കുശ്ബു.
യഥാർഥ്യം മറച്ചുവെച്ച് കുശ്ബു ഇത്രയും കാലം എല്ലാവരെയും പറ്റിക്കുകയായിരുന്നുവെന്ന കണ്ടുപിടുത്തവുമായെത്തിയ ട്രോളന്മാർക്ക് താരത്തിന്റെ ചുട്ടമറുപടി. തെന്നിന്ത്യൻ താരവും കോൺഗ്രസ് പാർട്ടിയുടെ ദേശീയ വക്താവുമായ കുശ്ബുവിനെതിരെയാണ് ആരോപണങ്ങൾ. ഖുശ്ബുവിന്റെ യഥാർഥ പേര് നഖറ്റ് ഖാൻ എന്നാണെന്നും ഇതു മറച്ചുവെച്ചാണ് താരം ഇവിടെവരെയെത്തിയത് എന്നു തുടങ്ങിയ അടിസ്ഥാന രഹിതമായ ആരോപണങ്ങളാണ് ചിലർ ഉന്നയിച്ചത്.
ആരോപണങ്ങളെക്കുറിച്ച് കുശ്ബു സമൂഹമാധ്യമങ്ങളിലൂടെ പ്രതികരിച്ചതിങ്ങനെ ;- ''ചില ട്രോളന്മാർ എന്നെക്കുറിച്ച് പുതിയ ചില കണ്ടുപിടുത്തങ്ങൾ നടത്തിയിരിക്കുന്നു എന്റെ പേര് നഖറ്റ് ഖാൻ എന്നാണെന്ന്... യുറേക്ക!!! വിഡ്ഢികളേ അതെനിക്കെന്റെ അച്ഛനുമമ്മയും ഇട്ട പേരാണ്. അതേ ഞാൻ ഒരു ഖാനാണ് അതുകൊണ്ടെന്താ? നിങ്ങൾ ഉണരൂ ഇത് 47 വർഷം പഴക്കമുള്ള സത്യമാണ്.''
മഹാരാഷ്ട്രയിലെ മുംബൈയിൽ ജനിച്ച കുശ്ബു ഇതുവരെ വിവിധ ഭാഷകളിലായി ഇരുന്നൂറിലധികം ചിത്രങ്ങളിൽ അഭിനയിച്ചിട്ടുണ്ട്. തന്റെ യഥാർഥ പേരും വ്യക്തിത്വവും ഒളിപ്പിച്ചുവെച്ചിട്ടുമല്ല അവർ കരിയറിൽ നേട്ടങ്ങൾ സ്വന്തമാക്കിയത്. തമിഴ്നാട്ടിൽ ഇതൊരു രഹസ്യമേയല്ല. കുശ്ബുവിനോട് ആരാധന മൂത്ത തമിഴ്ജനത അവർക്കുവേണ്ടി അമ്പലംവരെ പണിതിട്ടുണ്ട്. ഇത് ആദ്യമായല്ല കുശ്ബുവിനെതിരെ ഇങ്ങനെയുള്ള ആരോപണങ്ങൾ ഉയർന്നു വരുന്നത്. അതിനോടൊക്കെ ശക്തമായ ഭാഷയിൽത്തന്നെ കുശ്ബു പ്രതികരിക്കുകയും ചെയ്തിട്ടുണ്ട്.
