം ലഭിക്കുമെന്നതിനാൽ സോളർ പാനലുകൾ ഉപയോഗിച്ച് ഊർജം കണ്ടെത്താനുമാകും.

∙ ഭൂമിക്കു പുറത്തു ജീവനുണ്ടോ?

ഭൂമിക്കു പുറത്തു ജീവനുണ്ടാകാൻ സാധ്യതയുള്ള ഗ്രഹങ്ങൾ കണ്ടെത്തുന്ന ദൗത്യത്തിനും ചന്ദ്രയാൻ 3 തുടക്കമിടുന്നുണ്ട്. ഭൂമിയെ വിദൂരതയിൽനിന്നു നിരീക്ഷിച്ച് ജീവനുള്ള ഗ്രഹത്തിന്റെ പ്രത്യേകതകൾ മനസ്സിലാക്കാൻ ചന്ദ്രയാൻ 3 ന്റെ പ്രൊപ്പൽഷൻ മൊഡ്യൂളിൽ ‘ഷെയ്പ്’ എന്ന ശാസ്ത്രീയ ഉപകരണമാണ് (പേലോഡ്) ഘടിപ്പിച്ചിരിക്കുന്നത്. ലളിതമായി പറഞ്ഞാൽ, അകലെ നിന്നു കണ്ടാൽ ജീവനുള്ള ഗ്രഹത്തെ എങ്ങനെ തിരിച്ചറിയും എന്നാണ് ഈ ഉപകരണം പഠിക്കുന്നത്.

∙ ‘‘ഗ്രഹങ്ങൾ കടന്ന് പോകാൻ ഇടത്താവളം’’

‘‘ചന്ദ്രയാൻ 2 പരാജയത്തിൽനിന്നു പഠിച്ച പാഠങ്ങൾ ഉൾക്കൊണ്ടും പിഴവുകൾ തിരുത്തിയുമാണ് മറ്റൊരു ഗ്രഹത്തിൽ സോഫ്റ്റ് ലാൻഡിങ് നടത്തുന്നതിന് നമ്മൾ സജ്ജരായത്. ചന്ദ്രയാൻ 3 ദൗത്യം വിജയിച്ചതോടെ ഗ്രഹാന്തര ദൗത്യങ്ങൾക്കുള്ള ഇന്ത്യയുടെ പരിശ്രമങ്ങൾക്ക് ആക്കം കൂടും. ഭാവിയിലെ ഗ്രഹാന്തര ദൗത്യങ്ങൾക്ക് നാം നല്ല തുടക്കം കുറിച്ചു കഴിഞ്ഞു’’– ഇസ്റോ മുൻ ചെയർമാൻ ജി.മാധവൻ നായർ പറയുന്നു. ‘‘ചൊവ്വാ ദൗത്യമായ മംഗൾയാനും ചന്ദ്രനിൽ സോഫ്റ്റ് ലാൻഡിങ്ങിനുള്ള ചന്ദ്രയാൻ 3 ഉം വിജയിച്ച സാഹചര്യത്തിൽ, ഇനി സൗരദൗത്യമായ ആദിത്യ എൽ1 ആണ്. അതും ഉടൻ നടക്കും. അതിലൂടെ, സൂര്യനെക്കുറിച്ചു പഠിച്ച് ഭൂമിയിലെ കാലാവസ്ഥാ വ്യതിയാനത്തെക്കുറിച്ചു നമുക്കു കൂടുതൽ മനസ്സിലാക്കാൻ കഴിയും. തുടർന്ന് ശുക്രൻ കേന്ദ്രീകരിച്ചുള്ള ഇസ്റോയുടെ ആദ്യ ദൗത്യവും നടക്കും.

ലോകത്തിനു മുന്നിൽ ഇന്ത്യയുടെ സാങ്കേതിക ശക്തിയുടെ പ്രദർശനമാണ് ചന്ദ്രയാൻ 3 വിജയത്തിലൂടെ ഉണ്ടായത്. നമുക്കു മുൻപു മൂന്നു രാജ്യങ്ങൾ മാത്രമാണ് ചന്ദ്രനിൽ സോഫ്റ്റ് ലാൻഡിങ് നടത്തിയിട്ടുള്ളത്. ഈ ദൗത്യത്തിലൂടെ നമ്മൾ നാലാമത്തെ രാജ്യമായി. ചന്ദ്രനിലെ ധാതുക്കളെക്കുറിച്ചു ലഭിക്കുന്ന വിവരങ്ങൾ ഭാവിയിൽ പ്രയോജനപ്പെടുത്താൻ കഴിയും. മറ്റൊരു ഗ്രഹത്തിൽ നമുക്ക് സ്ഥിരം നിരീക്ഷണ കേന്ദ്രം (ഒബ്സർവേറ്ററി) സ്ഥാപിക്കണമെങ്കിൽ ചന്ദ്രന്റെ ദക്ഷിണ ധ്രുവമാണ് അതിന് ഏറ്റവും അനുയോജ്യം. അതിനു വേണ്ടിയുള്ള ശ്രമങ്ങളിലേക്ക് ഇനി കടക്കാൻ കഴിയും. അതിൽനിന്നുള്ള വിവരങ്ങളനുസരിച്ചു ബഹിരാകാശ ഗവേഷണത്തിന്റെ ഭാവി വികസിപ്പിക്കാം.

