ഗൈഡിനെ ലഭിക്കാനുള്ള പ്രയാസം, ക്യാംപസിനകത്തും പുറത്തുമുള്ള തൊട്ടുകൂടായ്മ, സംവരണത്തിലൂടെ വന്ന മെറിറ്റില്ലാത്തവരെന്ന ആക്ഷേപം, പഠനവുമായി ബന്ധപ്പെട്ട വിവിധ അവസരങ്ങൾ, ഇന്റേണൽ അസസ്മെന്റിലെ വിവേചനം... അങ്ങനെ ഒരു ദലിത് വിദ്യാർഥി ക്യാംപസുകളിൽ നേരിടുന്ന വിവേചനങ്ങൾ പലതാണ്. ഇതിന് ഐഐടിയെന്നോ സംസ്ഥാന സർവകലാശാലകളെന്നോ വ്യത്യാസമില്ല.  

 

ഐഐടി ബോംബെയിൽ ദലിത് വിദ്യാർഥി ജീവനൊടുക്കിയ സംഭവത്തിൽ സഹവിദ്യാർഥിയെ മുംബൈ പൊലീസിന്റെ പ്രത്യേക അന്വേഷണസംഘം അറസ്റ്റ് ചെയ്തത് ഈയിടെയാണ്.  അഹമ്മദാബാദ് സ്വദേശിയായ ഒന്നാംവർഷ ബി ടെക് വിദ്യാർഥി ദർശൻ സോളങ്കിയെ ഫെബ്രുവരി 12ന് ആണു ഹോസ്റ്റൽ കെട്ടിടത്തിൽനിന്നു വീണുമരിച്ച നിലയിൽ കണ്ടെത്തിയത്. ഹോസ്റ്റലിൽ സോളങ്കിയുടെ അതേനിലയിൽ താമസിച്ചിരുന്ന അർമാൻ ഖത്രി എന്ന വിദ്യാർഥിയെയാണ് ആത്മഹത്യാപ്രേരണക്കുറ്റം ചുമത്തി അറസ്റ്റ് െചയ്തിരിക്കുന്നത്.

 

ജാതി പീഡനത്തെത്തുടർന്നാണ് ദർശൻ സോളങ്കി ജീവനൊടുക്കിയതെന്ന് കുടുംബാംഗങ്ങളും ഒരുവിഭാഗം സഹപാഠികളും തുടക്കംമുതൽ ആരോപിച്ചിരുന്നെങ്കിലും ഐഐടി അധികൃതരും സർക്കാരും ഇൗ വാദം തള്ളിയിരുന്നു. എന്നാൽ, പ്രതിഷേധം കനത്തതോടെ പ്രത്യേക അന്വേഷണസംഘത്തെ നിയോഗിക്കാൻ നിർബന്ധിതമായി. അവർ ഹോസ്റ്റലിൽനിന്നു കണ്ടെത്തിയ ആത്മഹത്യക്കുറിപ്പിലാണു സഹവിദ്യാർഥിക്കെതിരെ ആരോപണം ഉണ്ടായിരുന്നത്. 

 

രണ്ടു വർഷം മുൻപ് കേരളത്തിന്റെ സ്വന്തം എംജി സർവകലാശാലയിൽനിന്നു കേട്ട വാർത്തയും മറ്റൊന്നായിരുന്നില്ല. ജാതി വിവേചനം ആരോപിച്ചു നൽകിയ പരാതിയിൽ നടപടിയില്ലാത്തതിനെത്തുടർന്നു സർവകലാശാലയിലെ നാനോ സയൻസ് ഗവേഷണ കേന്ദ്രത്തിലെ ഗവേഷക ദീപാ പി.മോഹൻ നടത്തിയ നിരാഹാരസമരം കേരളത്തിന്റെയാകെ ശ്രദ്ധപിടിച്ചുപറ്റി. ആരോപണ വിധേയനായ അധ്യാപകൻ ഡോ. നന്ദകുമാർ കളരിക്കലിനെ നാനോ സയൻസ് ആൻഡ് നാനോ ടെക്നോളജി കേന്ദ്രം ഡയറക്ടർ സ്ഥാനത്തുനിന്നു മാറ്റാൻ സർവകലാശാല നിർബന്ധിതരായി. 2014 മാർച്ചിലാണ് ദീപ നാനോ സയൻസ് ഗവേഷണ കേന്ദ്രത്തിൽ ഗവേഷണത്തിനു ചേർന്നത്. ജാതിവിവേചനവും പഠനത്തിനുള്ള സൗകര്യങ്ങളുടെ നിഷേധവും ചൂണ്ടിക്കാട്ടി  201 സർവകലാശാലയ്ക്ക് ആദ്യം പരാതി നൽകി. നടപടിയെടുത്തത് 2021ലും! അതും ദീപ നിരാഹാരം കിടക്കുകയും അതു വാർത്താപ്രാധാന്യം നേടുകയും ചെയ്തപ്പോൾ മാത്രം. 

