14 വയസ്സിൽ നക്സൽ, അറസ്റ്റിലാകുമ്പോൾ ഗർഭിണി; ‘ഓപറേഷൻ ആകർഷും’ പാളി; വെടിയേറ്റിട്ടും വീഴാതെ ‘മന്ത്രി സീതക്ക’

പിൽക്കാലത്ത് വേർപിരിഞ്ഞ ഭർത്താവ് രാമു അപ്പോഴും നക്സൽ പ്രസ്ഥാനത്തിന്റെ ഭാഗമായിരുന്നു. ഭർത്താവിനെയും സഹോദരനെയും പിന്നീടുണ്ടായ പൊലീസ് ഏറ്റുമുട്ടലിൽ അവർക്ക് നഷ്ടപ്പെടുകയും ചെയ്തു. കീഴടങ്ങുമ്പോൾ മൂന്നു മാസത്തെ ജയിൽ വാസമാണ് സീതക്കയ്ക്ക് മുന്നിലുണ്ടായിരുന്നത്. അത് പൂർത്തിയാക്കിയ സീത ആദിവാസികൾക്ക് വേണ്ടി പ്രവർത്തിക്കുന്ന ‘യാക്ഷി’ എന്ന എൻജിഒയുടെ ഭാഗമായി. 2500 രൂപയായിരുന്നു ആദ്യ ശമ്പളം. പത്താം ക്ലാസിൽ അവസാനിച്ച വിദ്യാഭ്യാസം അക്കാലത്ത് സീത തുടർന്നു. നിയമപഠനവും പൂർത്തിയാക്കി.

അഭിഭാഷകയായി ജീവിതം തുടരാനായിരുന്നു ആഗ്രഹം. ആദിവാസികളെ കള്ളക്കേസിൽ കുടുക്കുന്നത് എങ്ങനെയെന്ന് കണ്ടുപരിചയമുള്ള സീത തന്റെ നിയമ ബിരുദം ഉപയോഗിച്ചതും ആദിവാസികളുടെ ക്ഷേമത്തിനു വേണ്ടിയായിരുന്നു. എൻജിഒയുടെ പ്രവർത്തനങ്ങളുടെ ഭാഗമായി ആദിവാസി ഊരുകളിൽ അങ്ങോളമിങ്ങോളം സഞ്ചരിക്കുകയും വേണ്ട സഹായങ്ങൾ എത്തിച്ചു കൊടുക്കുകയും വിദ്യാഭ്യാസത്തിന്റെ പ്രാധാന്യത്തെപ്പറ്റി ബോധവൽക്കരിക്കുകയു ചെയ്തുകൊണ്ട് ആദിവാസികൾക്കു വേണ്ടി ഒരിക്കൽ തോക്കെടുത്ത സീതക്ക അവരുടെ സീതക്കയായിതന്നെ തുടർന്നു. പക്ഷേ, ആദിവാസി സമൂഹത്തിന് നിഷേധിക്കപ്പെടുന്ന പലതും നേടിയെടുക്കാൻ എൻജിഒയുടെ മേൽവിലാസം മാത്രം പോരെന്ന തിരിച്ചറിവാണ് അനസൂയയ്ക്കു രാഷ്ട്രീയത്തിലേക്കുള്ള വഴി തുറക്കുന്നത്.

∙ ആദ്യം തോൽവി, പിന്നെ സ്വന്തം എംഎൽഎ

2004 ലാണ് തെലുഗു ദേശം പാർട്ടി (ടിഡിപി) ടിക്കറ്റിൽ സീതക്കയുടെ രാഷ്ട്രീയ പ്രവേശം. പട്ടികവർഗ സംവരണ മണ്ഡലമായ മുളുഗുവിൽ കന്നിയങ്കത്തിൽ കോൺഗ്രസിന്റെ സിറ്റിങ് എംഎൽഎ ആയിരുന്ന വീരയ്യയോട് സീതക്ക തോറ്റു. 2003 ൽ തെലുഗു ദേശം പാർട്ടി നേതാവായ ചന്ദ്രബാബു നായിഡുവിനെതിരെ പിപ്പീൾസ് വാർ ഗ്രൂപ്പ് എന്ന നക്സൽ ഗ്രൂപ്പ് നടത്തിയ ആക്രമണവും തിരഞ്ഞെടുപ്പിൽ സീതക്കയ്ക്ക് തിരിച്ചടിയായിരുന്നു. പക്ഷേ, 2009 ൽ വീണ്ടും ടിഡിപി ടിക്കറ്റിൽ മത്സരിച്ച് വീരയ്യയോട് 18,775 വോട്ടിന്റെ ഭൂരിപക്ഷത്തിൽ വിജയിച്ചു. 