ദീർഘകാല പദ്ധതി വച്ചുള്ള കൃത്യമായ ആസൂത്രണംകൊണ്ടാണ് നമുക്ക് ബഹിരാകാശ ഗവേഷണ ദൗത്യങ്ങളുടെ ചെലവ് കുറയ്ക്കാൻ സാധിക്കുന്നത്. മുൻപു ചെയ്തിട്ടുള്ള ഓരോ ദൗത്യത്തിന്റെയും ഗവേഷണങ്ങളുടെയും വിവരങ്ങൾ കൃത്യമായി ഉപയോഗിച്ചു മുന്നോട്ടു പോകുന്നതിനാൽ ആവർത്തനച്ചെലവ് ഉണ്ടാകുന്നില്ല. സ്രോതസ്സുകളെ സൂക്ഷ്മമായി ഉപയോഗിക്കുന്നുണ്ട്. പാശ്ചാത്യ രാജ്യങ്ങളെ അപേക്ഷിച്ചു മനുഷ്യവിഭവ ശേഷിയുടെ ചെലവ് നമുക്ക് കുറവാണ്. ബഹിരാകാശ ഗവേഷണ ദൗത്യങ്ങൾക്ക് ഇസ്റോ തദ്ദേശീയമായി വികസിപ്പിച്ചെടുത്ത സാങ്കേതിക വിദ്യകൾ ഉപയോഗിക്കുന്നതും ചെലവു കുറയാൻ കാരണമാണ്.

വിദേശരാജ്യങ്ങൾക്കു നമ്മുടെ വിക്ഷേപണ വാഹനങ്ങളിൽ വിശ്വാസ്യത വർധിച്ചിട്ടുണ്ട്. അതു വരുംകാലങ്ങളിൽ വാണിജ്യ വിക്ഷേപണങ്ങളിലൂടെയുള്ള വരുമാനം വർധിക്കാൻ കാരണമാകും. ഒന്നാം ചന്ദ്രയാൻ ദൗത്യത്തിൽ റിമോട്ട് സെൻസിങ് സാങ്കേതിക വിദ്യ ഉപയോഗിച്ച് നമ്മൾ ചന്ദ്രന്റെ ഉപരിതലം മുഴുവൻ നിരീക്ഷിച്ചു. ചന്ദ്രനിൽ ജലാംശമുണ്ടെന്നു നമ്മൾ അങ്ങനെയാണ് ആദ്യമായി കണ്ടെത്തിയത്. ഇപ്പോൾ ഹീലിയം 3 ധാതു നിക്ഷേപം ചന്ദ്രനിലുണ്ടെന്നും നമ്മൾ കണ്ടെത്തിയിട്ടുണ്ട്. അത് ഉറപ്പിക്കുകയും കൂടുതൽ വിവരങ്ങൾ ശേഖരിക്കുകയുമാണ് ചന്ദ്രയാൻ 3 ദൗത്യത്തിലൂടെ ചെയ്യുന്നത്. 

ചന്ദ്രനില്‍ സോഫ്റ്റ് ലാൻഡിങ് ചെയ്യുകയെന്നത് കൂടുതൽ സങ്കീർണമായ പ്രക്രിയയാണ്. അതു വിജയകരമായി ചെയ്തതോടെ നമ്മുടെ സാങ്കേതിക ശക്തി വർധിച്ചു. ഒന്നാം ചന്ദ്രയാൻ ദൗത്യത്തിന്റെ കാലം മുതൽ സോഫ്റ്റ്ലാൻഡിങ്ങിനെക്കുറിച്ച് നമ്മൾ ആലോചിച്ചിരുന്നു. പല കാരണങ്ങൾകൊണ്ട് അതു വൈകി. ചന്ദ്രയാൻ 2 ൽ സോഫ്റ്റ് ലാൻഡിങ് ലക്ഷ്യമിട്ടെങ്കിലും പല കാരണങ്ങൾകൊണ്ട് അവസാന നിമിഷം അതു പരാജയപ്പെട്ടു. അതിന്റെ കാരണങ്ങളും പ്രതിവിധികളും കണ്ടെത്തി മുന്നോട്ടു പോയാണ് ഇത്തവണത്തെ വിജയം നമ്മൾ നേടിയത്’’– ഡോ.മാധവൻ നായർ പറഞ്ഞു.

English Summary: How Chandrayaan 3's Landing on Moon's South Pole Help ISRO in Achieving New Heights?