 

∙ അധ്യാപകർക്കും രക്ഷയില്ല

 

വിദ്യാർഥികൾ മാത്രമല്ല, ജാതിവിവേചനം നേരിടുന്നത്. ഐഐടി മദ്രാസിലെ ഹ്യൂമാനിറ്റീസ് ആൻഡ് സോഷ്യൽ സയൻസ് വിഭാഗം അധ്യാപകനായിരുന്ന മലയാളിയായ ഡോ.വിപിൻ പി.വീട്ടിലിന്റെ അനുഭവം രാജ്യത്തിന്റെയാകെ ശ്രദ്ധനേടിയിരുന്നു. യുഎസിലെ പഠനത്തിനു ശേഷം 2019ൽ ഐഐടിയിൽ ചേർന്ന വിപിൻ ജാതിവിവേചനം മൂലം ജോലി വിടുകയാണെന്നു പ്രഖ്യാപിച്ചത് ഏറെ വാർത്താപ്രാധാന്യം നേടി. ബ്രാഹ്മണരല്ലാത്തവരെല്ലാം ഐഐടികളിൽ രണ്ടാതരം പൗരന്മാരാണെന്ന് ഉദാഹരണ സഹിതം അദ്ദേഹം തുറന്നടിച്ചു. 

 

ഈ ‘രണ്ടാംകിട പൗരത്വം’ ഉൾക്കൊണ്ടു വിധേയപ്പെട്ടു ജീവിച്ചാൽ പ്രശ്നമില്ലെന്നും എതിർത്താൽ വലിയ ഭവിഷ്യത്തു നേരിടേണ്ടി വരുമെന്നും വിപിൻ അന്നു പറയുകയുണ്ടായി. സംവരണം വഴി വരുന്ന കുട്ടികൾക്കു മെറിറ്റില്ലെന്ന സവർണവാദത്തെ ചോദ്യം ചെയ്ത അദ്ദേഹം ഏതു പഠനത്തിന്റെ അടിസ്ഥാനത്തിൽ, എന്തു തെളിവുകളുടെ പിൻബലത്തോടെയാണ് ഈ വാദമെന്നു രാജ്യത്തെ ഐഐടികളിലെ അധ്യാപകർക്കയച്ച തുറന്ന കത്തിൽ ചോദിച്ചു. ഇന്നേവരെ ഈ ചോദ്യങ്ങൾക്കുത്തരം നൽകാനോ ദലിത്, പിന്നാക്ക വിദ്യാർഥികളുടെ പഠനനിലവാരത്തെപ്പറ്റി ശാസ്ത്രീയമായ പഠനം നടത്താനോ ആരും മുന്നോട്ടുവന്നിട്ടില്ലെന്ന് അദ്ദേഹം പറയുന്നു.   

 

∙ ഇംഗ്ലിഷ് മതിലിൽത്തട്ടി...

