‘തൃശൂരിൽ’ സിപിഐക്ക് അത്തരം ആലോചന ഇല്ല ! ആ രണ്ടര ലക്ഷം പേരുടെ തലയ്ക്കു മേൽ വാൾ വീശണോ ? ഗവർണർക്കെതിരെ മന്ത്രി

? താങ്കളുടെ വകുപ്പുമായി ബന്ധപ്പെട്ട ഏതാനും  ബില്ലുകളിന്മേൽ ഗവർണർ തീരുമാനം നീട്ടിക്കൊണ്ടു പോകുകയാണല്ലോ

∙  മൂന്നു ബില്ലുകളുടെ കാര്യത്തിൽ തീരുമാനം നീട്ടുകയാണ്. ശ്രീപത്മനാഭസ്വാമി ക്ഷേത്രത്തിനുള്ള സർക്കാർ വിഹിതം കൂട്ടുന്ന ബില്ലിൽ അദ്ദേഹം ഒപ്പിട്ടു. ബാക്കി മൂന്നും കോൾഡ് സ്റ്റോറേജിലാണ്. ഭൂപതിവ് നിയമം, ഭൂമി തരം മാറ്റൽ, കെട്ടിടനികുതി എന്നിവയുമായി ബന്ധപ്പെട്ടുള്ള ബില്ലുകളിലാണ് ഈ മനോഭാവം. ഭൂപതിവ് നിയമം കേരള നിയമസഭ ഏകകണ്ഠമായി പാസാക്കിയതാണ്. മലയോരകർഷകരുടെ വർഷങ്ങളായുള്ള ജീവിതാഭിലാഷമാണ് ആ ബിൽ. ഒപ്പിടാം, അല്ലെങ്കിൽ രാഷ്ട്രപതിക്ക് അയയ്ക്കാം, ഒരു കാലാവധി വരെ പിടിച്ചുവയ്ക്കാം, അല്ലെങ്കിൽ നിയമസഭയിലേക്ക് തിരിച്ചയയ്ക്കാം.

ഈ നാലു കാര്യങ്ങളാണ് അദ്ദേഹത്തിനു ചെയ്യാവുന്നത്. ഇതൊന്നും ചെയ്യാതെ ബില്ലിനെക്കുറിച്ചു തനിക്കു ലഭിച്ച ചില പരാതികൾ അദ്ദേഹം സർക്കാരിനു കൈമാറി. മന്ത്രിസഭ പാസാക്കിയ ഘട്ടത്തിൽ തന്നെ ബിൽ അദ്ദേഹത്തിന് അയച്ചുകൊടുത്തിരുന്നു. ആ സമയത്ത് അദ്ദേഹത്തിന് വിശദീകരണം ആരായാമെങ്കിലും ഒന്നും ചോദിച്ചില്ല. മന്ത്രിസഭ അംഗീകരിച്ച ബിൽ  ഇപ്പോൾ നിയമസഭയുടേതായി മാറി. ആ ബില്ലിന്റെ കാര്യത്തിൽ പാലിക്കേണ്ട ഒരു നടപടിക്രമവും  ഗവർണർ ചെയ്തിട്ടില്ല. ഒരു മര്യാദയും കാണിച്ചിട്ടില്ല. 

? മറ്റു ബില്ലുകളുടെ കാര്യത്തിലോ

∙ ഭൂമി തരംമാറ്റ ബില്ലിന്റെ കാര്യത്തിൽ വളരെ ജനോപകാര പ്രദമായ തീരുമാനമാണ് സർക്കാർ  എടുത്തത്. 27 ആർഡിഒ മാർക്കുള്ള അധികാരം ഡപ്യൂട്ടി കലക്ടർമാർക്കു താഴെയുള്ള ഉദ്യോഗസ്ഥർക്കു കൂടി നൽകാനായിരുന്നു ഭേദഗതി. അതോടെ വളരെ വേഗം ജനങ്ങളുടെ ആവശ്യങ്ങൾ പരിഹരിക്കപ്പെടും. ഞങ്ങളോട് ശത്രുത ഉണ്ടായിക്കൊള്ളട്ടെ, പക്ഷേ മൂന്നരക്കോടി മലയാളികളോട് എന്തിനാണ് ശത്രുത?  രാഷ്ട്രീയമായി ഒന്നും തന്നെ  ഇല്ലാത്ത ഒരു ബില്ലിലാണ് അദ്ദേഹം എതിർപ്പ് രേഖപ്പെടുത്തുന്നത്.

