കേരളം വീണ്ടും നിപ്പ രോഗബാധയുടെ ഭീതിയിൽ. മരുന്നില്ലാത്ത രോഗം എന്ന ഭീതി നിപ്പ ഇപ്പോഴും നിലനിർത്തുന്നു. 2018 ലാണ് നിപ്പ ആദ്യമായി കേരളത്തിൽ കണ്ടെത്തുന്നത്. ‘ഫ്രൂട്ട് ബാറ്റ്സ്’ വിഭാഗത്തിൽ പെടുന്ന വവ്വാലുകളിൽനിന്നാണ് അന്നു രോഗം പടർന്നത്. 2019 ലും 2021 ലും വീണ്ടും തലപൊക്കിയ നിപ്പ ഭീതി 2023 ൽ വീണ്ടുമെത്തിയിരിക്കുന്നു. പുണെയിലെ  നാഷനൽ ഇൻസ്റ്റിറ്റ്യൂട്ട് ഓഫ് വൈറോളജി ലാബിൽ നടത്തിയ പരിശോധനയിൽ കോഴിക്കോട് രോഗബാധ സ്ഥിരീകരിച്ചതോടെ ഇനി നിപ്പ പ്രതിരോധത്തിന്റെ നാളുകൾ. എന്തുകൊണ്ടാണ് നിപ്പ ഇടവേളകളിൽ കേരളത്തിൽ വീണ്ടും എത്തുന്നത്? നിപ്പയ്ക്ക് എന്തുകൊണ്ടാണ് ഫലപ്രദമായ മരുന്നു കണ്ടെത്താൻ കഴിയാത്തത്? നിപ്പ വാക്സീൻ കണ്ടെത്താനുള്ള ഗവേഷണങ്ങൾ ഫലപ്രാപ്തിയിൽ എത്താൻ എത്ര നാൾ വേണ്ടി വരും? ഈ ചോദ്യങ്ങൾക്ക് ഉത്തരം തേടുകയാണ് കേരളത്തിൽ ഓരോരുത്തരും. ഭീതിയോടെ. 

2018 ൽ നിപ്പ പ്രതിരോധിച്ച കേരള ആരോഗ്യ വകുപ്പിലെ സംഘത്തിലെ പ്രധാനി അന്നത്തെ അഡിഷനൽ ചീഫ് സെക്രട്ടറി രാജീവ് സദാനന്ദൻ ആയിരുന്നു. അദ്ദേഹത്തിന്റെ നേതൃത്വത്തിൽ ഓസ്ട്രേലിയയിൽനിന്ന് നിപ്പയ്ക്ക് മരുന്നു കൊണ്ടുവരാനും കഴിഞ്ഞു. മോണോ ക്ലോണൽ ആന്റിബോഡ‍ി (എംഎബി) എന്ന മരുന്ന് ഇന്ന് നാഷനൽ ഇൻസ്റ്റിറ്റ്യൂട്ട് ഓഫ് വൈറോളജിയിൽ ലഭ്യമാണ്. അഡിഷൽ ചീഫ് സെക്രട്ടറി സ്ഥാനത്തുനിന്നു വിരമിച്ച ശേഷം ഡൽഹി ആസ്ഥാനമായ ഹെൽത്ത് സിസ്റ്റംസ് ട്രാൻസ്ഫോമേഷൻ പ്ലാറ്റ്‌ഫോം (എച്ച്എസ്ടിപി) എന്ന സ്ഥാപനത്തിന്റെ ചീഫ് എക്സിക്യൂട്ടിവ് ഓഫിസറാണ് അദ്ദേഹം. ആരോഗ്യരംഗത്തെ ഗവേഷണത്തിനും നയരൂപീകരണത്തിനും ആവശ്യമായ പ്രവർത്തനങ്ങൾ നടത്തുകയാണ് എച്ച്എസ്ടിപിയുടെ ലക്ഷ്യം. നിപ്പ രോഗഭീതി വീണ്ടും ഉയര്‍ന്ന സാഹചര്യത്തിൽ ‘മനോരമ ഓൺലൈൻ പ്രീമിയ’ത്തിൽ സംസാരിക്കുകയാണ് രാജീവ് സദാനന്ദൻ.