 

ഇംഗ്ലിഷിലുള്ള പിന്നാക്കാവസ്ഥ കുട്ടികളിൽ വലിയ സമ്മർദത്തിനു കാരണമാകുന്നതായി പേരു വെളിപ്പെടുത്താത്ത ഒരു ഐഐടി അധ്യാപകൻ പറയുന്നു. ‘‘ആദ്യ ക്ലാസ് മുതലേ പിന്നിലായിപ്പോകുന്നതായി തോന്നുന്ന കാര്യം കുട്ടികൾ തുറന്നു പറയാറുണ്ട്. അക്കാദമികമായി മാത്രമല്ല, ക്യാംപസിലെ മറ്റു കാര്യങ്ങളിലും ഇതിന്റെ പേരിൽ വേർതിരിവുള്ളതായി ഫീൽ ചെയ്യുന്നതായും അവർ പറയുന്നു. ഐഐടിയുടെ പ്രവേശനപരീക്ഷ (ജെഇഇ പോലുള്ളവ) ഹിന്ദിയിൽ എഴുതാം. ഐഐടിയിൽ പഠനമാധ്യമം ഇംഗ്ലിഷ് മാത്രമാണ്. അതിനാൽ വിഷയം നന്നായി അറിയാവുന്ന കുട്ടികൾക്കു പോലും തുടക്കത്തിൽ പ്രയാസം അനുഭവപ്പെട്ടേക്കാം. 

 

ഇംഗ്ലിഷിൽ പിന്നാക്കം നിൽക്കുന്ന കുട്ടികളെന്നു പറയുമ്പോൾ പൊതുവേ അവർ പിന്നാക്ക സമൂഹങ്ങളിലും ദലിത് വിഭാഗങ്ങളിലും പെടുന്നവരായിരിക്കും. ഇതല്ലാതെ, വീട്ടിലെയും മറ്റും നിർബന്ധംകൊണ്ട് ഐഐടി പോലുള്ള സ്ഥാപനങ്ങളിലെത്തിയവർക്കും ഐഐടി അക്കാദമിക ചുറ്റുപാട് കഠിനമായി തോന്നി ആത്മഹത്യ ചെയ്ത സംഭവങ്ങളുണ്ട്. ആത്മഹത്യ ചെയ്ത കുട്ടികളെ പൊതുവേ നോക്കുമ്പോൾ സാമ്പത്തികമായും അവർ പിന്നാക്കം നിൽക്കുന്നവരാണെന്നു കാണാം. ലോണെടുത്തും സ്ഥലം വിറ്റുമൊക്കെ പഠിക്കാൻ വന്നിട്ടു പ്രതീക്ഷയ്ക്കൊത്ത് ഉയരാൻ കഴിയുന്നില്ലെന്ന സമ്മർദം അവരെ തളർത്തുന്നു’’– അദ്ദേഹം മലയാള മനോരമയോടു വ്യക്തമാക്കി. 

 

∙ സാമൂഹിക പശ്ചാത്തലം പരിഗണിക്കണം 

 

ഗ്രാമീണ മേഖലകളിൽനിന്നു വരുന്നവർക്കു പലപ്പോഴും അത്ര സുഖകരമായിരിക്കില്ല ഐഐടിയിലെ തുടക്കകാലം എന്നാണ് അനുഭവമെന്ന് ഐഐടി മദ്രാസ് പൂർവവിദ്യാർഥിയും സ്റ്റുഡന്റ്സ് കൗൺസലിങ് ഗ്രൂപ്പിന്റെ ഭാഗമായി പ്രവർത്തിച്ചു പരിചയവുമുള്ള ബിയാസ് മുഹമ്മദ് സാക്ഷ്യപ്പെടുത്തുന്നു. ‘‘സാമ്പത്തിക പിന്നാക്ക വിഭാഗങ്ങളിൽ നിന്നുള്ളവർ, പിന്നാക്ക സമുദായങ്ങളിൽനിന്നുള്ളവർ എന്നിവർക്കും പലവിധ പ്രയാസങ്ങൾ നേരിടേണ്ടി വരുന്നതാണു സ്ഥിതി. പഠനകാലത്തു വിദ്യാർഥികൾക്കിടയിൽ ഞങ്ങൾതന്നെ മുൻകയ്യെടുത്തു നടത്തിയ സർവേയിൽ ഇക്കാര്യം തിരിച്ചറിഞ്ഞിട്ടുണ്ട്. 

