? വാക്സീൻ എടുത്തവർക്കും കോവിഡ്  വരുന്നുണ്ടല്ലോ. ഇനിയും വാക്സീൻ എടുക്കണോ. 

∙  എന്താണു വാക്സീന്റെ ധർമം, എങ്ങനെയാണു പ്രവർത്തനം എന്നു മനസ്സിലാക്കാം. വാക്സീൻ രണ്ടു തലത്തിലുള്ള പ്രതിരോധമാണ്. ഒന്ന് അണുബാധ (infection) വരാതെ നോക്കുക, രണ്ട് അണുബാധ വരുന്നവരെ തീവ്ര രോഗാവസ്ഥയിലേക്കു പോകാതെ നോക്കുക. വാക്സീൻ എടുത്ത് ആറു മാസമൊക്കെ എത്തുമ്പോഴേക്കും അണുബാധ വരാതെ നോക്കുന്ന ആന്റിബോഡികൾ ശരീരത്തിൽ തീരെ ഇല്ലാതാകുന്ന അവസ്ഥയുണ്ട്. ഇത്തരം immune contraction  സ്വാഭാവികമാണ്. എന്നാൽ തീവ്ര രോഗാവസ്ഥയ്ക്ക് എതിരായ സംരക്ഷണത്തിൽ കുറവൊന്നും സംഭവിക്കുന്നില്ല. ദീർഘായുസ്സുള്ള ഓർമ കോശങ്ങൾ (immune memory cells) മജ്ജയിൽ അടക്കം ശരീരത്തിനുള്ളിൽ ഉള്ളതാണ് ഇവിടെ നമുക്കു രക്ഷയാകുന്നത്. അപ്പോൾ അണുബാധയുണ്ടായാൽ ഉടനടി പ്രതിരോധം ശരീരത്തിനുള്ളിലുണ്ടാകും. ഇതു രോഗം തീവ്രമാകാതെയും ആന്തരാവയവങ്ങൾക്കു കേടുപാടുകൾ സംഭവിക്കാതെയും കാക്കുന്നു. 

? വാക്സീൻകൊണ്ട് പ്രയോജനമില്ലെന്ന പ്രചാരണം നടക്കുന്നുണ്ടോ. 

∙ ഉണ്ട്. വാക്സീൻ എടുത്തവർക്കും കോവിഡ് വരുന്നുണ്ട്. ഇത് വാക്സീൻ വിരുദ്ധ പ്രചാരണത്തിന് ഉപയോഗപ്പെടുത്തുന്നവരുമുണ്ട്. ഈ ചിന്ത തെറ്റാണ്. എന്നാൽ നമുക്ക് പ്രത്യക്ഷത്തിൽ ദൃശ്യമാകുന്നത് ഇൻഫെക്‌ഷൻ വരുന്നത് ആണെന്നതിനാൽ പലരും ‘വാക്സീൻ കൊണ്ടു പ്രയോജനമില്ല’ എന്ന പ്രചാരണത്തിലേക്ക് എത്തുന്നു. കോവിഡ് ബാധിച്ച സമപ്രായക്കാരായ രണ്ടു പേരെ എടുക്കുകയാണെങ്കിൽ വാക്സീൻ എടുത്തയാളേക്കാൾ വളരെയധികം അപകടം എടുക്കാത്തയാൾക്കുണ്ടാകുന്നെന്ന് ആശുപത്രി അനുഭവങ്ങൾ വ്യക്തമാക്കുന്നു. പുകവലിക്കുന്ന എല്ലാവർക്കും കാൻസർ വരുന്നില്ല, എന്നാൽ അവരിൽ കാൻസർ സാധ്യത കൂടുതലാണ് എന്നു പറയുന്നതു പോലെയാണിത്. വാക്സീൻ എടുക്കാത്ത എല്ലാവരിലും ഗുരുതര രോഗം വരുമെന്ന് പറയുന്നില്ല, എന്നാൽ സാധ്യത കൂടുതലാണ് എന്നു മാത്രം. 

? പുതിയ കോവിഡ് സംബന്ധിച്ച് എന്തൊക്കെയാണ് ശ്രദ്ധിക്കേണ്ടത്. 