2014 ൽ വീണ്ടും ടിഡിപി സ്ഥാനാർഥിയായി അതേ മണ്ഡലത്തിൽ സീതക്ക ജനവിധി തേടി. തെലങ്കാന രൂപീകരണത്തിനു ശേഷമുള്ള ആ തിരഞ്ഞെടുപ്പിൽ തെലങ്കാന രാഷ്ട്രസമിതിക്ക് ഒപ്പമായിരുന്നു ജനം. തിരഞ്ഞെടുപ്പിൽ തോറ്റെങ്കിലും മുളുഗു മണ്ഡലത്തിലെ ജനങ്ങൾക്കൊപ്പം സീതക്ക ഉണ്ടായിരുന്നു. ഇപ്പോഴത്തെ തെലങ്കാന മുഖ്യമന്ത്രി രേവന്ത് റെഡ്ഡിയും സീതക്കയും പിന്നീട് തെലുഗു ദേശം പാർട്ടി വിട്ട് കോൺഗ്രസിലേക്ക് ചേക്കേറുന്നത് ഒരേ കാലത്താണ്. ടിഡിപിയിൽ അർഹിക്കുന്ന പരിഗണന ലഭിക്കാത്തതായിരുന്നു ആ മാറ്റത്തിന് പിന്നിൽ.

2018 ൽ കോൺഗ്രസ് ടിക്കറ്റിൽ അതേ മണ്ഡലത്തിൽ സീതക്ക വീണ്ടും സ്ഥാനാർഥിയായി. ടിആർസ് 88 സീറ്റുകൾ നേടി വമ്പൻ വിജയം നേടിയ തിരഞ്ഞെടുപ്പായിരുന്നിട്ടും മുളുഗുവിൽ ടിആർഎസിന്റെ സിറ്റിങ് എംഎൽഎയ്ക്ക് എതിരെ 22,671 വോട്ടുകൾക്കായിരുന്നു സീതക്കയുടെ വിജയം. തെലങ്കാനയിലെ ഏറ്റവും വലിയ മണ്ഡലങ്ങളിൽ ഒന്നായ മുളുഗുവിൽ 2023 ൽ ഭൂരിപക്ഷം 33,700 ആയി ഉയർത്തിയാണ് സീതക്ക ജനകീയമുഖം അരക്കിട്ടുറപ്പിച്ചത്. തെലങ്കാനയുടെ മുഖ്യമന്ത്രി സ്ഥാനാർഥിയായി പരിഗണിക്കാവുന്ന ആളാണ് സീതക്ക എന്ന് തിരഞ്ഞെടുപ്പ് പ്രചാരണ സമയത്ത് രേവന്ത് റെഡ്ഡി പറഞ്ഞത് വലിയ ചർച്ചയായിരുന്നു. രേവന്തിനെ തള്ളി കോൺഗ്രസ് നേതാക്കൾതന്നെ രംഗത്തുവരികയും ചെയ്തു. പക്ഷേ, പ്രചാരണ സമയത്ത് സീതക്ക മാധ്യമപ്രവർത്തകരോട് പറഞ്ഞിരുന്നു, ‘‘കോൺഗ്രസ് അധികാരത്തിൽ വന്നാൽ ഞാൻ മന്ത്രിയാവും.’’

∙ ഇനി നിങ്ങൾക്കെന്നെ വിളിക്കാം, ഡോ.അനസൂയ

ഒസ്മാനിയ സർവകലാശാലയിൽ നിന്ന് പൊളിറ്റിക്കൽ സയൻസിൽ 51–ാം വയസ്സിൽ ഡോക്ടറേറ്റ് നേടി, പഠനത്തിന് പ്രായമൊരു തടസ്സമല്ല എന്ന മാതൃക കൂടി സീതക്ക കാട്ടിക്കൊടുത്തു. താൻ കൂടി ഉൾപ്പെടുന്ന ഗൊട്ടി കോയ ആദിവാസി വിഭാഗത്തിന്റെ സാമൂഹിക പിന്നാക്കവസ്ഥായിരുന്നു സീതക്കയുടെ ഗവേഷണ വിഷയം. സർക്കാരുകൾ പൂർണമായി അവഗണിച്ച, ഒരാനുകൂല്യവും ലഭിക്കാത്ത വിഭാഗമാണ് ഇവരെന്നും സാമൂഹിക പിന്നാക്കാവസ്ഥ സംബന്ധിച്ച പഠനം പുസ്തകമാക്കി സംസ്ഥാന സർക്കാരിനും പ്രസിഡന്റിനും സമർപ്പിക്കുമെന്നും സീതക്ക അന്ന് പറഞ്ഞിരുന്നു. 2012 മുതൽ ഗവേഷണം ഒരു മോഹമായിരുന്നെങ്കിലും എംഎൽഎ എന്ന തിരക്കുകൾ കാരണം നീണ്ടുപോകുകയായിരുന്നു.

