രണ്ടു ടീമുകളിലായി ഇരുപത്തിരണ്ടു പേർ ഒരു പന്തിനു പിന്നാലെ ഗോൾ തേടി പായുന്ന ഫുട്ബോളിൽ ഡ്രിബ്ലിങ്ങിലും ടാക്ലിങ്ങിലും മാത്രമൊതുങ്ങുന്നില്ല ആവേശകാഴ്ചകൾ. വികാരവിക്ഷോഭങ്ങളുടെ വേലിയേറ്റവും ഇറക്കവും കാണുന്ന കടലാണ് ഫുട്ബോൾ മൈതാനം. റഷ്യ രചിക്കുന്ന കാൽപന്തുകളിയുടെ കഥക്കൂട്ടിലെ നവരസക്കാഴ്ചകളിലൂടെ.
∙ശൃംഗാരം
പ്ലീസ് സർ, പ്ലീസ് !
കോസ്റ്ററിക്കയുടെ കടുകട്ടി പ്രതിരോധവും ഗോളി െകയ്‌ലർ നവാസിന്റെ മികവും വലച്ച മൽസരത്തിനിടെ റഫറിയിൽ നിന്ന് അനുകൂലതീരുമാനം തേടുന്ന ബ്രസീൽ താരം നെയ്മർ. സെന്റ് പീറ്റേഴ്സ്ബർഗ് സ്റ്റേഡിയത്തിൽ നടന്ന മൽസരത്തിന്റെ ഇൻജ്വറി ടൈമിൽ നെയ്മറും കുടീഞ്ഞോയും നേടിയ ഗോളോടെ ബ്രസീൽ വിജയതീരമണഞ്ഞു.
∙കരുണം
ജപ്പാൻ, യൂ ടൂ...
മൊർഡോവിയ അരീനയിൽ ജപ്പാനെതിരെ നടന്ന മൽസരത്തിൽ നിരാശനായി നീങ്ങുന്ന കൊളംബിയൻ സ്ട്രൈക്കർ കാർലോസ് ബാക്ക. ജപ്പാന്റെ അവിശ്വസനീയമായ കുതിപ്പിൽ കരുത്തരായ കൊളംബിയ തകർന്നടിഞ്ഞു ആ മൽസരം.
∙വീരം
ഓഹ്...സീസ് !
സമാര അരീനയിൽ െഡൻമാർക്കിനെ ഞെട്ടിച്ച ഗോൾ നേടിയ ശേഷം ഓസ്ട്രേലിയൻ താരം മിലെ യെഡിനാക്കിന്റെ ആവേശാഘോഷം. കരുത്തരായ െഡൻമാർക്കിനെതിരെ തുടക്കത്തിലേ ലീഡ് വഴങ്ങിയ ഓസ്ട്രേലിയയ്ക്കു യെഡിനാക്കിന്റെ ഗോൾ സമനില സമ്മാനിച്ചു.
∙രൗദ്രം
ഗർർ....മൻ
നിലവിലെ ജേതാക്കളായ ജർമനിയുടെ ജീവനെടുത്തുപാഞ്ഞ സ്വീഡനെ വീഴ്ത്തിയ ടോണി ക്രൂസിന്റെ മിന്നൽപ്പിണർ ഷോട്ടിനു ശേഷം സഹതാരം തോമസ് മുള്ളറുടെ വിജയാക്രോശം. കളി തീരാൻ ഏതാനും നിമിഷങ്ങൾ മാത്രം ബാക്കിനിൽക്കേയാണു ക്രൂസിന്റെ മിസൈൽ പ്രഹരം സ്വീഡിഷ് വല കീഴടക്കിയത്.
∙ഹാസ്യം
ഗോൾ, ഗോൾ, ഗോൾ
പോളണ്ടിനെതിരെ തകർപ്പൻ ജയവുമായി ലോകകപ്പിൽ മിന്നൽതിരിച്ചുവരവ് നടത്തിയ കൊളംബിയയുടെ യുവാൻ ക്വാഡ്രാഡോയും യെറി മിനയും നൃത്തച്ചുവടുകളുമായി ഗോൾ ആഘോഷിക്കുന്നു. ഇരുവരും ഗോളടിച്ച മൽസരത്തിൽ എതിരില്ലാത്ത മൂന്നു ഗോളുകൾക്കാണ് കൊളംബിയ പോളണ്ടിനെ നിശബ്ദരാക്കിയത്.
∙ഭയാനകം
പോയിന്റ് / ബ്ലാങ്ക് ?
സെന്റ് പീറ്റേഴ്സ് ബർഗ് സ്റ്റേഡിയത്തിൽ നടന്ന മൽസരത്തിൽ പന്തുമായെത്തിയ ബ്രസീൽ താരം നെയ്മറിനെ മുഖാമുഖം നേരിടുന്ന കോസ്റ്ററിക്കൻ ഗോൾകീപ്പർ കെയ്‌ലർ നവാസ്. ഗോൾ ഭീഷണി വിതച്ച നെയ്മറിന്റെ ഈ നീക്കം നവാസ് വിഫലമാക്കി.
∙ബീഭത്സം
ഫൗൾബോൾ !
റോസ്റ്റോവ് അരീനയിൽ നടന്ന മൽസരത്തിൽ ബ്രസീൽ താരം നെയ്മറിനെ വീഴ്ത്തിയ സ്വിറ്റ്സർലൻഡ് മിഡ്ഫീൽഡർ വലോൻ ബെഹ്‌രാമിയുടെ ഫൗൾ. നെയ്‌മറിനു നേരെ 11 തവണ വഴിവിട്ട പ്രതിരോധത്തിനു മുതിർന്ന സ്വിസ് ടീം ഈ മൽസരത്തിൽ ബ്രസീലിനെ സമനിലയിൽ തളച്ചു.
∙അദ്ഭുതം
കവാനീ ഡാ !
സമാരയിൽ ആതിഥേയരായ റഷ്യയ്ക്കെതിരെ യുറഗ്വായ് ആക്രമണം നയിച്ചത് എഡിൻസൻ കവാനിയായിരുന്നു, പക്ഷേ ഗോൾ മാത്രം അകന്നുനിന്നു. ഒടുവിൽ ഇൻജ്വറി ടൈമിൽ കവാനിയെ ഭാഗ്യം തുണച്ചു. തുടരെ മൂന്നാം ലോകകപ്പിലും സ്കോർ ചെയ്ത കവാനിയു‍ടെ നിർവൃതിനിമിഷം.
∙ശാന്തം
ഞാനിതെത്ര ....
ലോകകപ്പിൽ ബൽജിയത്തിന്റെ സ്കോറിങ് മെഷീനായി മാറിക്കഴിഞ്ഞ സ്ട്രൈക്കർ റൊമേലു ലുക്കാകു സ്പാർട്ടക് സ്റ്റേഡിയത്തിൽ തുണീസിയയ്ക്കെതിരെ വല കുലുക്കിയ ശേഷം. കളിച്ച രണ്ടു കളികളിലും ഇരട്ടഗോളുകളുമായാണ് ലുക്കാകു തിളങ്ങിയത്.