? ബിൽ പാസാക്കി അംഗീകാരത്തിന് അയച്ച ശേഷം അതിന്മേൽ വിശദീകരണം ചോദിക്കാൻ രാജ്ഭവന് അധികാരമുണ്ടോ

∙ സാധാരണ ഗതിയിൽ നിയമസഭ ഒരു ബിൽ പാസാക്കി അയച്ചുകഴിഞ്ഞാൽ ഞാൻ നേരത്തെ പറഞ്ഞ നാലു കാര്യങ്ങളാണ് ഗവർണർക്കു ചെയ്യാവുന്നത്. അല്ലാതെ സർക്കാരിനോട് വിശദീകരണം ചോദിക്കാൻ ഗവർണർക്ക് ഒരു അധികാരവും ഇല്ല. അതേ സമയം, വിശദീകരണം ചോദിച്ചാൽ അത് അക്കാദമിക് സ്പിരിറ്റിൽ എടുക്കാനും  ഒപ്പിടാൻ പോകുന്ന ആളോട് കാട്ടേണ്ട മര്യാദ എന്ന നിലയിൽ  മറുപടി പറയാനും തയാറാണ്. അദ്ദേഹത്തിന് ലഭിച്ച പരാതികളുടെ അടിസ്ഥാനത്തിൽ തന്റെ ലെറ്റർ പാഡിൽ സർക്കാരിനോട് വേണമെങ്കിൽ  ഗവർണർക്കു വിശദീകരണം ആരായാം. ഈ ഘട്ടത്തിൽ അതു നിയമപരമല്ലെങ്കിൽ പോലും  പ്രശ്നം ഒഴിവാക്കാനായി വിശദീകരണം നൽകാൻ സർക്കാർ തയാറാകുകയും ചെയ്യും.

പക്ഷേ  ഭൂപതിവ് നിയമത്തിന്റെ കാര്യത്തിൽ തനിക്കു ലഭിച്ച  മൂന്നു പരാതികൾ  പരിശോധിക്കാൻ പറഞ്ഞ് സർക്കാരിലേക്ക് അയയ്ക്കുകയാണ് അദ്ദേഹം ചെയ്തത്. അതിൻമേൽ  മറുപടി കിട്ടിയിട്ടു മാത്രമേ തീരുമാനം എടുക്കൂ എന്നു പറയുന്നത് ഭരണഘടനയ്ക്ക് നിരക്കുന്നതല്ല. എന്നിട്ടു പോലും  അതിനു സർക്കാർ മറുപടി നൽകി. അതിനു ശേഷവും ഒപ്പിട്ടിട്ടില്ല. യഥാർഥത്തിൽ നിയമസഭ പാസാക്കിയ ബില്ലിന്റെ കാര്യത്തിൽ സർക്കാരിന് പ്രത്യേകിച്ച് അധികാരമില്ല. ഭൂമി തരംമാറ്റ ബില്ലിന്റെയും കെട്ടിട നികുതി സംബന്ധിച്ച ബില്ലിന്റെയും  കാര്യത്തിൽ ഒന്നും ഉണ്ടായിട്ടില്ല. വെറുതേ പിടിച്ചു വച്ചിരിക്കുകയാണ്. 

? സർക്കാരുമായിട്ടുള്ള അനിഷ്ടത്തിന്റെ പേരിൽ ബില്ലുകൾ പിടിച്ചു വച്ചിരിക്കുകയാണ് എന്നാണോ

അങ്ങനെ കരുതേണ്ടി വരും.  പക്ഷേ ഭൂമി തരംമാറ്റത്തിനായി അപേക്ഷ നൽകിയ 257000 പേരുടെ തലയ്ക്കു മുകളിൽ കൂടി ഇങ്ങനെ ഒരു വാൾ വീശേണ്ട  കാര്യമുണ്ടോ? ഈ നിലയ്ക്ക്  ഭരണനിർവഹണ സംവിധാനം എങ്ങനെ മുന്നോട്ടുപോകും?  

