കറുത്തുതടിച്ച കുട്ടി പിന്നിൽ നിൽക്കെന്ന് പരിഹാസം: മോഡലിങ്ങിൽ ദേശീയ റെക്കോർഡുമായി അഭിരാമിയുടെ മറുപടി

കുട്ടിക്കാലത്ത് നഷ്ടമായ ആത്മവിശ്വാസം, വർഷങ്ങളെടുത്ത് തിരിച്ചുവരവ്

ചെറുപ്പം മുതൽ മോഡലിങ് വളരെയധികം ഇഷ്ടമാണ്. പക്ഷേ, പലതരത്തിലുള്ള അവഗണനകൾ നേരിട്ടത് പിറകോട്ടടിച്ചു. ഒരിക്കലും ക്യാമറയുടെ മുൻപിൽ വരാൻ സാധിക്കുമെന്ന് വിശ്വസിച്ചിരുന്ന ഒരാളായിരുന്നില്ല ഞാൻ. പക്ഷേ, അഭിനയം ഇഷ്ടമായിരുന്നു. സ്ക്രീനിന്റെ മുന്നിലെത്തണം എന്നത് ഒരു ആഗ്രഹമായിരുന്നു. മോഡലിങ് എന്നത് ചിന്തയിലുണ്ടായിരുന്നില്ല. ഈ രംഗത്തേക്ക് വളരെ അപ്രതീക്ഷിതമായാണ് വന്നത്. ആക്ടിങ് വളരെയധികം ഇഷ്ടപ്പെടുന്ന ഒരു വ്യക്തിയാണ്. ആക്ടിങ്ങിനു വേണ്ടി ഒരുപാട് പരിശ്രമിച്ചിരുന്ന സമയത്ത് മിസ് മില്ലേനിയൽ ഇന്ത്യ എന്നൊരു ഇവന്റിന് റജിസ്റ്റർ ചെയ്തു. അതില്‍ മിസ് മില്ലേനിയൽ കേരള എന്നൊരു പേജന്റിൽ വിജയിയായി. അങ്ങനെയാണ് മോഡലിങ്ങിലേക്ക് എത്തുന്നത്. പത്താംക്ലാസിൽ വച്ച് ഒരു ഫോട്ടോ എടുത്തപ്പോൾ പോലും അത് ആരെയും കാണിക്കരുതെന്നായിരുന്നു ഞാൻ പറഞ്ഞത്. ആത്മവിശ്വാസം വീണ്ടെടുക്കാൻ ഒരുപാട് സമയമെടുത്തു. എപ്പോഴൊക്കെയോ പതുക്കെ ഞാൻ എന്നെ തന്നെ ഇഷ്ടപ്പെടാൻ തുടങ്ങി. എന്റെ കുറവുകളെന്ന് മറ്റുള്ളവർ പറഞ്ഞതിനെ ഞാൻ ഇഷ്ടപ്പെടാൻ തുടങ്ങി. അങ്ങനെയാണ് ഒരുപാട് വർഷങ്ങൾക്കു ശേഷം ഞാൻ ക്യാമറയെ അഭിമുഖീകരിക്കാനും അതിൽ സന്തോഷം കണ്ടെത്താനും പഠിച്ചത്.