ബൈസൺവാലിക്കാർ മഴ കണ്ടിട്ട് 4 മാസം!

ബൈസൺവാലി∙ പഞ്ചായത്തിലെ ഇരുപതേക്കർ, കാക്കാക്കട, ചങ്ങനാശേരിക്കട, മുട്ടുകാട് ഭാഗത്ത് മഴ പെയ്തിട്ട് 4 മാസം കഴിഞ്ഞു. സമീപ പഞ്ചായത്തുകളായ രാജകുമാരി, ചിന്നക്കനാൽ, രാജാക്കാട് എന്നിവിടങ്ങളിലെല്ലാം വേനൽമഴ ലഭിച്ചെങ്കിലും ബൈസൺവാലിയിൽ മഴ മാറിനിൽക്കുകയാണ്. ആകാശത്ത് കാർമേഘങ്ങൾ മൂടുമെങ്കിലും മഴ പെയ്യുന്നില്ല. 

മുൻ വർഷങ്ങളിൽ ഹൈറേഞ്ചിൽ സമൃദ്ധമായി വേനൽ മഴ ലഭിച്ചിരുന്ന പ്രദേശങ്ങളാണിത്. മഴ ലഭിക്കാത്തതിനാൽ ഏക്കർ കണക്കിന് ഏലത്തോട്ടങ്ങളാണ് നശിച്ചത്. ചുറ്റുമുള്ള പ്രദേശങ്ങളിൽ മഴ ലഭിച്ചിട്ടും ഇവിടെ മഴ ലഭിക്കാത്തത് നാട്ടുകാരിൽ ആശങ്ക സൃഷ്ടിക്കുന്നു. ബൈസൺവാലി മഴനിഴൽ പ്രദേശമായി മാറിയോ എന്ന ആശങ്കയാണ് നാട്ടുകാർക്ക്. മേഖലയിൽ ശുദ്ധജലക്ഷാമവും രൂക്ഷമാണ്.