രാഹുൽ ഗാന്ധിയുടെ യൂത്ത് കോൺഗ്രസ് ജോഡോ യാത്രയുടെ ഭാഗമായാണ് വാസ്തവത്തിൽ ചാണ്ടി കേരളത്തിൽ എത്തിയത്. പി.സി.വിഷ്ണുനാഥാണ് പ്രസിഡന്റ്. യുവസംഘടന സജീവമായി മുന്നേറുന്ന കാലം. പുനഃസംഘടനാ കാലമായി. ഒരു ദിവസം വിഷ്ണുനാഥ് ഉമ്മൻ ചാണ്ടിയെ കാണാനെത്തി. ചാണ്ടി ഉമ്മനെ മത്സരിപ്പിക്കാൻ അനുവാദം ചോദിക്കാൻ.
വിഷ്ണുനാഥ്: യുത്ത് കോൺഗ്രസ് ജനറൽ സെക്രട്ടറി സ്ഥാനത്തേക്ക് ചാണ്ടിയെ മത്സരിപ്പിക്കട്ടെ. നിലവിൽ ജനറൽ സെക്രട്ടറിയാണ്. തിരഞ്ഞെടുപ്പിൽ വന്നതാണ്. ആ നിലയ്ക്ക് അർഹനാണ്.
ഉമ്മൻ ചാണ്ടി : വേണ്ട മറ്റൊരാളുടെ അവസരം കളയരുത്.

ഇനി സംസാരിച്ചിട്ടു കാര്യമില്ല. വിഷ്ണുനാഥ് മടങ്ങി. കുറച്ചു കഴിഞ്ഞപ്പോൾ ഉമ്മൻ ചാണ്ടിയുടെ വിളിയെത്തി. മനസ് മാറിക്കാണുമോ‍? വിഷ്ണുവിന് സംശയം. ഫോണെടുത്തു.
ഉമ്മൻ ചാണ്ടി: ചാണ്ടിയെ താൻ ജനറൽ സെക്രട്ടറി സ്ഥാനത്തേക്ക് അല്ലേ ആലോചിച്ചത്.
വിഷ്ണു നാഥ് : അതേ
ഉമ്മൻ ചാണ്ടി: അപ്പോൾ അവിടെ ഒരു ഒഴിവുണ്ട്. ആ സ്ഥാനത്തേക്ക് ചാണ്ടി വേണ്ട. അടൂരിലുള്ള വിമലിനെ ആ ഒഴിവിലേക്ക് പരിഗണിക്കാം.

ചാണ്ടി ഉമ്മനെ നിരുത്സാഹപ്പെടുത്തുക മാത്രമല്ല ആ ഒഴിവു കൂടി ഉമ്മൻ ചാണ്ടി അടച്ചുവെന്നു വിഷ്ണുനാഥ് പറയുന്നു. അതിൽ ചാണ്ടി ഉമ്മന് നിരാശയുമുണ്ടായിരുന്നില്ല. വേണ്ടിടത്തെല്ലാം പിതാവിനെ സഹായിക്കാൻ ചാണ്ടി ഉമ്മൻ എത്തി. 2011 മുതൽ പുതുപ്പള്ളിയിൽ ഉമ്മൻ ചാണ്ടിയുടെ പ്രചാരണത്തിൽ ചാണ്ടിയും സജീവമായി പങ്കെടുത്തു. പ്രചാരണത്തിൽ പിതാവിന്റെ സഹായി അത്രമാത്രം. എന്നാൽ ഉമ്മൻ ചാണ്ടി രണ്ടാം വട്ടം മുഖ്യമന്ത്രി ആയപ്പോഴും ആരും അധികാരത്തിന്റെ ഇടനാഴികളിൽ ചാണ്ടി ഉമ്മനെ കണ്ടില്ല. ലോക്സഭാ തിര‍ഞ്ഞെടുപ്പിലും തദ്ദേശ തിരഞ്ഞെടുപ്പിലും ചാണ്ടിയുടെ പേര് പല വട്ടം ചർച്ചയിൽ വന്നു. പക്ഷേ ചാണ്ടി മാത്രം വന്നില്ല. ഈ സമയം പൊതു പ്രവർത്തനത്തിന്റെ പാതയിൽ തന്നെയായിരുന്നു ചാണ്ടി ഉമ്മൻ. അതാരും കണ്ടില്ലെന്നു മാത്രം. അതെവിടെയാണ്?

∙ ഈ യുവാവിനെതിരെ സാമൂഹിക അകലം ലംഘിച്ചതിന് കേസ് എടുക്കേണ്ടി വരും?

