വരവ് യൂറോപ്പിൽനിന്ന്! ബിജെപിയുടെ ഉറക്കം കെടുത്തി 12 ആവശ്യങ്ങൾ; ‘ദില്ലി ചലോ’യിൽ എഎപിയേയും കുരുക്കി കേന്ദ്രം

അന്നുണ്ടായ ജനപിന്തുണയും 2020–21 കാലത്തെ സമരത്തിന്റെ പാഠങ്ങളും കാരണം ‘ദില്ലി ചലോ’ മാർച്ചിനു മുൻപുതന്നെ ഡൽഹിയിലും ഹരിയാനയിലും പൊലീസ് പ്രതിരോധം തീർത്തിരുന്നു. റോഡിൽ ബാരിക്കേഡുകൾ കോൺക്രീറ്റ് ചെയ്തു സ്ഥാപിച്ചു. മുള്ളുവേലികളും ഇരുമ്പുമതിലുകളും മൂന്നും നാലും നിര നിരന്നു. വിവാദ കർഷക നിയമങ്ങൾ പിൻവലിക്കണമെന്ന ആവശ്യവുമായി 2020 നവംബർ മുതൽ 2021 ഡിസംബർ വരെ നടന്ന സമരത്തിന്റെ തുടർച്ചയാണ് ഇപ്പോൾ ആരംഭിച്ചിരിക്കുന്ന പ്രക്ഷോഭമെന്നു കർഷക സംഘടനാ നേതാക്കൾ പറയുന്നു. അന്ന് ഉയർത്തിയിരുന്ന താങ്ങുവില വർധന ഉൾപ്പെടെയുള്ള ആവശ്യങ്ങൾ നടപ്പാക്കാതെ വന്നതോടെയാണു കർഷകർക്കു വീണ്ടും തെരുവിലേക്കിറങ്ങേണ്ടി വന്നത്. അതേസമയം 2020–21 കാലഘട്ടത്തിൽ നടന്ന സമരവുമായി പല വ്യത്യാസങ്ങളും ഇപ്പോഴത്തെ സമരത്തിനുണ്ട്.

∙ സമരത്തിനു പിന്നിൽ...

150 കർഷക സംഘടനകൾ അണിനിരക്കുന്ന സംയുക്ത കിസാൻ മോർച്ച (രാഷ്ട്രീയേതരം) എന്ന സംഘടനയും 250ലേറെ കർഷക യൂണിയനുകൾ ഉൾപ്പെടുന്ന കിസാൻ മസ്ദൂർ മോർച്ചയും (കെഎംഎം) ഒരുമിച്ചാണ് ഇക്കുറി സമരരംഗത്തുള്ളത്. ഫലത്തിൽ ചെറുതും വലുതുമായ 400ലേറെ സംഘടനകൾ സമരത്തിനുണ്ട്. പഞ്ചാബിൽനിന്നാണ് സമരത്തിന്റെ ഏകോപനം. 2020–21 കാലത്തെ സമരത്തിനു നേതൃത്വം നൽകിയിരുന്ന യഥാർഥ സംയുക്ത കിസാൻ മോർച്ച (എസ്കെഎം) 2022 ജൂലൈയിൽ പിളർന്നിരുന്നു. 

രാഷ്ട്രീയമില്ലാത്ത എസ്കെഎമ്മാണ് ഇപ്പോൾ സമരരംഗത്തുള്ളത്. പഞ്ചാബ് സിദ്ധുപുരിലെ കർഷക യൂണിയൻ ഭാരതീയ കിസാൻ യൂണിയൻ (ബികെയു) നേതാവ് ജഗ്ജിത് സിങ് ദല്ലേവാളാണ് ഇപ്പോൾ സംഘത്തിലെ പ്രധാനി. പഞ്ചാബിലെ കിസാൻ മസ്ദൂർ സംഘർഷ് കമ്മിറ്റി (കെഎംഎസ്‌സി) കൺവീനർ സർവാൻ സിങ് പന്ധേറാണു കെഎംഎമ്മിന്റെ നേതാവ്. കഴിഞ്ഞ കർഷകസമരത്തിൽ മുൻനിരയിലുണ്ടായിരുന്ന സംയുക്ത കിസാൻ മോർച്ച ഇക്കുറി സമരരംഗത്തില്ല. എന്നാൽ സമരക്കാരുടെ ആവശ്യങ്ങളോട് ഇവരും പിന്തുണ അറിയിച്ചിട്ടുണ്ട്. 

