കാണികളുടെ കരഘോഷത്തിൽ മതിമറന്ന് റാംപിലൂടെ നടന്നു വരുമ്പോൾ ആ യുവതിക്ക് തനിക്കു സംഭവിച്ചുകൊണ്ടിരിക്കുന്ന അപകടത്തെക്കുറിച്ച് യാതൊരു ധാരണയുമില്ലായിരുന്നു. സംഘാടകരുടെയും മറ്റു പുരുഷ മോഡലുകളുടെയും സമയോചിതമായ പ്രവർത്തികൊണ്ട് മാത്രം മോഡലിന് ജീവൻ നഷ്ടപ്പെട്ടില്ല. എൽസാൽവദോറിൽ നടന്ന സൗന്ദര്യ മത്സരത്തിലായിരുന്നു സംഭവം. വിശാലമായ ഹെയർഡ്രസ്സോടെയാണ് മോഡൽ റാംപ് വാക്ക് നടത്തിയത്.
റാംപ് വാക്കിനിടെയാണ് വേദിയിൽ ദീപമേന്തി നിന്ന പുരുഷ മോഡലുകളുടെ ദീപത്തിൽ നിന്ന് അവളുടെ ഹെയർഡ്രസ്സിലേക്ക് തീ പടർന്നത്. ഈ സംഗതിയൊന്നുമറിയാതെ മോഡൽ റാംപ് വാക്ക് തുടർന്നു. അപകടം ശ്രദ്ധയിൽപ്പെട്ട സംഘാടകരും പുരുഷമോഡലുകളും ചേർന്ന് വേഗത്തിൽ തീ അണച്ചു. ജീവൻ തന്നെ നഷ്ടമായേക്കാമായിരുന്ന ആ വലിയ ദുരന്തത്തിൽ നിന്ന് തലനാരിഴയ്ക്കാണ് അവർ രക്ഷപെട്ടത്.
മോഡലിന്റെ കോസ്റ്റ്യൂം ഒട്ടുമുക്കാലും കത്തിപ്പോയെങ്കിലും അപകടമൊന്നും സംഭവിക്കാത്തതിന്റെ ആശ്വാസത്തിലാണ് സംഘടാകർ. അപ്രതീക്ഷിതമായ അപകടമുണ്ടാക്കിയതിന്റെ ഞെട്ടലിൽ നിന്ന് വേഗം തന്നെ മുക്തരാവുകയും അൽപ്പസമയത്തിനു ശേഷം മത്സരം തുടരുകയും ചെയ്തു.