 

ഇവിടെ എത്തിക്കഴിഞ്ഞാൽ സ്വയം ‘പ്രൂവ്’ ചെയ്യാനുള്ള സമ്മർദം വിദ്യാർഥികൾ അനുഭവിക്കുന്നുണ്ട്. മാസങ്ങൾ നീണ്ടുനിൽക്കുന്ന ഗുരുതരമായ ഡിപ്രഷനിലൂടെ കടന്നുപോയ ഒട്ടേറെ വിദ്യാർഥികളെ കണ്ടിട്ടുണ്ട്. സമ്മർദം താങ്ങാനാകാതെ കോഴ്സ് അവസാനിപ്പിച്ചവരും സെമസ്റ്റർ ബ്രേക്ക് എടുത്തവരുമായ പരിചയക്കാരുണ്ട്. പ്രതിഭകളായ പല വിദ്യാർഥികളും ഇവിടുത്തെ രീതികൾ മൂലം പിന്തള്ളപ്പെട്ടുപോകുന്നു. വിദ്യാർഥികളുടെ സാമൂഹിക പശ്ചാത്തലം കൂടി പരിശോധിച്ചു നടപടികൾ സ്വീകരിക്കാൻ അധികൃതർക്കു കഴിയണം’’– ബിയാസ് ചൂണ്ടിക്കാട്ടുന്നു. ഐഐഐം കോഴിക്കോട് നൽകുന്ന മഹാത്മാഗാന്ധി നാഷനൽ ഫെലോഷിപ് നേടി ഇടുക്കിയിൽ നൈപുണ്യവികസന രംഗത്തു പ്രവർത്തിക്കുകയാണ് കായംകുളം സ്വദേശിയായ ബിയാസ്. 

 

∙ എന്താണു പരിഹാരം?

 

കടുത്ത മത്സരമുള്ള ഇത്തരം പ്രീമിയർ സ്ഥാപനങ്ങളിൽ വേണ്ട 5 കാര്യങ്ങൾ ഇവയാണ്.

 

1) മാനസികാര്യോഗ്യ സർവേ നടത്തുക. വിദ്യാർഥികൾ നേരിടുന്ന വിവിധ സമ്മർദങ്ങൾ എന്തെന്നു മനസ്സിലാക്കാനും പരിഹാരം കണ്ടെത്താനും ഇതുവഴി സാധിക്കും. ഈ വർഷം തുടർച്ചയായി നാലു മരണങ്ങൾ നടന്നതോടെ തമിഴ്‌നാട് നാഷനൽ ഹെൽത്ത് മിഷന്റെ (എൻഎച്ച്‌എം) നേതൃത്വത്തിൽ ഐഐടി മദ്രാസിൽ ഇത്തരത്തിൽ വെൽനസ് സർവേ ആരംഭിച്ചിട്ടുണ്ട്. വിദ്യാർഥികൾ, ജീവനക്കാർ, അധ്യാപകർ എന്നിവരുമായി 30ലധികം കൗൺസിലർമാർ സംസാരിക്കും. വിദ്യാർഥികളുടെ പ്രശ്നങ്ങൾ മനസ്സിലാക്കാൻ 'ബി ഹാപ്പി' വെബ്‌സൈറ്റും ആരംഭിച്ചു.  

 

2) മാനസികാര്യോഗ്യ സർവേയ്ക്കു പുറമേ സാമൂഹികനീതി സർവേ കൂടി നടത്തണം. വിദ്യാർഥികളുടെ സാമൂഹിക, സാമ്പത്തിക സാഹചര്യം മനസ്സിലാക്കാനും അത് ഏതു തലത്തിലാണ് കുട്ടിയെ ബാധിക്കുന്നതെന്നു ബോധ്യപ്പെടാനും ഇതു സഹായിക്കും. പ്രത്യേകിച്ച് പാർശ്വവൽക്കൃത സമൂഹങ്ങളിൽനിന്നു വരുന്ന കുട്ടികളുടെ കാര്യത്തിൽ ഇതു നിർണായകമാണ്. ഇത്തരം സാഹചര്യങ്ങളിൽനിന്നു വരുന്ന കുട്ടികളെ ഉൾക്കൊണ്ടു പെരുമാറുന്നതിന് ക്യാംപസിനെ സജ്ജമാക്കാൻ ഇതു സഹായിക്കും.