? കോഴിക്കോട് വീണ്ടും നിപ്പ രോഗബാധ കണ്ടെത്തിയല്ലോ. എന്തുകൊണ്ടാണ് വീണ്ടും കോഴിക്കോട് മേഖലയിൽതന്നെ നിപ്പ വ്യാപിക്കുന്നത്. 2018 ൽ നിപ്പ ബാധയെ തുടർന്ന് പ്രതിരോധ നടപടികളെടുത്തതും വവ്വാലുകളെ കൂട്ടത്തോടെ നശിപ്പിച്ചതും മറ്റും ഫലപ്രദമായില്ലേ.

∙ 2018 ലാണ് കോഴിക്കോട് മേഖലയിൽ നിപ്പ കണ്ടെത്തിയത്. അന്നുതന്നെ ഈ മേഖലയിൽ നിപ്പ വീണ്ടും വരാനുള്ള സാധ്യതയെ കുറിച്ച് ആരോഗ്യ വകുപ്പ് മുന്നറിയിപ്പ് നൽകിയിരുന്നു. അന്ന് നടത്തിയ പരിശോധനയിൽ 22% വരുന്ന വവ്വാൽ കൂട്ടത്തിൽ നിപ്പ വൈറസിന്റെ സാന്നിധ്യം ഉണ്ടെന്ന് കണ്ടെത്തിയിരുന്നു. ഇത് നിർണായകമായ വിവരമാണ്. ഈ വവ്വാലുകൾ അവിടെയുണ്ട്. അതിനാൽതന്നെ നിപ്പ വീണ്ടും വരാൻ സാധ്യതയുമുണ്ട്. 

50 കിലോമീറ്റർ ദൂരത്തിൽ വവ്വാലുകൾ പറന്നു നടക്കും. ഇതും രോഗബാധ മറ്റു മേഖലകളിലേക്ക് എത്താനുള്ള വഴിയൊരുക്കുന്നു. അതേസമയം കോഴിക്കോട് മാത്രമാണ് നിപ്പ എന്നു പറയാൻ കഴിയില്ല. രണ്ടാം വട്ടം എറണാകുളം ജില്ലയില്‍ നിപ്പബാധ കണ്ടെത്തിയിരുന്നല്ലോ. നിപ്പ ഒരിക്കൽ ഒരു സ്ഥലത്ത് ബാധിച്ചാൽ തുടർ വർഷങ്ങളിലും രോഗം വരും. മലേഷ്യയാണ് ആദ്യം നിപ്പ വന്ന സ്ഥലങ്ങളിൽ ഒന്ന്. അവിടെ പിന്നീടും രോഗബാധ ഉണ്ടായി. ഈ സാഹചര്യം നേരിടുക മാത്രമാണു വഴി.

? നിപ്പ ബാധിച്ചു രണ്ടു പേർ മരിച്ചതായാണു പ്രാഥമിക വിവരം. സാഹചര്യം എത്രത്തോളം ഗൗരവമുള്ളതാണ്. നിപ്പ നേരിടുന്നതിൽ ആരോഗ്യ വകുപ്പ് എത്രത്തോളം കാര്യക്ഷമമാണ്. 2018 ലെ സാഹചര്യത്തിൽനിന്ന് എത്രത്തോളം കേരളം മുന്നോട്ടു പോയിട്ടുണ്ട്.

