മഴുകൊണ്ട് വെട്ടിയും കഴുത്തുഞെരിച്ചും മക്കളെ കൊല്ലുന്ന ‘ഫിലിസൈഡ്’: സുചനയുടേത് ‘സൈക്കോട്ടിക്’ കൊല?

സുചന സേത്. കോവിഡ് മഹാമാരിക്കാലത്ത് സ്വന്തം കമ്പനി തുടങ്ങി, ഏറ്റവും മിടുക്കരായ 100 വനിതകളുടെ പട്ടികയിൽ ഇടം പിടിച്ച ഡേറ്റ സയന്റിസ്റ്റ്. പക്ഷേ അടുത്തിടെ സുചന സേതിന്റെ പേര് രാജ്യത്തെ ഞെട്ടിച്ചത് ഏറ്റവും നിഷ്ഠൂരമായ ഒരു കൊലപാതകത്തിന്റെ പേരിലാണ്. ഗോവയിലെ ഹോട്ടലിൽ നാലു വയസ്സുകാരനായ സ്വന്തം മകനെ കൊല ചെയ്ത് മൃതദേഹം പെട്ടിയിലാക്കി രക്ഷപ്പെടാൻ ശ്രമിച്ച സുചനയെ ഹോട്ടൽ ജീവനക്കാർക്ക് തോന്നിയ സംശയത്തിന്റെ പേരിൽ പൊലീസ് പിന്തുടർന്ന് അറസ്റ്റ് ചെയ്യുകയായിരുന്നു. പിന്നാലെ അതിക്രൂരമായ കൊലയുടെ വിവരങ്ങൾ ലോകമറിഞ്ഞു. വിവാഹമോചിതയായിരുന്നു സുചന. മകനെ കാണാൻ സുചനയുടെ ഭർത്താവിന് കോടതി അനുമതി നൽകിയതിനു പിന്നാലെയായിരുന്നു ആ നാലു വയസ്സുകാരനെ കൊലപ്പെടുത്തിയത്. പിന്നാലെ സുചന ആത്മഹത്യയ്ക്ക് ശ്രമിച്ചെന്നും റിപ്പോർട്ടുകളുണ്ടായിരുന്നു. 

മക്കളെ കൊലപ്പെടുത്തി പിന്നാലെ ആത്മഹത്യ ചെയ്യുന്ന മാതാപിതാക്കളുടെ വാർത്തകൾ കേരളത്തിനും പുതുമയല്ലാതായി മാറുകയാണ്. മുൻപെങ്ങുമില്ലാത്ത വിധത്തിൽ ‘അലാമിങ് ട്രെൻഡ്’ ആയി ഇത്തരം കൊലപാതകങ്ങൾ മാറുന്നുണ്ടെന്ന് മനഃശാസ്ത്രവിദഗ്ധരും പറയുന്നു. സ്വയം ജീവനെടുക്കുന്നതിനൊപ്പം, ഈ ലോകത്തിന്റെ ഭംഗിയിലേക്ക് കൗതുകം നിറഞ്ഞ കണ്ണുകളും കുഞ്ഞുകാലുകളുമെടുത്തു വച്ചു തുടങ്ങിയ പിഞ്ചു കുഞ്ഞുങ്ങളെയും കൊല്ലുന്ന ക്രൂരത. എന്താണ് സംഭവിക്കുന്നതെന്നു പോലും മനസ്സിലാകാതെയാണ് ആ കുരുന്നുകൾ എന്നന്നേക്കുമായി കണ്ണുകളടയ്ക്കുന്നത്. നമ്മുടെ സമൂഹം ഇത്രയ്ക്ക് ക്രൂരമായോ? സ്വന്തം കുഞ്ഞുങ്ങളുടെ വരെ കൊലപാതകങ്ങളിലേക്ക് ഇത്തരക്കാരെ നയിക്കുന്ന ചേതോവികാരം എന്താകും? വിദഗ്ധർ പറയും അതിന്റെ ഉത്തരം.