∙  ബ്രിട്ടിഷ്‌കാല നിയമങ്ങൾ ഉപയോഗിച്ച് കേന്ദ്ര പ്രതിരോധം

സമരത്തിന്റെ പശ്ചാത്തലത്തിൽ ഹരിയാന സർക്കാർ സംസ്ഥാനത്തെ 7 ജില്ലകളിൽ ഇന്റർനെറ്റ് സംവിധാനം നിരോധിച്ചിരുന്നു. കേന്ദ്രസർക്കാരും ഒരു പടി കടന്ന് ഇടപെട്ടു. പഞ്ചാബിലെ ഏഴു ജില്ലകളിലെ–പട്യാല, എസ്എഎസ് നഗർ, ഭട്ടിൻഡ, ശ്രീമുക്തസാർ സാഹിബ്, മൻസ, സംഗ്രൂർ, ഫത്തേബാഗ് സാഗിബ്– 20 പൊലീസ് സ്റ്റേഷൻ പരിധിയിൽ 6 ദിവസത്തേക്ക് ഇന്റർനെറ്റ് നിരോധിച്ചത് കേന്ദ്രസർക്കാരാണ്. ഓർക്കണം ക്രമസമാധാനം സംസ്ഥാന സർക്കാരിന്റെ വിഷയമാണ്.

പഞ്ചാബ് ഭരിക്കുന്നത് ആം ആദ്മി പാർട്ടിയും. കർഷകർക്ക് അനുകൂലമായി നിൽക്കുന്ന സംസ്ഥാന സർക്കാർ ഇന്റർനെറ്റ് നിരോധിക്കില്ലെന്ന് വ്യക്തമായി അറിയാമായിരുന്ന കേന്ദ്ര ആഭ്യന്തര വകുപ്പ് 1885ലെ ഇന്ത്യൻ ടെലിഗ്രാഫ് നിയമത്തിലെ 2017ൽ കൊണ്ടുവന്ന ഭേദഗതി പ്രയോഗിച്ചു. ബിജെപി സർക്കാർ ആദ്യമായിട്ടാണു ഡൽഹിക്കു പുറത്ത് ഈ നിയമം പ്രയോഗിക്കുന്നതെന്നു ബന്ധപ്പെട്ടവർ പറയുന്നു. കേന്ദ്രം ഇത്തരമൊരു ഇടപെടൽ നടത്തുമ്പോൾ എതിർപ്പുയർത്താൻ സംസ്ഥാനത്തിനും സാധിക്കില്ല. 

ഇനി അൽപപം ഡ്രോൺ വിശേഷം കൂടി പറയാം. കലാപസമാന സാഹചര്യങ്ങളും അക്രമാന്തരീക്ഷവും നേരിടാൻ ഡ്രോണുകളിൽനിന്ന് ഉപയോഗിക്കാവുന്ന കണ്ണീർ വാതക ഷെല്ലുകൾ അതിർത്തി രക്ഷാസേനയുടെ (ബിഎസ്എഫ്) ടിയർ സ്മോക്ക് യൂണിറ്റ്( ടിഎസ്‌യു) 2022ൽ തയാറാക്കിയിരുന്നു. എന്നാൽ ഇത് ഒരു സംസ്ഥാന പൊലീസ് സേനകൾക്കും ഇതുവരെ കൈമാറിയിട്ടില്ലെന്നാണ് ഔദ്യോഗിക വിശദീകരണം. അതേസമയം ഹരിയാനയിൽ ഡ്രോണുകളിൽനിന്ന് പ്രയോഗിച്ച കണ്ണീർ വാതക ഷെല്ലുകൾ മധ്യപ്രദേശിലെ തേഖൻപുരിലെ ടിഎസ്‌യു വിഭാഗം നിർമിച്ചതാണ്. 

സമരക്കാർക്ക് ഇപ്പോഴും പഞ്ചാബ്–ഹരിയാന അതിർത്തി കടക്കാൻ സാധിച്ചിട്ടില്ല. ഡൽഹി അതിർത്തിയിലാകട്ടെ പൊലീസ് ഒരുക്കിയിരിക്കുന്നത് അതിശക്തമായ പ്രതിരോധവും. ഈ ബാരിക്കേഡുകളെ മറികടന്നു കർഷകർ ഡൽഹിയിൽ എത്തുമോയെന്നതാണ് ഇനി കാണേണ്ടത്. കർഷകർ ഡൽഹിയിലെത്തിയാലും അതു മുൻപു നടന്നതു പോലുള്ള സമരമാകില്ലെന്നും തീർച്ച.