‘സിപിഐയെ വിഡ്ഢിയാക്കി സിപിഎം; ഇത് ജനം കയ്യൊഴിയുന്നതിന്റെ തുടക്കം; ബിജെപിയുടെ വരവ് വലിയ മുന്നറിയിപ്പ്’

മഹാത്മാ ഗാന്ധിയും ജവാഹർലാൽ നെഹ്‌റുവും ഉൾപ്പെടെയുള്ള നേതാക്കൾ ഇന്ത്യൻ ദേശീയപ്രസ്ഥാനത്തിലൂടെ ആധുനിക ഭാരതത്തിന് സമ്മാനിച്ച മതനിരപേക്ഷതയും ജനാധിപത്യവും ഉൻമൂലനം ചെയ്യാനുള്ള സംഘപരിവാർ അജൻഡയ്ക്ക് അങ്ങിനെ താൽക്കാലികമായെങ്കിലും വലിയ തിരിച്ചടി നേരിട്ടിരിക്കുന്നു. ഇത് സാധ്യമായത് രാഹുൽ ഗാന്ധിയും ഇന്ത്യൻ നാഷനൽ കോൺഗ്രസും നേതൃത്വം നൽകിയ ഇന്ത്യാ മുന്നണിയുടെ ചെറുത്തുനിൽപ്പിലൂടെയാണ്. 2024ലെ പൊതുതിരഞ്ഞെടുപ്പിന്റെ ഏറ്റവും വലിയ നേട്ടവും മറ്റൊന്നല്ല. 

പക്ഷേ, ഈ പോരാട്ടത്തിൽ എവിടെ ആയിരുന്നു സിപിഐയുടെ സ്ഥാനം? ഇന്ത്യാ മുന്നണിയുടെ ക്യാപ്റ്റൻ രാഹുൽ ഗാന്ധിക്കെതിരെ വയനാട്ടിൽ ബിജെപി സ്ഥാനാർഥിക്കൊപ്പം സിപിഐ സ്ഥാനാർത്ഥിയും രംഗത്തിറങ്ങിയതിന്റെ രാഷ്ട്രീയ സാംഗത്യമെന്താണ്? സ്വാതന്ത്ര്യ സമരകാലത്ത് ആർഎസ്എസിനും ഇന്ത്യൻ കമ്യൂണിസ്റ്റ് പാർട്ടിക്കും, മഹാത്മാ ഗാന്ധിയും ഇന്ത്യൻ നാഷണൽ കോൺഗ്രസും എങ്ങിനെ ഒരേസമയം ശത്രുക്കളായി മാറി എന്ന് മൺമറഞ്ഞ മാർക്സിസ്റ്റ് ചരിത്രപണ്ഡിതൻ പ്രഫ. ബിപൻചന്ദ്ര ഒരിക്കൽ ഒരഭിമുഖത്തിൽ ഈ ലേഖകനോട് ചോദിച്ചിരുന്നു. 

ഇടതിനെ സംബന്ധിച്ചിടത്തോളം പഴയ അതേ തലതിരിഞ്ഞ രാഷ്ട്രീയത്തിന്റെ തനിയാവർത്തനമല്ലേ 2024ൽ വയനാട്ടിലും സംഭവിച്ചത്? സിപിഎം എന്ന സ്റ്റാലിനിസ്റ്റ്/ സെക്ടേറിയൻ പ്രസ്ഥാനത്തിന് യോജിച്ചതും എന്നാൽ പി.സി. ജോഷി, എസ്.എ. ഡാങ്കെ തുടങ്ങിയ നേതാക്കളുടെ പാരമ്പര്യം പിന്തുടരേണ്ടുന്ന സിപിഐയെ പോലുള്ള ഒരു പ്രസ്ഥാനത്തിന് യോജിക്കാത്തതുമായ കാര്യങ്ങളാണ് ഇവിടെ സംഭവിച്ചു കൊണ്ടിരിക്കുന്നത്. എല്ലാം കൊണ്ടും ഒരു പുനർവിചിന്തനം ഒഴിച്ചുകൂടാത്തതായിരിക്കുന്നു. സിപിഐയെ സംബന്ധിച്ചിടത്തോളം അവസാന ബസും നഷ്ടമാകുമോ എന്ന രാഷ്ട്രീയ യാഥാർഥ്യം മുന്നിലുള്ളപ്പോൾ പ്രത്യേകിച്ചും. 

∙ വിഡ്ഢിയായത് സിപിഐ

ഇന്ത്യൻ കമ്യൂണിസ്റ്റ് പ്രസ്ഥാനം പിളർത്തി സിപിഎം രൂപീകരിക്കപ്പെട്ടതിന്റെ അറുപതാം വാർഷികമാണിത്. അന്ധമായ കോൺഗ്രസ് വിരോധം, പിന്നെ മാവോയോടുള്ള വിധേയത്വം. ഇത് രണ്ടുമാണ് ലളിതമായി പറഞ്ഞാൽ പിളർപ്പിലേക്ക് നയിച്ചത്. മാവോയുടെ ആഹ്വാനപ്രകാരമുള്ള ‘ഉടൻ വിപ്ലവ’ത്തിലായിരുന്നു സിപിഎമ്മിന്റെ ലക്ഷ്യം. കൽക്കട്ട തീസിസിന്റെ പ്രേതം സിപിഎമ്മിനെ വിടാതെ പിടികൂടിയിരുന്നു എന്ന് ചുരുക്കം. എന്നാൽ ഇന്ത്യൻ യാഥാർഥ്യം മറ്റൊന്നാണെന്നു വിശ്വസിച്ചവർ സിപിഐയിൽ ഉറച്ചു നിന്നു. 