∙ മറക്കാനാവില്ല ആ മുഖങ്ങൾ

കൊല്ലം പട്ടത്താനത്ത് ഒൻപതും നാലും വയസ്സുള്ള രണ്ട് മക്കളെ കൊലപ്പെടുത്തി അച്ഛൻ ജോസ് (41) ആത്മഹത്യ ചെയ്തത് 2024 ജനുവരി 12നാണ്. ഭാര്യയുമായുള്ള പ്രശ്നങ്ങളെത്തുടർന്നായിരുന്നു അത്. 2023 ഡിസംബർ ആദ്യമാണ് ആലപ്പുഴ തലവടിയിൽ മൂന്നു വയസ്സുകാരായ ഇരട്ടക്കുട്ടികളെ കൊലപ്പെടുത്തി അച്ഛനും അമ്മയും ആത്മഹത്യ ചെയ്തത്. ദിവസങ്ങൾക്കു ശേഷം കുടകിലെ റിസോർട്ടിൽ മകളെ കൊലപ്പെടുത്തി അച്ഛനും അമ്മയും ആത്മഹത്യ ചെയ്ത വാർത്തയെത്തി. ഡിസംബർ 21ന് മകളെ ശ്വാസം മുട്ടിച്ച് കൊലപ്പെടുത്തി കിണറ്റിലിട്ട അമ്മയുടെ വാർത്തയെത്തിയത് ചിറയിൻകീഴിൽ നിന്നാണ്. ഒരു മാസത്തിന്റെ മാത്രം ഇടവേളയിൽ, വലിയ ശ്രദ്ധ നേടിയ വാർത്തകളിൽ ചിലതു മാത്രമാണിവ.

2023 നവംബറിൽ കോട്ടയം മീനടത്ത് സംഭവിച്ചതും ഇതുപോലെ ദാരുണമായ കൊലപാതകമായിരുന്നു. നടക്കാൻ പോയ അച്ഛനെയും മകനെയും പിന്നീട് ആളൊഴിഞ്ഞ വീട്ടിലെ വിറകുപുരയിൽ തൂങ്ങി മരിച്ച നിലയിൽ കണ്ടെത്തുകയായിരുന്നു. മൂന്നാം ക്ലാസുകാരനായ മകൻ ശ്രീഹരിയെ കൊലപ്പെടുത്തിയതിനു ശേഷം അച്ഛൻ ബിനു മരിക്കുകയായിരുന്നു. മകനെ നന്നായി നോക്കാൻ കഴിഞ്ഞില്ലെന്നും മകളെ വളർത്തണമെന്നും കുറിപ്പ് എഴുതി വച്ച ശേഷമായിരുന്നു ആത്മഹത്യ. ഇത്തരത്തിൽ ശരാശരി മൂന്ന് വാർത്തകളെങ്കിലും ഒരു മാസം കേരളത്തിൽ മാത്രം റിപ്പോർട്ട് ചെയ്യുന്നുണ്ട്. ദേശീയതലത്തിലെ കണക്കുകൾ എടുത്താൽ സംഖ്യ ഇനിയും ഉയർന്നേക്കാം.

മാവേലിക്കരയിൽ ഏഴു വയസ്സുകാരിയായ മകൾ നക്ഷത്രയെ മഴു ഉപയോഗിച്ച് സ്വന്തം അച്ഛൻ വെട്ടിക്കൊലപ്പെടുത്തിയ വാർത്ത കേരളം ഞെട്ടലോടെയാണ് കേട്ടത്. ഭാര്യയുടെ മരണ ശേഷം മകളുമായി ഒറ്റയ്ക്കു കഴിയുകയായിരുന്നു പ്രതി ശ്രീമഹേഷ്. വീണ്ടുമൊരു വിവാഹം കഴിക്കുന്നതിന് മകൾ തടസ്സമാണ് എന്ന ഘട്ടത്തിലാണ് അതിക്രൂരമായി നക്ഷത്രയെ കൊന്നുകളഞ്ഞത്. സംഭവസ്ഥലത്തേക്ക് ആളുകൾ ഓടിക്കൂടിയതോടെ പ്രതിയെ പൊലീസ് അറസ്റ്റ് ചെയ്തു നീക്കി. ജയിലിൽ വച്ച് രണ്ടു തവണ ആത്മഹത്യയ്ക്ക് ശ്രമിച്ച് പരാജയപ്പെട്ട പ്രതി ഒടുവിൽ പൊലീസ് കസ്റ്റഡിയിൽ വച്ചു തന്നെ ട്രെയിനിൽനിന്ന് ചാടി മരിക്കുകയായിരുന്നു.

ക്രൂരതയുടെ ആഴംകൊണ്ട് കേരളത്തിന് മറക്കാനാവാത്ത കുഞ്ഞുമക്കളുടെ കൊലപാതകങ്ങൾ പലതുമുണ്ട്. 2021 മാർച്ച് 22 നാണ് കൊച്ചി മുട്ടാർപുഴയിൽ മുങ്ങിമരിച്ച നിലയിൽ വൈഗ എന്ന പത്തുവയസ്സുകാരിയുടെ മൃതദേഹം കണ്ടെത്തുന്നത്. ശ്വാസം മുട്ടിച്ച് കൊലപ്പെടുത്തിയ ശേഷം മൃതദേഹം ഉപേക്ഷിക്കുകയായിരുന്നുവെന്ന് പരിശോധനയിൽ കണ്ടെത്തി. ഒളിവിൽ പോയ കുട്ടിയുടെ പിതാവ് സനുമോഹനെ ഒരു മാസം നടത്തിയ അന്വേഷണത്തിനു ശേഷം കർണാടകയിലെ കാർവാറിൽനിന്ന് പൊലീസ് പിടികൂടി. വളരെയധികം സാമ്പത്തിക ബാധ്യതകളുണ്ടായിരുന്ന ഇയാൾ മകൾ ജീവിച്ചിരുന്നാൽ ബാധ്യതയാവുമെന്ന് കരുതിയാണ് കൊലപ്പെടുത്തിയതെന്നാണ് കുറ്റപത്രത്തിൽ പറയുന്നത്.

