സെഞ്ചുറി നേടിയ ഡിവില്ലിയേഴ്സിന്റെ ആഹ്ലാദം
പോർട്ട് എലിസബത്ത് ∙ ദക്ഷിണാഫ്രിക്കയ്ക്ക് എതിരെ രണ്ടാം ക്രിക്കറ്റ് ടെസ്റ്റിൽ ഓസ്ട്രേലിയ പ്രതിസന്ധിയിൽ. രണ്ടാം ഇന്നിങ്സിൽ അഞ്ചു വിക്കറ്റു നഷ്ടമായ അവർ 180 റൺസ് നേടിയിട്ടുണ്ട്. അഞ്ചു വിക്കറ്റ് ബാക്കി നിൽക്കെ 41 റൺസിന്റെ ലീഡ് മാത്രം. മൂന്നു വിക്കറ്റെടുത്ത കാഗിസോ റബാദയാണ് ഓസ്ട്രേലിയൻ ബാറ്റിങ് നിരയുടെ നടുവൊടിച്ചത്. ആദ്യ ഇന്നിങ്സിൽ അഞ്ചു വിക്കറ്റ് നേടിയ റബാദയ്ക്ക് ഈ ടെസ്റ്റിൽ എട്ടു വിക്കറ്റായി.
ഓസ്ട്രേലിയ ആദ്യ ഇന്നിങ്സിൽ നേടിയ 243 റൺസിനു മറുപടിയായി ദക്ഷിണാഫ്രിക്ക 382 റൺസെടുത്തിരുന്നു. ഏറെക്കാലത്തിനു ശേഷം ഫോമിലെത്തിയ ഡിവില്ലിയേഴ്സ് നേടിയ മിന്നും സെഞ്ചുറി(126 നോട്ടൗട്ട്)യാണ് ദക്ഷിണാഫ്രിക്കൻ കുതിപ്പിന്റെ അടിത്തറ. വെർനോൻ ഫിലാൻഡറിനൊപ്പം(36) എട്ടാം വിക്കറ്റിൽ 84 റൺസെടുത്ത ഡിവില്ലിയേഴ്സ് മഹാരാജിനൊപ്പം(30) ഒൻപതാം വിക്കറ്റിൽ 58 റൺസ് കൂട്ടുകെട്ടിലും പങ്കാളിയായി. 146 പന്തുകൾ നേരിട്ട ഡിവില്ലിയേഴ്സ് 20 ബൗണ്ടറിയും ഒരു സിക്സറുമടക്കമാണ് ടെസ്റ്റിൽ തന്റെ 22–ാം സെഞ്ചുറി കണ്ടെത്തിയത്.
