കനുഗോലുവിന്റെ കർമപദ്ധതി

എംപിമാരുടെ സ്ഥിതി സംബന്ധിച്ചു കൂടുതൽ വിവരങ്ങൾ സർവേയിൽ തെളിഞ്ഞിരുന്നു. പൊതുചർച്ചയിൽ അതു വിശദീകരിക്കുന്നതു നേതൃത്വം വിലക്കി. കനുഗോലുവിന്റെ പരിശ്രമത്തെയും അവതരണത്തെയും കേരളനേതൃത്വം മതിപ്പോടെയാണു കാണുന്നത്. 2024ലെ ലോക്സഭാ തിര‍‍ഞ്ഞെടുപ്പിലേക്കുള്ള കോൺഗ്രസിന്റെ റോഡ് മാപ് ആവിഷ്കരിക്കുന്നതിൽ കർണാടകക്കാരനായ ഈ പ്രഫഷനലിനുള്ള പങ്ക് അവർ തിരിച്ചറിയുന്നു. 

∙ പ്രശാന്തിന്റെ പിൻഗാമി 

സ്ഥാനാർഥികളെ തീരുമാനിക്കുമ്പോൾ സ്വകാര്യ ഏജൻസികൾ നടത്തുന്ന സർവേ നിഗമനങ്ങൾകൂടി കണക്കിലെടുക്കുന്ന രീതി സമീപകാലത്തായി കോൺഗ്രസുൾപ്പെടെ പല പാ‍ർട്ടികളും പുലർത്തുന്നുണ്ട്. എന്നാൽ, സർവേക്കു നേതൃത്വം നൽകുന്നവർ പാർട്ടി നേതൃയോഗങ്ങളിൽ പങ്കെടുക്കുന്നതു ശരിയോ എന്ന സംശയം പ്രമുഖരായ ചില നേതാക്കൾക്കുതന്നെ ഉണ്ടായി. കോൺഗ്രസ് പാർട്ടിയുടെ ഭാഗമാണ് ഇപ്പോൾ സുനിൽ കനുഗോലു എന്നതാണ് അവർക്കു ലഭിച്ച മറുപടി. ലോക്സഭാ തിരഞ്ഞെടുപ്പിനായി എഐസിസി രൂപീകരിച്ച ദേശീയ ടാസ്ക് ഫോഴ്സ് അംഗമാണ് അദ്ദേഹം. ആ ഘടകത്തിലെ മറ്റ് അംഗങ്ങൾ നിസ്സാരരല്ല: പി.ചിദംബരം, മുകുൾ വാസ്നിക്, കെ.സി.വേണുഗോപാൽ, പ്രിയങ്ക ഗാന്ധി, ജയറാം രമേശ്, അജയ് മാക്കൻ, രൺദീപ് സിങ് സുർജേവാല തുടങ്ങിയവർ.

കോൺഗ്രസിലും അതിന്റെ സർക്കാരിലും പദവി വഹിക്കുന്ന ഒരാൾ കേരളത്തിലെ  നേതൃയോഗങ്ങളിൽ പങ്കെടുക്കുന്നതിൽ അനൗചിത്യം ഒന്നുമില്ലെന്നു നേതൃത്വം വ്യക്തമാക്കുന്നു. കനുഗോലുവിനു മുൻപു പ്രശാന്ത് കിഷോറിനായിരുന്നു കോൺഗ്രസിൽ തിരഞ്ഞെടുപ്പ് ഉപദേഷ്ടാവിന്റെ റോൾ. പാർട്ടിയിൽ ചേരാനുള്ള കോൺഗ്രസിന്റെ നിർദേശം പ്രശാന്ത് നിരാകരിച്ചു; കനുഗോലു സ്വീകരിച്ചു.

കർണാടകയിലെ ബെള്ളാരിയിൽ ജനിച്ച് ചെന്നൈയിൽനിന്നു ബിടെക്കും ന്യൂയോർക്കിൽനിന്ന് എംബിഎയും എംഎസും നേടിയ കനുഗോലു ആദ്യം പ്രവർത്തിച്ചതു ബിജെപിക്കുവേണ്ടിയാണ്. 2014ലെ ലോക്സഭാ തിരഞ്ഞെടുപ്പിലും പിന്നീടു വിവിധ സംസ്ഥാനങ്ങളിലും ബിജെപിക്കു വേണ്ടി തന്ത്രങ്ങൾ മെനയുകയും നടപ്പാക്കുകയും ചെയ്ത പ്രശാന്ത് കിഷോറിന്റെ ടീമിൽ കനുഗോലുവും ഉണ്ടായിരുന്നു. ബിജെപി നേതൃത്വവുമായും പ്രശാന്തുമായും തെറ്റിയ അദ്ദേഹം കഴിഞ്ഞ ലോക്സഭാ തിരഞ്ഞെടുപ്പിൽ തമിഴ്നാട്ടിലെ ഡിഎംകെ മുന്നേറ്റത്തിന്റെ അണിയറ ശിൽപിയായി. മത്സരിച്ച 24ൽ 24 സീറ്റിലും ഡിഎംകെ ജയിച്ചു. ഇടക്കാലത്ത് പഞ്ചാബിലെ ശിരോമണി അകാലിദളും സേവനം തേടിയെങ്കിലും അതു പ്രയോജനം ചെയ്തില്ല. 2022 മേയിൽ കോൺഗ്രസിന്റെ ഭാഗമായി. രാജ്യത്തെ പ്രതിപക്ഷ ചേരിയുടെ തിരിക്കുറ്റി കോൺഗ്രസ് തന്നെയാണെന്ന്  ഉറപ്പിച്ച ‘ഭാരത് ജോഡോ യാത്ര’യുടെ ആശയസാക്ഷാത്കാരത്തിൽ മുഖ്യപങ്കു വഹിച്ചു. 

കർണാടകയിൽ ബിജെപി സർക്കാരിനെതിരെ ഉണ്ടായിരുന്ന ശക്തമായ ഭരണവിരുദ്ധവികാരം മുതലാക്കാൻ പോന്ന പ്രചാരണപദ്ധതികൾ ആവിഷ്കരിച്ചു വിജയിപ്പിക്കുക വഴി ഇരിപ്പിടം ഉറപ്പിക്കുകയും ചെയ്തു. 

∙ റോൾ അണിയറയിൽ മാത്രം

എൽഡിഎഫ് സർക്കാരിനെതിരെ ഇല്ലാക്കഥകൾ പ്രചരിപ്പിക്കാൻ പ്രതിപക്ഷം ഒരു സമൂഹമാധ്യമ പ്രചാരകന്റെ സേവനം തേടിയെന്നു കനുഗോലുവിനെ ലാക്കാക്കി മുഖ്യമന്ത്രി പിണറായി വിജയൻ കഴിഞ്ഞ ദിവസം പ്രസംഗിച്ചിരുന്നു. എന്നാൽ, കനുഗോലുവിന് ഒരു ഔദ്യോഗിക സമൂഹമാധ്യമ അക്കൗണ്ട് പോലുമില്ല എന്നതാണു രസകരം.