∙ എന്തിനാണ് ഈ മക്കളെ കൊലപ്പെടുത്തുന്നത്?

ഓരോ തവണ ഇത്തരം വാർത്തകൾ വരുമ്പോഴും ആവർത്തിച്ചു കേൾക്കുന്ന ഒരു ചോദ്യമുണ്ട്, ‘‘ആത്മഹത്യ ചെയ്യാൻ തീരുമാനിച്ചവർ എന്തിനാണ് ഈ കുഞ്ഞുങ്ങളെ കൊല്ലുന്നത്?’’ ഇതിന്റെ ഉത്തരം അത്ര നിസ്സാരമല്ല. കുഞ്ഞുങ്ങളെ കൊലപ്പെടുത്തുക എന്നത്, പല കേസുകളിലും ഒരു നിമിഷത്തെ വൈകാരികതയിൽ എടുക്കുന്ന തീരുമാനവുമല്ല. എന്താണ് ഇത്തരം കൊലപാതകങ്ങളിലേക്ക് നയിക്കുന്നതിന് എന്നതിന് മനഃശാസ്ത്ര പഠനങ്ങൾ പ്രധാനമായും പറയുന്നത് അഞ്ച് കാരണങ്ങളാണ്, അഥവാ അഞ്ച് തരത്തിൽ ഇത്തരം ആത്മഹത്യകളെ തിരിക്കാം.

1. കൊലപാതകം നന്മയാണെന്ന് കരുതുന്നവർ

ചിറയിൻകീഴ് സ്വദേശിയായ നാൽപത്തിയെട്ടുകാരി മിനിയുടെ മകൾ അനുഷ്ക (8) ശാരീരിക വെല്ലുവിളി നേരിടുന്ന കുട്ടിയായിരുന്നു. ഏക മകൾ. ഭർത്താവ് രാജനും മിനിയും മകളും അടങ്ങുന്ന കുടുംബം. ഗൾഫിൽ ബിസിനസ് ചെയ്തിരുന്ന രാജൻ 2021ൽ നാട്ടിലെത്തി. പിന്നീട് തിരികെ പോയില്ല. ആറ് മാസം മുൻപ് അർബുദം സ്ഥിരീകരിക്കുകയും ചെയ്തു. ചികിത്സയ്ക്കായി രാജൻ ആശുപത്രിയിൽ പോയ സമയത്താണ് മിനി മകൾ അനുഷ്കയെ ശ്വാസംമുട്ടിച്ച് കൊലപ്പെടുത്തുന്നത്. 2023 ഡിസംബർ 19 നായിരുന്നു ആ കൊലപാതകം നടന്നത്. വീട്ടിൽനിന്ന് മിനി എവിടേക്കോ പോകുകയും ചെയ്തു.

കാണാതായ മിനിക്കും മകൾക്കുമായി തിരച്ചിൽ നടക്കുമ്പോഴാണ് കൃത്യം നടന്ന് രണ്ടു ദിവസത്തിനു പൊലീസ് സ്റ്റേഷനിലെത്തി മിനി കീഴടങ്ങുന്നത്. അനുഷ്ക കൊല്ലപ്പെട്ടുവെന്ന് പുറംലോകം അറിയുന്നത് അപ്പോഴാണ്. കുടുംബപ്രശ്നങ്ങളെ തുടർന്നാണ് കൊലപാതകമെന്നായിരുന്നു മൊഴി. കുടുംബത്തിന്റെ അവസ്ഥ പരിതാപകരമായാൽ ഭിന്നശേഷിക്കാരിയായ മകളുടെ ഭാവി എന്താകും എന്ന ആശങ്കയാവാം ഇവിടെ കൊലപാതകത്തിലേക്ക് നയിച്ചിട്ടുണ്ടാവുക. മക്കളിലൊരാൾക്ക് ജനിതകരോഗം സ്ഥിരീകരിച്ചതിനെ തുടർന്നും നാലംഗ കുടുംബം രണ്ട് മക്കളെയും കൊലപ്പെടുത്തി കേരളത്തിൽ ആത്മഹത്യ ചെയ്തിരുന്നു. രണ്ടാമത്തെ കുട്ടിക്കും രോഗം വരാൻ സാധ്യതയുണ്ട് എന്ന് ഡോക്ടർ പറഞ്ഞതായിരുന്നു കാരണം. 