∙ നിപ്പ ഗൗരവമുള്ള അസുഖമാണ്. അതേസമയം ഏതു ഗുരുതരമായ സാഹചര്യവും നേരിടുന്നതിൽ ആരോഗ്യ വകുപ്പ് പ്രാപ്തമാണ്. 2018 ൽ നിപ്പ ബാധ നേരിടുന്നത് എങ്ങനെ എന്ന് അറിയില്ലായിരുന്നു. പിപിഇ കിറ്റ് എങ്ങനെ ധരിക്കണമെന്നു പോലും നമുക്ക് അറിയില്ലായിരുന്നല്ലോ. എബോള പോലുള്ള വൈറസ് ബാധകളുടെ പ്രതിരോധ നടപടികൾ മാതൃകയാക്കിയാണ് അന്ന് ചികിത്സയും പ്രതിരോധവും നടത്തിയിരുന്നത്. ഇന്ന് ആ സാഹചര്യം മാറി. നിപ്പ ബാധ നേരിടുന്നതിന് വ്യക്തമായ ചികിത്സാ പ്രോട്ടോക്കോൾ തയാറാക്കിയിട്ടുണ്ട്. അവ അനുസരിച്ച് പ്രവർത്തിക്കുകയാണ് പ്രധാനം. 

നിപ്പയ്ക്ക് നേരിട്ട് കൊടുക്കാവുന്ന മരുന്നുകളില്ല. പകരം നിപ്പ ബാധിച്ച രോഗികൾക്കുള്ള അനുബന്ധ ചികിത്സകൾ നൽകുകയാണു ചെയ്യുന്നത്. രോഗ ബാധിതരുടെ ആരോഗ്യസ്ഥിതി ഗുരുതരമാകാതെ നിലനിർത്തുകയാണ് ചികിത്സയിൽ പ്രധാനം. ഇതിനൊപ്പംതന്നെ രോഗം പടരുന്നത് തടയാനുള്ള ശ്രമങ്ങളും നടത്തും. ഓക്സിജൻ നില താഴാതെ നിലനിർത്തുക, സ്റ്റിറോയ്ഡുകൾ ആവശ്യാനുസരണം നൽകുക എന്നതിലാണു ശ്രദ്ധ കൊടുക്കുന്നത്. കോവിഡിന് ശേഷം ആരോഗ്യ മേഖലയിൽ മികച്ച തോതിൽ അടിസ്ഥാന സൗകര്യങ്ങളുടെ വികസനവും നടന്നു. ഇത്തരം അടിയന്തര സാഹചര്യങ്ങൾ നേരിടാൻ നാം പ്രാപ്തരായി എന്നു പറയാം. 

? നിപ്പയ്ക്ക് ഫലപ്രദമായ മരുന്നുകൾ കണ്ടെത്തിയിട്ടുണ്ടോ. എന്താണ് ചികിത്സയിലെ പ്രധാന വെല്ലുവിളി. അക്കാലത്ത് ഓസ്ട്രേലിയയിൽനിന്ന് മോണോ ക്ലോണൽ ആന്റിബോഡി കൊണ്ടു വന്ന് ചികിത്സ നടത്തുമെന്ന് പറഞ്ഞിരുന്നു. എങ്ങനെയാണ് ഇപ്പോൾ ചികിത്സ.

∙ കൃത്യമായ മരുന്നുകൾ ലഭ്യമല്ലാത്തതുതന്നെയാണ് നിപ്പ ചികിത്സയിലെ പ്രധാന വെല്ലുവിളി. എന്നാൽ ഇതു വലിയ പ്രതിസന്ധിയല്ല. പകരം നൽകാവുന്ന ഒട്ടേറെ മരുന്നുകളുണ്ട്. മോണോ ക്ലോണൽ ആന്റിബോഡിസ് എം 102.4 വിഭാഗത്തിൽ പെടുന്ന മരുന്നുകൾ അത്തരത്തിൽ ഒന്നാണ്. ഓസ്ട്രേലിയയിലെ ക്വീൻസ്‌ലാൻഡിലാണ്  മരുന്നു വികസിപ്പിച്ചത്. അന്ന് ഹെൻഡ്ര വൈറസ് ചികിത്സയ്ക്കു വേണ്ടിയായിരുന്നു അത്. 2018 ൽ കേരളത്തിൽ നിപ്പ ബാധയെ തുടർന്ന് ലോകാരോഗ്യ സംഘടന വഴി ഓസ്ട്രേലിയയിലെ ചീഫ് ഹെൽത്ത് ഓഫിസറുമായി ആശയ വിനിമയം നടത്തിയാണ് അന്ന് മരുന്ന് ലഭ്യമാക്കിയത്.