∙ പ്രായമായവർ, മറ്റു ഗുരുതര രോഗ ബാധിതർ എന്നിവരുടെ കാര്യത്തിൽ കുടുതൽ ശ്രദ്ധ വേണം. ഇവർക്കു കോവിഡ് വന്നാൽ ഗുരുതരമാകാനുള്ള സാധ്യത നിലനിൽക്കുന്നു. ഒമിക്രോൺ അപകടമുണ്ടാക്കില്ല, അതുകൊണ്ടു ശ്രദ്ധ വേണ്ട എന്നു കരുതരുത്. അണുബാധ ഒന്നിലേറെ വന്നവരും കൂടുതൽ ശ്രദ്ധ പുലർത്തണം. വീണ്ടും അണുബാധ വരുന്നത് എങ്ങനെ സ്വാധീനിക്കുന്നു (impact of repeated infection) എന്നതു സംബന്ധിച്ചു വിഖ്യാതമായ പ്രബന്ധം ‘നേച്ചർ’ ജേർണലിൽ പ്രസിദ്ധീകരിച്ചത് വാഷിങ്ടൺ യൂണിവേഴ്സിറ്റിയിലെ സിയാദ് അൽ അലിയാണ്. 

യുഎസ് സേനയിൽനിന്നു വിരമിച്ചവരുടെ ക്ഷേമം നോക്കുന്ന വെറ്ററൻസ് അഫയേഴ്സിന്റെ ഡേറ്റ ഉപയോഗിച്ചാണ് ഇവർ പഠനം നടത്തിയത്. കോവിഡ് ഒന്നിലധികം തവണ വരുന്നവരിൽ കൂടുതൽ ആരോഗ്യ പ്രശ്നങ്ങളുണ്ടാകുന്നെന്നാണ് പഠനം വ്യക്തമാക്കുന്നത്. ഇതിൽ പ്രായം ഒരു ഘടകമല്ല. ചെറുപ്പക്കാർക്ക് അടക്കം ഈ ‘റിസ്ക് ഫാക്ടർ’ ഉണ്ട്. ഒരിക്കൽ വരുന്നതു പോലെയല്ല, മൂന്നാമതോ നാലാമതോ കോവിഡ് വരുന്നത്. പല തവണ വരുന്നവരിൽ വിവിധ അനുബന്ധ രോഗങ്ങൾക്കും സാധ്യത ഏറെയാണ്. 

? അടുത്ത കാലത്തായി മാസ്ക് ഉപയോഗം കുറഞ്ഞിട്ടുണ്ടോ. 

∙ മാസ്ക് ഉപയോഗിക്കുന്നത് അടക്കമുള്ള പ്രതിരോധ മാർഗങ്ങൾ കൈവിടാതിരിക്കുക, പ്രത്യേകിച്ചും ആശുപത്രികളിൽ ചെല്ലുന്നവർ. പനിയും ജലദോഷവും ഉള്ളവർ മറ്റുള്ളവരുമായി തൽക്കാലം സമ്പർക്കം ഒഴിവാക്കുക. പുതിയ വകഭേദത്തിന്റെ വ്യാപനം കെട്ടടങ്ങുന്നതു വരെ ശ്രദ്ധ പുലർത്തുന്നതു സമൂഹത്തിനു ഗുണം ചെയ്യും. സാഹസികത കാട്ടി അണുബാധ വീണ്ടും വീണ്ടും ഏറ്റുവാങ്ങാതെ സ്വയം നിയന്ത്രണവും ശ്രദ്ധയും മുൻകരുതലും വേണം. ഭയമല്ല ജാഗ്രതയാണു വേണ്ടതെന്ന് കോവിഡ് വ്യാപനം തുടങ്ങിയ കാലം മുതൽ കേൾക്കുന്നതാണ്. അതുതന്നെയാണ് ശരിയും. 

? ഏപ്പോഴും പറയുന്നു; കൊറോണ വൈറസ് വെറുമൊരു ജലദോഷ വൈറസ് അല്ല.

∙ കോവിഡ് വ്യാപിച്ച കാലം മുതൽ പറയുന്ന കാര്യമാണ് കൊറോണ വൈറസ് (SARS- CoV-2) വെറുമൊരു ജലദോഷ വൈറസ് അല്ല എന്ന കാര്യം. പലരും ഇപ്പോഴും വെറുമൊരു ജലദോഷം പോലെയാണു കോവിഡിനെ കാണുന്നത്. നമ്മുടെ ശ്വാസകോശത്തിൽ രക്തക്കുഴലുകളിൽ അടക്കം നേരിട്ടു വ്യാപിക്കാൻ ശേഷിയുള്ള വൈറസാണിത്. ആ മുൻകരുതൽ എപ്പോഴും വേണം. കോവിഡ് വരാതെ നോക്കുക എന്നതു തന്നെയാണ് ഏറ്റവും വലിയ പ്രതിരോധം.

English Summary: Covid Surge Again in India: What We Know So Far? Interview with Dr. Rajeev Jayadevan