? പരിസ്ഥിതിയുമായി ബന്ധപ്പെട്ട ചില ഉത്കണ്ഠകൾ, കയ്യേറ്റ  ലോബിക്ക് അനുകൂലമെന്ന വിമർശനം ഇതൊക്കെയാണ് ഗവർണറുടെ മുന്നിൽ എത്തിയിരിക്കുന്നതെന്ന് പറയുന്നുണ്ടല്ലോ 

ആരോ ഒന്നോ രണ്ടോ പേർ  പരാതി അയച്ചു. അതു പരിശോധിക്കാൻ അദ്ദേഹം  പറഞ്ഞു, ബോധ്യമാകുന്ന മറുപടിയും നൽകി. നിയമസഭ പാസാക്കുന്ന ബില്ലുകളിന്മേൽ ആരെങ്കിലും ഊമക്കത്ത് എഴുതി അയച്ചാൽ അതാണ് കാര്യമെന്നു കരുതി ഗവർണർക്ക് തടഞ്ഞുവയ്ക്കാൻ കഴിയുമോ? ഭരണഘടന അല്ലേ നമ്മളെ നയിക്കേണ്ട ആകാശം? സ്വയം ഭരണഘടന ഉണ്ടാക്കാൻ ആർക്കും അവകാശമില്ല. 

? ഗവർണറെ കണ്ട് ബില്ലുകളുടെ പ്രാധാന്യം അദ്ദേഹത്തെ ബോധ്യപ്പെടുത്താൻ താങ്കൾ ശ്രമിക്കാത്തത് എന്തുകൊണ്ടാണ് 

എന്റെ ബില്ലുകളുടെ  കാര്യത്തിൽ മാത്രം അല്ലല്ലോ .പൊതുവായ സമീപനമാണല്ലോ ഉള്ളത്. വ്യക്തിപരമായി പോയി സംസാരിക്കുന്നത് കൂട്ടായ പ്രവർത്തനത്തിനു ചേർന്നതല്ല.അങ്ങനെ ഒരു കീഴ്വഴക്കവുമില്ല. 

? ഗവർണർക്കെതിരെ എസ്എഫ്ഐ പ്രതിഷേധിക്കുന്നതു പോലെ എഐഎസ്എഫിനെ കാണുന്നില്ലല്ലോ 

എഐഎസ്എഫ് അവരുടെ നിലപാട് കൃത്യമായി പറഞ്ഞിട്ടുണ്ട്. കാലിക്കറ്റ് സർവകലാശാലയിലെ വലിയ പ്രതിഷേധത്തിൽ എഐഎസ്എഫ് പങ്കാളികളായിരുന്നു. അതിനു ശേഷം ക്യാംപസുകളിൽ വലിയ സമരങ്ങൾ  സംഘടിപ്പിച്ചു. സമരരൂപം ഓരോ സംഘടനയും തീരുമാനിക്കുന്നതാണല്ലോ. നിലപാട് ആണല്ലോ  പ്രധാനം. 

? താങ്കളുടെ പാർട്ടിയുടെ തൃശൂർ എംഎൽഎ പി.ബാലചന്ദ്രൻ  രാമനെയും സീതയെയും അധിക്ഷേപിച്ചു ഫെയ്സ് ബുക്കിൽ ഇട്ട പോസ്റ്റ് വലിയ വിവാദമായല്ലോ? അദ്ദേഹവുമായി സംസാരിച്ചോ

ജാഗ്രതയില്ലാതെ ചെയ്ത നടപടിയാണെന്ന്  സിപിഐ ജില്ലാ സെക്രട്ടറി വ്യക്തമാക്കിയിട്ടുണ്ട്. അങ്ങനെ ചെയ്യാൻ പാടില്ലായിരുന്നു. അതേ അഭിപ്രായം തന്നെയാണ് ഞങ്ങൾക്കെല്ലാം ഉള്ളത്. പിന്നീട് അദ്ദേഹത്തെ നേരിട്ടു കാണാൻ കഴിഞ്ഞിട്ടില്ല. 

? ബിജെപി ഈ ലോക്സഭാ തിരഞ്ഞെടുപ്പിൽ  തൃശൂരിൽ ചില സാധ്യതകൾ പ്രതീക്ഷിക്കുന്നു, അവിടെ എൽഡിഎഫിനായി  മത്സരിക്കുന്നത് സിപിഐയുടെ സ്ഥാനാർഥിയാണ്. സിപിഐയുടെ എംഎൽഎ തന്നെ ഇങ്ങനെ പ്രവർത്തിച്ചാലോ 

അതുകൊണ്ടു തന്നെയാണ് പറഞ്ഞത്. ആ വിധത്തിലുള്ള ഉത്തരവാദിത്തങ്ങൾ കൂടി അദ്ദേഹത്തിനുണ്ട്. അദ്ദേഹം തന്നെ അതു തുറന്നു സമ്മതിച്ചിട്ടുണ്ട്. ഉയർന്ന ബോധവും ജാഗ്രതയും കാണിക്കുന്നതിൽ  വീഴ്ച ഉണ്ടായി എന്നു പറഞ്ഞാണ് പോസ്റ്റ്  പിൻവലിച്ചത്.അക്കാര്യത്തിൽ  ആവശ്യമായ ബോധ്യപ്പെടുത്തൽ അദ്ദേഹത്തോടു പാർട്ടി നടത്തും. ഇത്തരം കാര്യങ്ങളിൽ വേണ്ട സമീപനം  ഉണ്ടാകും.  