ഇത്തരം കൊലപാതകങ്ങളെ ‘ആൽട്രൂയിസ്റ്റിക് ഗ്രൂപ്പ്’ എന്നാണ് മനഃശാസ്ത്രജ്ഞർ വിശേഷിപ്പിക്കുന്നത്. കുട്ടികളെ കൊലപ്പെടുത്തുന്നതിലൂടെ കൊലപാതകികളായ മാതാപിതാക്കൾ കരുതുന്നത് അവർ അനുഭവിക്കുന്ന ബുദ്ധിമുട്ടുകൾക്ക് അറുതി വരുത്തി എന്നാണ്. ഈ ‘ബുദ്ധിമുട്ടുകൾ’ യഥാർഥത്തിൽ ഉള്ളതാവണം എന്നുമില്ല. ‘രോഗം വരാനിടയുണ്ട്, വന്നാൽ പ്രതിസന്ധിയാവില്ലേ’ എന്ന തോന്നൽ പോലും ഇത്തരം കൊലപാതകങ്ങളിലേക്ക് നയിക്കാം. ‘കുട്ടികളുടെ നന്മയ്ക്ക്’ എന്ന പേരിൽ നടക്കുന്ന ഇത്തരം കൊലപാതകങ്ങളിൽ മിക്കതും ഇരയാവുന്നത് ഭിന്നശേഷിക്കാരായ കുട്ടികളാണ് എന്നതും സങ്കടകരമായ യാഥാർഥ്യമാണ്. 

ജാതിയോ മതമോ മാറി പ്രണയിക്കുന്നതിന്റെ പേരിൽ നടക്കുന്ന ദുരഭിമാനക്കൊലകളെയും ഈ കൂട്ടത്തിൽ പെടുത്താവുന്നതാണ്. ഇതരമതത്തിൽപ്പെട്ട ആൺകുട്ടിയുമായുള്ള സൗഹൃദത്തിന്റെ പേരിൽ മകളെ ബലമായി വിഷം കുടിപ്പിച്ച് കൊലപ്പെടുത്തിയ വാർത്ത കേരളത്തെ നടുക്കിയിട്ട് മാസങ്ങളാവുന്നതേയുള്ളൂ. ഒൻപതാം ക്ലാസുകാരിയായ പെൺകുട്ടി ദിവസങ്ങളോളം ആശുപത്രിയിൽ കഴിഞ്ഞശേഷമാണ് മരണത്തിന് കീഴടങ്ങിയത്. ജാതി മാറിയുള്ള പ്രണയത്തിന്റെ പേരിൽ മകളുമായി അച്ഛൻ പുഴയിൽച്ചാടി ആത്മഹത്യ ചെയ്തതും കേരളത്തിലാണ്. ഇവിടെയെല്ലാം ജീവിക്കാൻ അനുവദിക്കുന്നതിലും നല്ലത് മക്കളെ കൊന്നുകളയുന്നതാണ് എന്ന ചിന്തയാണ് മുന്നിൽനിൽക്കുന്നത്.

2. മാനസിക നില തകരാറിലായതുമൂലം നടക്കുന്ന കൊലകൾ

‘യുക്തിക്കു നിരക്കുന്ന’ ഒരു കാരണവും ഇത്തരം കൊലപാതകങ്ങളിൽ ഉണ്ടാവില്ല. മാതാപിതാക്കളുടെ മാനസിക പ്രശ്നങ്ങൾ, ഡിപ്രഷൻ എന്നിവയൊക്കെയാണ് ക്രൂരമായ കൊലപാതകങ്ങളിലേക്കു നയിക്കുന്നത്. ‘ഫിലിസൈഡ്’ അഥവാ മാതാപിതാക്കൾ തന്നെ മക്കളെ കൊന്നു കളയുന്ന കേസുകളിൽ ഭൂരിഭാഗത്തിലും വില്ലൻ തിരിച്ചറിയപ്പെടാതെ പോകുന്ന മാനസിക പ്രശ്നങ്ങൾ തന്നെയാവും. കണക്കുകൾ ശ്രദ്ധിച്ചാൽ തീരെച്ചെറിയ കുട്ടികളുടെ കൊലപാതകങ്ങളിൽ കൂടുതലും പ്രതിസ്ഥാനത്ത് വരുന്നത് അമ്മമാരാണെന്ന് മനസ്സിലാവും.