സിപിഐയുടെ ഈ നിലപാട് ക്രമേണ സാമ്രാജ്യത്വത്തിനും രാജ്യത്തിനകത്തെ തീവ്രവലതുപക്ഷത്തിനുമെതിരായി കോൺഗ്രസുമായി ചേർന്നുള്ള രാഷ്ട്രീയ സഖ്യമായി പരിണമിച്ചു. ഈ രാഷ്ട്രീയത്തിന്റെ നേട്ടമാണ് 1970 മുതൽ ’77വരെ കേരളം അനുഭവിച്ചറിഞ്ഞ സി. അച്യുതമേനോൻ നയിച്ച രാജ്യത്തെ ആദ്യത്തെ മികച്ച കോൺഗ്രസ് - കമ്യൂണിസ്റ്റ് സർക്കാർ. 1978ൽ സിപിഐ ഈ നയം ഉപേക്ഷിച്ച് സിപിഎമ്മിനോടൊപ്പം ചേർന്നു. ഇത് സിപിഐയെ മാത്രമല്ല രാജ്യത്തെ ഫാഷിസ്റ്റ് വിരുദ്ധ പോരാട്ടത്തെത്തന്നെ ദുർബലമാക്കി.

സിപിഎം ആകട്ടെ ഒരു ഉടൻ വിപ്ലവ പദ്ധതിയും നടപ്പിലാക്കിയില്ലെന്ന് മാത്രമല്ല പാർലമെന്ററി പാതയിൽ മുന്നേറാനുള്ള ശ്രമങ്ങളിലും കേരളത്തിലെ അച്യുതമേനോൻ സർക്കാരിനെ അസ്ഥിരപ്പെടുത്താനുള്ള അക്രമ സമരങ്ങളിലും മാത്രം ശ്രദ്ധ കേന്ദ്രീകരിച്ചു. ഈ നിരാശയിലാണ് നക്സൽ പ്രസ്ഥാനം ഇന്ത്യയിൽ ഉടലെടുക്കുന്നത്. ദിശാബോധമില്ലാത്ത സിപിഎം നയങ്ങളുടെ നേർസൃഷ്ടിയാണ് ഇന്ത്യയിൽ നക്സലിസം. സിപിഐ എന്ന് സ്വന്തം നയം ഉപേക്ഷിച്ച് സിപിഎമ്മിനോടൊപ്പം ചേർന്നുവോ, അന്നാരംഭിച്ചു സിപിഐയുടെ പതനം. അതിന്ന് ദേശീയ പാർട്ടി സ്ഥാനം നഷ്ടപ്പെടുന്നതിൽ വരെ എത്തിയിരിക്കുന്നു. 

സിപിഎം പക്ഷേ ഇതിലൂടെ താൽക്കാലികമായിട്ടെങ്കിലും രാഷ്ട്രീയ നിലനിൽപ്പുണ്ടാക്കി. ഈ രാഷ്ട്രീയം കേട്ടാൽ സിപിഎം ‘അടിയന്തരാവസ്ഥ’ എന്ന് ആർത്തുവിളിച്ചു സിപിഐക്കു നേരെ കൊഞ്ഞനം കുത്തുമെന്നറിയാഞ്ഞിട്ടല്ല. സിപിഎം സഖാക്കളേ, പി.സി. ജോഷിയും എസ്.എ. ഡാങ്കെയും പറഞ്ഞതിനപ്പുറം ഇന്ത്യൻ രാഷ്ട്രീയം പോയിട്ടില്ല എന്നതാണ് യാഥാർഥ്യം! 

ഇന്ത്യ എന്ന ദേശരാഷ്ട്രം അന്നും ഇന്നും നേരിടുന്ന മുഖ്യപ്രശ്‍നം സാമ്രാജ്യത്വത്തിൽനിന്നും വർഗീയ ഫാഷിസത്തിൽനിന്നുമുള്ള ഭീഷണിയാണ്. അതിനെ ചെറുക്കാൻ എല്ലാ ജനാധിപത്യ മതേതരത്വ പാർട്ടികളുടെയും കൂട്ടായ്മയാണ് ആവശ്യം. ഇതാണ് ജോഷി - ഡാങ്കെ ലൈനിനിന്റെ കാതൽ. സിപിഎമ്മും സിപിഐയും നിലനിൽപിനായി ഇന്ന് നടപ്പിലാക്കി കൊണ്ടിരിക്കുന്ന നയം ഫലത്തിൽ ഇതല്ലാതെ മറ്റെന്താണ്? അപ്പോൾ സിപിഎം ’64 ൽ എന്തിനു പാർട്ടി പിളർത്തി? സിപിഐ ’78 ൽ എന്തിന്, സ്വന്തം നയമായിരുന്ന, കോൺഗ്രസിനോട് ‘ഐക്യവും സമരവുമെന്ന’ നയം മാറ്റി?