കോവിഡ് കാലം. ഏറ്റവും രൂക്ഷം ഡൽഹിയിൽ. ഒരു ദിവസം ഡീൻ കുര്യാക്കോസ് എംപിയെ തേടി ഡൽഹി പൊലീസിന്റെ വിളിയെത്തി. സാമൂഹിക അകലം കർശനമായി പാലിക്കുന്ന കാലമാണ്. ചേരികളിൽ ചില സ്ഥലത്ത് ആൾക്കൂട്ടം. ഏതാണ്ട് പുതുപ്പള്ളിയിൽ ഞായറാഴ്ച കാണുന്നതു പോലെ തന്നെ. അതിനു നടുവിൽ ചാണ്ടി ഉമ്മനും. ചാണ്ടി താമസിക്കുന്നത് ഡീനിന്റെ ഫ്ലാറ്റിലാണ്. ‘‘കോവിഡ് കിറ്റ് വിതരണമാണ് ചാണ്ടി ഉമ്മന്റെ പരിപാടി. ചേരികളിൽ എല്ലാം ഓടിയെത്തി കിറ്റ് വിതരണമാണ്. ഇതെല്ലാം കഴിഞ്ഞ് രാത്രി ഫ്ലാറ്റിലെത്തും. അതു കഴിഞ്ഞാൽ അവിടെയും കിറ്റ്  വിതരണം തുടരും.’’ ഡീൻ കുര്യാക്കോസ് പറഞ്ഞു.

നാടു മുഴുവൻ കറങ്ങി വൈകിട്ട് ചാണ്ടി ഫ്ലാറ്റിൽ വരുന്നതിനാൽ തനിക്കും ഭയമുണ്ടെന്ന് ഡീൻ കുര്യാക്കോസ് ചില നേതാക്കളെ വിളിച്ച് ആശങ്ക അറിയിച്ചെന്ന് മറ്റൊരു കഥയുമുണ്ട്. കോവിഡ് കാലത്ത് 1500 ൽ ഏറെ മൊബൈൽ ഫോണുകളാണ് വിദ്യാർഥികൾക്ക് പഠിക്കാൻ ചാണ്ടി വിതരണം ചെയ്തത്. ഉമ്മൻ ചാണ്ടിയിൽ നിന്ന് രാഷ്ട്രീയം മാത്രമല്ല ചാണ്ടി പഠിച്ചതെന്ന് സുഹൃത്തും പാലക്കാട് ഡിസിസി ജനറൽ സെക്രട്ടറിയുമായ എസ്.കൃഷ്ണദാസ് പറയുന്നു. 

‘‘ആരെങ്കിലും തങ്ങളുടെ ബുദ്ധിമുട്ട് പറഞ്ഞാൽ ചാണ്ടിക്കു വിഷമമാകും. കോവിഡ് കാലത്ത് പാലക്കാട് പുതുപ്പള്ളിത്തെരുവിൽ ഞങ്ങൾ എ പ്ലസ് നേടിയവരെ ആദരിച്ചു. പരിപാടിയിൽ ചാണ്ടി ഉമ്മനും പങ്കെടുത്തു. അതു കഴിഞ്ഞപ്പോൾ ആരോ പറഞ്ഞു. കോവിഡിൽ അച്ഛനും അമ്മയും മരിച്ചു പോയ കുട്ടിയുടെ തുടർപഠനം മുടങ്ങിയെന്ന്. എന്തു ചെയ്യാമെന്ന് ഞങ്ങൾ ആലോചിച്ചിരുന്നു. വഴിയൊന്നും കണ്ടില്ല. പിന്നീട് അവരുടെ ബന്ധുക്കൾ പറഞ്ഞാണ് അറിഞ്ഞത്, ഏതാനും ദിവസം കഴിഞ്ഞ് ചാണ്ടി ഉമ്മൻ ആ കുട്ടിയുടെ വീട്ടിൽ വന്ന് തന്നാൽ കഴിയാവുന്ന സഹായങ്ങൾ കൈമാറിയെന്ന്. ഞങ്ങളോട് ഇക്കാര്യം പറഞ്ഞതുമില്ല,’’ കൃഷ്ണദാസ് പറഞ്ഞു.