‘‘കുട്ടിക്കാലത്ത് ഞാനൊരിക്കലും നക്സലൈറ്റാകുമെന്ന് കരുതിയതല്ല. നക്സലൈറ്റായിരിക്കുമ്പോള്‍ അഭിഭാഷകയാകുമെന്നും. അഭിഭാഷകയായിരുന്ന കാലത്ത് എംഎല്‍എയാകുമെന്നും സ്വപ്നവും ഉണ്ടായിരുന്നില്ല. പിന്നീട് പിഎച്ച്ഡി എടുക്കുമെന്നും കരുതിയതല്ല. പക്ഷേ, നിങ്ങള്‍ക്കിനിയെന്നെ ഡോക്ടര്‍ ദനസരി അനസൂയയെന്ന് ധൈര്യമായി വിളിക്കാം’’ എത്രയോ പേർക്ക് പ്രചോദനമാകാൻ, ചരിത്രത്തിലേക്ക് എഴുതിച്ചേർത്ത ആ ദിവസത്തിൽ സീതക്ക സമൂഹമാധ്യമത്തില്‍ കുറിച്ചതങ്ങനെയായിരുന്നു. ഒരിക്കൽ ആദിവാസികൾക്കു വേണ്ടി തോക്കെടുക്കുകയാണ് ചെയ്തതെങ്കിൽ പിന്നീട് പ്രശ്നങ്ങൾ പഠിച്ച് അവതരിപ്പിക്കുകയും പരിഹാരമുണ്ടാക്കുകയും ചെയ്ത ജനകീയ നേതാവിലേക്കുള്ള യാത്ര മുഴുവൻ കാച്ചിക്കുറുക്കിയ വാക്കുകൾ. ഒസ്മാനിയ സർവകലാശാലയ്ക്കു മുന്നിൽ നിന്ന് സീതക്കയ്ക്കൊപ്പം നാലു പൊലീസുകാർ പോസ് ചെയ്ത ചിത്രം അന്ന് ഏറെ ചർച്ചയാവുകയും ചെയ്തു.

∙ അന്ന് അവർ എന്റെ വിശപ്പകറ്റി, ഇന്ന് ഞാനും

കോവിഡ്‌കാലത്ത് രാജ്യമൊട്ടാകെ ലോക്ഡൗൺ പ്രഖ്യാപിച്ചപ്പോൾ ആദിവാസി ഊരുകളുടെ വിശപ്പകറ്റാൻ സീതക്ക 40 ദിവസത്തിലധികം തുടർച്ചയായി നടന്നു തീർത്തത് ആയിരത്തോളം കിലോമീറ്ററുകളാണ്. തെലങ്കാനയിലെ 42 ഡിഗ്രി പൊള്ളുന്ന ചൂടിൽ മണ്ഡലത്തിലെ 356 ആദിവാസി ഗ്രാമങ്ങളിലും കുടിലുകളിലും സീതക്കയുടെ നേതൃത്വത്തിൽ ഭക്ഷണവസ്തുക്കളെത്തിച്ചു. തലയിൽ തോർത്ത് കെട്ടി, സാരി മടക്കിക്കുത്തി വലിയ ചാക്ക് നിറയെ പലചരക്ക് വസ്തുക്കൾ തോളിലേറ്റി കാടും മലയും നടന്നു കയറുന്ന സീതക്കയുടെ ചിത്രങ്ങളും വിഡിയോകളും വലിയ ശ്രദ്ധ നേടിയിരുന്നു. ഗതാഗതം നിലച്ചതിനാൽ പലയിടത്തേക്കും ചെന്നെത്താൽ കാളവണ്ടികൾ മാത്രമായിരുന്നു ആശ്രയം.