 

3) അധ്യാപകർക്കും വിദ്യാർഥികൾക്കുമായി എംപതി ആൻഡ് മെന്റൽ വെൽ മൊഡ്യൂൾ ആവിഷ്കരിക്കുക. പ്രതിസന്ധികളെ അതിജീവിക്കുന്നത് എങ്ങനെയെന്നു ബോധ്യപ്പെടുത്താനും ഇൻസ്റ്റിറ്റ്യൂട്ട് കൂടെയുണ്ടെന്ന ആത്മവിശ്വാസം പകരാനും ഇതുവഴി സാധിക്കും. വിവിധ ചെറുഗ്രൂപ്പുകളായി തിരിച്ചുവേണം ഇത്തരം മൊഡ്യൂൾ നൽകാൻ. 

 

4) ആത്മഹത്യ പോലുള്ള നിർഭാഗ്യകരമായ സംഭവങ്ങളുണ്ടാകുമ്പോൾ അതു മൂടിവച്ച് പ്രശ്നങ്ങളിൽനിന്ന് ഒളിച്ചോടാൻ ശ്രമിക്കുന്നത് അവസാനിപ്പിക്കുക. എന്തുകൊണ്ട് സംഭവിച്ചു? ഇനി സംഭവിക്കാതിരിക്കാൻ എന്തുവഴി എന്നതിനെപ്പറ്റി വ്യക്തത വരാൻ സ്വതന്ത്രവും നീതിപൂർവവുമായ അന്വേഷണം നടക്കണം. അതിനു സ്വതന്ത്ര ഏജൻസികളെക്കൊണ്ട് അന്വേഷിപ്പിക്കണം. മരണം മറ്റെന്തോ കാരണങ്ങളാലാണെന്നു വരുത്തിത്തീർക്കാനുള്ള വ്യഗ്രത അവസാനിപ്പിക്കണം. മരിച്ചവരോടും അതിനിടയാക്കിയ സാഹചര്യങ്ങളോടും അനുകമ്പാപൂർണമായ സമീപനം സ്വീകരിക്കണം. 

 

5) ക്യാപംസ് കൂറേക്കൂടി വിദ്യാർഥിസൗഹാർദമാകണം. നിയമങ്ങളും നടപടിക്രമങ്ങളും അടിച്ചേൽപിക്കാതെ ചർച്ചകളിലൂടെ ഉണ്ടായി വരട്ടെ. ക്യാംപസിലെ വിവിധ കമ്മിറ്റികളിൽ സജീവമായ വിദ്യാർഥി പങ്കാളിത്തം ഉറപ്പാക്കണം.

 

അക്കാദമിക– നൈപുണ്യ മികവിൽ രാജ്യത്തിന്റെ അഭിമാനമായ ഇത്തരം സ്ഥാപനങ്ങളിൽ  ഇനി ഇത്തരമൊരു ദുരന്തം ആവർത്തിക്കില്ലെന്ന നിശ്ചയദാർഢ്യത്തോടെയുള്ള അടിയന്തര നടപടികൾ തന്നെയാണു പ്രായശ്ചിത്തം. അതിനു തുറന്ന മനസ്സോടെ വിദ്യാർഥികളെയും രക്ഷിതാക്കളെയും കേൾക്കാനും ജാതീയതയുടെ വേലിക്കെട്ടുകൾ മാറ്റിവച്ചു രാജ്യത്തിന്റെ  എല്ലാതരത്തിലുമുള്ള വൈവിധ്യം ഉൾക്കൊള്ളാൻ ക്യാംപസിനെ സജ്ജമാക്കുകയും ചെയ്യാൻ അധികൃതർക്കു കഴിയണം.

 

English Summary: Why is the Suicide Rate High at India's Premier Education Institutions like IITs?