ആരെയും സഹായിക്കാൻ ചാണ്ടിക്ക് മടിയില്ല. പ്രായമായവരെ ശുശ്രൂഷിക്കാനും. 7 വർഷം ഉമ്മൻ ചാണ്ടിയെ കരുതലോടെ ശുശ്രൂഷിച്ചത് നമ്മൾ കണ്ടതാണ്. എല്ലാം മാറ്റി വച്ചാണ് ചാണ്ടി ഉമ്മൻ പിതാവിനെ ശുശ്രൂഷിച്ചത്, കൃഷ്ണദാസ് ഓർക്കുന്നു. ഉമ്മൻ ചാണ്ടിയുടെ വിയോഗത്തിനു ശേഷം നടന്ന ഉപതിരഞ്ഞെടുപ്പിലെ വിജയത്തോടെ അടുത്ത ചുമതലയും ചാണ്ടിയെ തേടി എത്തുന്നു. ഉമ്മൻ ചാണ്ടിയുടെ പുതുപ്പള്ളിയെ ശുശ്രൂഷിക്കുക. കഴിഞ്ഞ 53 വർഷം ഉമ്മൻ ചാണ്ടി എങ്ങനെയാണോ പുതുപ്പള്ളിയെ കരുതിയത്, അതു പോലെ. ചാണ്ടി ഉമ്മന്റെ മുന്നിലുള്ള വെല്ലുവിളിയും അതു തന്നെയാകും. എങ്ങനെയാകും ആ ദൗത്യം ചാണ്ടി പൂർത്തിയാക്കുക?

∙ പുതുപ്പള്ളി ജോഡോ യാത്ര തുടരുകയാണ്

പുതുപ്പള്ളിയിൽ ഉപതിരഞ്ഞെടുപ്പ് പ്രചാരണത്തിന്റെ അവസാന ദിവസം. കലാശക്കൊട്ടിന് തന്റെ ആശയം ചാണ്ടി നേതാക്കളുമായി പങ്കു വച്ചു. മണ്ഡലത്തിലൂടെ പദയാത്ര നടത്തുക. ഗംഭീരമായ കലാശക്കൊട്ടിന് പകരം ജനങ്ങൾക്കിടയിലൂടെ നടക്കുക. ജോഡോ യാത്രയിൽ ചെരുപ്പില്ലാതെ 4000 കിലോമീറ്റർ നടന്ന ചാണ്ടിയുടെ വാക്കിൽ ആർക്കും അവിശ്വാസമില്ല. ആശയം നല്ലതാണ്. പുതുമയുണ്ട്. പ്രതിപക്ഷ നേതാവ് വി.ഡി.സതീശൻ അടക്കം ചർച്ച ചെയ്തു. പ്രധാന പ്രശ്നം ഇതാണ്. പ്രചാരണത്തിന്റെ അവസാന ദിവസം മണ്ഡലത്തിന്റെ എല്ലാ ഭാഗത്തും സ്ഥാനാർഥി എത്താൻ നാട്ടുകാരും പ്രവർത്തകരും ആഗ്രഹിക്കില്ലേ.

പദയാത്ര ആയാൽ അതു സാധിക്കില്ല. അതിനാൽ ഒഴിവാക്കാം. എന്നാൽ പദയാത്ര എന്ന ആശയം വഴി ചാണ്ടി തന്റെ നയം വ്യക്തമാക്കുകയായിരുന്നു. പിതാവിന്റെ പാത എങ്ങനെയാകും പിന്തുടരുകയെന്ന്. ഇനി എവിടെയാണ് താൻ സമയം ചിലവഴിക്കാൻ പോകുന്നതെന്നും. കഠിനാധ്വാനിയും ഊർജ്വസ്വലനുമായ ചെറുപ്പക്കാരനാണ് ചാണ്ടി ഉമ്മനെന്ന് തിരുവഞ്ചൂർ രാധാകൃഷ്ണൻ പറഞ്ഞു. ‘‘പ്രചാരണത്തിൽ ഞങ്ങൾക്ക് അതു ബോധ്യമായി. ഉമ്മൻ ചാണ്ടിയുടെ പല ഗുണങ്ങളും ചാണ്ടിയിൽ കാണാം. ഏവരെയും കരുതലോടെ കാണാനും അറിയാം. ചാണ്ടിക്ക് എല്ലാ അർഥത്തിലും ഉമ്മൻ ചാണ്ടിയുടെ പാത പിന്തുടരാൻ കഴിയും’’.

വാസ്തവത്തിൽ പുതുപ്പള്ളിയിലും കോൺഗ്രസ് പാർട്ടിയിലും ചാണ്ടിയെ കാത്തിരിക്കുന്ന ദൗത്യം ഏറെ വലുതാണ്. പിതാവിനെ ദൈവത്തെപ്പോലെ ചാണ്ടി കണ്ടിരുന്നു. ആ പിതാവ് ഇനി ചാണ്ടിയുടെ വഴികാട്ടി. അതേ സമയം പ്രവർത്തനത്തിൽ ഉമ്മൻ ചാണ്ടിയോളം എത്താനുള്ള ലക്ഷ്യവും ചാണ്ടിയുടെ മുന്നിലുണ്ട്. അതേ പുതുപ്പള്ളി ജോഡോ യാത്ര തുടരുകയാണ്.

English Summary : New Winner For Puthuppally Constituency; Life of Chandy Oommen