‘പൂരം കലക്കൽ’ ആസൂത്രിതം; മേയറെ സിപിഎം പുറത്താക്കണം; വനവാസത്തിനില്ല: സുനിൽകുമാർ

∙ ആദ്യ ഘട്ടത്തിൽ താങ്കൾക്കാണ് മേൽക്കൈ എന്ന വിലയിരുത്തൽ ഉണ്ടായിരുന്നല്ലോ? 

എനിക്ക് നല്ല ആത്മവിശ്വാസം ഉണ്ടായിരുന്നു. പിറകിൽ പോകുമെന്നു കരുതിയേ ഇല്ല. ബിജെപിയും കോൺഗ്രസും തമ്മിലാണ് മത്സരം എന്ന പ്രചാരണം ആദ്യം യുഡിഎഫ് നടത്തി. അതിനു ശേഷം കെ.മുരളീധരൻ വന്നപ്പോൾ മുന്നണികളുടെ മത്സരമാണെന്ന് അദ്ദേഹം തിരുത്തി. എന്നാൽ യുഡിഎഫും ബിജെപിയും തമ്മിലാണ് മത്സരം എന്ന രീതിയിലേക്ക് വീണ്ടും അവർ പോയി. ബിജെപിയെ അത്ര ഗൗരവത്തിൽ അവർ കാണുന്നുണ്ടായിരുന്നെങ്കിൽ ആ നിലയ്ക്ക് പ്രവർത്തനവും യുഡിഎഫ് നടത്തേണ്ടിയിരുന്നു. പക്ഷേ അത് തൃശൂരിൽ കണ്ടില്ല. ഞങ്ങൾ അതു ചെയ്തു. പ്രിയങ്ക ഗാന്ധി ചാലക്കുടിയിൽ വന്നിട്ടും ഇവിടെ വന്നില്ല. രാഹുൽഗാന്ധിയുടെ ഒരു പരിപാടി വച്ചത് റദ്ദാക്കി. സംസ്ഥാന നേതാക്കൾതന്നെ തൃശൂരിൽ കാര്യമായി വന്നു കണ്ടില്ല. 

∙ കെ.മുരളീധരനെ പോലെ ഒരു സ്ഥാനാർഥിയെ നിർത്തി ചതിച്ചെന്നാണോ പറഞ്ഞുവരുന്നത്? 

ബിജെപിയുടെ വിജയം എൽഡിഎഫിന്റെ മാത്രം പ്രശ്നമല്ല. കോൺഗ്രസ് കൂടി അതു പരിശോധിക്കണം. ഇന്ത്യയിൽ ഞങ്ങൾ ഒരുമിച്ച് എതിർക്കുന്ന ശക്തി തൃശൂരിൽ വിജയിച്ചു എന്നതാണ് പ്രധാനം. അപ്പോൾ ചർച്ച മുഴുവൻ ഇടതുപക്ഷത്തിന്റെ തിരിച്ചടിയും ചോർച്ചയിലേക്കും മാത്രം ഊന്നിയാൽ അപകടം ചെയ്യും.  

∙ തൃശൂരിൽ സിപിഎം–ബിജെപി അന്തർധാര നടന്നെന്നാണല്ലോ കോൺഗ്രസിന്റെ ആക്ഷേപം? 

ആ ചിന്ത പോലും എന്റെ മനസ്സിൽ ഇല്ല . ഞങ്ങൾക്ക് 2019ൽ ലഭിച്ചതിനേക്കാൾ 16,000 വോട്ടു കൂടുതൽ കിട്ടി. താങ്കൾ പറയുന്ന ക്രോസ് വോട്ടിങ് നടന്നാൽ അതു സംഭവിക്കില്ല. കോൺഗ്രസിന് വലിയ തോതിൽ വോട്ട് നഷ്ടപ്പെട്ടു. കോൺഗ്രസും സിപിഐയും തമ്മിൽ പോർവിളി നടത്തേണ്ട സമയമല്ല ഇത്. ദേശീയ രാഷ്ട്രീയത്തിൽ ബിജെപിക്കു വലിയ തിരിച്ചടിയാണ് ഉണ്ടായത്. അതിനിടയിൽ ബിജെപി ജയിച്ച സ്ഥലത്ത് യുഡിഎഫ് മൂന്നാം സ്ഥാനത്തേക്കു പോയി എന്നത് അവരാണ് ഗൗരവത്തിൽ കാണേണ്ടത്. വലിയ ഭൂരിപക്ഷത്തോടെയാണ് ബിജെപി ജയിച്ചത്. യുഡിഎഫിന്റെ വോട്ടാണ് അവിടെ ചോർന്നത്. കഴിഞ്ഞ ദിവസം ഡിസിസി ഓഫിസിൽ അടി നടന്നത് അതിന്റെ ബാക്കിയാണ്. 

∙ താമര ചിഹ്നത്തിൽ വോട്ടു ചെയ്യാൻ കൂടുതൽ പേർ സന്നദ്ധരായി എന്നതാണല്ലോ മതനിരപേക്ഷ ചേരി കാണേണ്ടത്? 