? ലോക്സഭാ തിരഞ്ഞെടുപ്പിൽ സിപിഎമ്മുമായി സീറ്റ് വച്ചു മാറാൻ സിപിഐ സന്നദ്ധമാണോ 

ഇപ്പോൾ അത്തരം ആലോചന ഉണ്ടായിട്ടില്ല. മത്സരിക്കുന്ന സീറ്റുകളിൽ തന്നെ മത്സരിക്കുക എന്നതാണ് ഇപ്പോഴത്തെ ധാരണ. തൃശൂർ സീറ്റിന്റെ കാര്യത്തിലാണെങ്കിൽ ഒരു സാധ്യതയും ഇല്ല. 

? തൃശൂരല്ല, തിരുവനന്തപുരത്തിന്റെ കാര്യമാണ് ചോദിച്ചത്. 

ഒരു സീറ്റിനെക്കുറിച്ചും ഇപ്പോൾ ആലോചന ഉണ്ടായിട്ടില്ല. 

? സിപിഐ അതിന്റെ സ്വതന്ത്ര അസ്തിത്വം ബലികഴിച്ചു കൊണ്ട്   ഇടത് ഐക്യത്തിന്റെ പേരു പറഞ്ഞ് സിപിഎമ്മിന്റെ എല്ലാ വീഴ്ചകളെയും ന്യായീകരിക്കുകയാണെന്ന ആക്ഷേപം ഉണ്ടല്ലോ? പാർട്ടിയുടെ സ്വതന്ത്ര വ്യക്തിത്വം അടിയറവച്ചെന്നാണല്ലോ പരാതി

∙ കേരള രാഷ്ട്രീയരംഗത്ത് സിപിഐ എടുക്കുന്ന മൂല്യശോഭ പൊതുവിൽ അംഗീകരിച്ചിട്ടുള്ളതാണ്. തിരുത്തേണ്ടിടത്ത് തിരുത്തിയും യോജിക്കേണ്ട ഇടത്ത് യോജിച്ചും എതിർപ്പ് പറയേണ്ട ഇടത്ത് മുഖം നോക്കാതെ പറഞ്ഞും തന്നെയാണ് സിപിഐ മുന്നോട്ടു പോകുന്നത്. അതു തന്നെയാണ് തുടരുന്നത്. കഴിഞ്ഞ സർക്കാരിന്റെ കാലത്ത് തിരുത്തണമെന്ന് ഞങ്ങൾ ആവശ്യപ്പെട്ട ചില വിഷയങ്ങൾ ഉണ്ടായി. ഈ സർക്കാരിന്റെ കാലത്ത് സമാനമായ പ്രശ്നങ്ങൾ ഉണ്ടായിട്ടില്ല.അന്ന് മതിയായ കൂടിയാലോചന ഇല്ലാതെ എടുത്ത അപകടങ്ങളിൽ എല്ലാം തന്നെ കർശന നിലപാട് സിപിഐ എടുത്തു.

തുടർന്ന് പാർട്ടിയുടെ ദേശീയ കൗൺസിൽ തന്നെ മുൻകൈ എടുത്തു പരസ്പരം കൂടിയാലോചനകൾ ശക്തമാക്കി. അതുകൊണ്ടാണ് അത്തരത്തിൽ പരസ്യമായി തിരുത്തപ്പെടേണ്ട പ്രശ്നങ്ങൾ ഒഴിവായത്. അത്തരം പ്രശ്നങ്ങൾ വീണ്ടും ആവിർഭവിച്ചാൽ നിലപാട് വ്യക്തമാക്കുന്നതിന് ഒരു മടിയും സിപിഐക്ക് ഉണ്ടാകില്ല. പൊതു സമൂഹത്തെ ബാധിക്കുന്ന അത്തരം പ്രശ്നങ്ങൾ ഉയർന്നു വന്നാൽ ഒരു കുറവും ഇല്ലാത്തതു പോലെ സമീപനം  സിപിഐ എടുക്കും. ഇപ്പോൾ അങ്ങനെ ഉണ്ടായിട്ടില്ല.ഈ സ്ഥിതി തുടരട്ടെ എന്ന് ആഗ്രഹിക്കാം.