അതാണ് ഗൗരവത്തിൽ പരിശോധിക്കേണ്ടത്. മുൻപ് കാണാത്ത തിരഞ്ഞെടുപ്പ് പ്രവർത്തനരീതികൾക്ക് തൃശൂർ വേദിയായി. മറ്റു മണ്ഡലങ്ങളിൽ നിന്നുള്ള വോട്ടുകൾ ഇവിടെ വ്യാപകമായി ചേർത്തു. നരേന്ദ്രമോദി പോലും അദ്ദേഹത്തിന്റെ വോട്ട് അലഹബാദിൽനിന്നു വാരാണാസിയിലേക്കു മാറ്റിയിട്ടില്ലല്ലോ. കെ.മുരളീധരന്റെ വോട്ട് ഇപ്പോഴും തിരുവനന്തപുരത്താണല്ലോ. എന്നാൽ തൃശൂരിലേക്ക് ആസൂത്രിതമായി ബിജെപി വോട്ടു മാറ്റി. ഒരു ബൂത്തിൽ മാത്രം 267 പുതിയ വോട്ടുകൾ പുതുതായി വന്നതായി എനിക്കു വിവരമുണ്ട്. പരാതിയും കൊടുത്തിരുന്നു. പണം വ്യാപകമായി കൈമാറുന്ന രീതിയുമുണ്ടായി. ഇപ്പോൾ ആളുകൾക്ക് നേരിട്ടു പൈസ കൊടുക്കേണ്ട കാര്യമില്ലല്ലോ. പലരിൽ നിന്നായി ഗൂഗിൾ പേ ചെയ്യാമല്ലോ. 

∙ തൃശൂർ പൂരവുമായി ബന്ധപ്പെട്ട പ്രശ്നങ്ങൾ ഉടലെടുത്ത ശേഷമാണല്ലോ താങ്കൾ പിന്നിലേക്കു പോയത്? 

പൂരം പ്രശ്നങ്ങളിൽ പെട്ടപ്പോൾ ആർഎസ്എസിന്റെ നേതാക്കൾ പെട്ടെന്ന് നേരിട്ടു പ്രത്യക്ഷപ്പെട്ടു. പൂരം എങ്ങനെ കൂടുതൽ ഭംഗിയായി നടത്താമെന്നേ സർക്കാർ എപ്പോഴും ചിന്തിച്ചിട്ടുളളൂ. ഇത്തവണ പൂരം നിർത്തിവയ്ക്കാൻ ഉതകുന്ന എന്തെങ്കിലും അതിനു മുൻപ് സംഭവിച്ചതായി ആർക്കും അറിയില്ല. 

∙ ‘എടുത്തുകൊണ്ടു പോടാ പട്ട’ എന്ന് കമ്മിഷണർ തന്നെ ആക്രോശിച്ചതായാണല്ലോ വാർത്ത? 

അതു പൂരം മുടങ്ങിയതിനു ശേഷമാണ്. അതിനു മുൻപുള്ള പൊലീസിന്റെ നടപടികളെ പ്രകീർത്തിക്കുകയാണ് പലരും ചെയ്തത്. അതിനിടയിൽ ഒരു പൊലീസ് ഓഫിസർ പ്രകോപനപരമായി പെരുമാറിയെന്നു പറഞ്ഞാൽ അതു യാദൃച്ഛികമായി സംഭവിച്ചതാണെന്നു കരുതാൻ കഴിയില്ല. പൂരത്തിന് കലാപം ഉണ്ടാക്കണമെന്ന് ആഗ്രഹിക്കുന്നവരുമായി ആ ഉദ്യോഗസ്ഥന് എന്തെങ്കിലും ബന്ധം ഉണ്ടാകാം. 

സംയമനത്തോടെ കാര്യങ്ങൾ നടത്തുന്നവരാണ് പൂരത്തിന്റെ  ചുമതലകൾ എക്കാലത്തും നിർവഹിച്ചിട്ടുളളത്. തിരഞ്ഞെടുപ്പിന്റെ നിർണായക സമയത്തു തന്നെ പൂരവുമായി ബന്ധപ്പെട്ട ചടങ്ങുകൾക്ക് തടസ്സം ഉണ്ടാക്കിയെങ്കിൽ അതു വിശദമായി അന്വേഷിക്കേണ്ടതാണ്. അതോടെ പൂരം ദേശീയ തലത്തിൽതന്നെ തിരഞ്ഞെടുപ്പ് ചർച്ചകളിലേക്കു വന്നു. തിരഞ്ഞെടുപ്പിന് നാലു ദിവസം മുൻപാണ് ഇതെല്ലാം സംഭവിക്കുന്നത് ഒരിക്കലും സംഭവിക്കാത്ത ചില കാര്യങ്ങൾ ആ പാതിരാത്രി സംഭവിക്കുകയെന്നു പറഞ്ഞാൽ ആരും അറിയാതെ നടക്കില്ലല്ലോ. മേളം നിർത്തിവയ്ക്കുന്നു, പന്തലിലെ ലൈറ്റ് ഓഫ് ചെയ്യുന്നു...