ഓടിക്കൊണ്ടിരുന്ന ലോറിക്ക് തീപിടിച്ചു; ഡ്രൈവർ തലനാരിഴയ്ക്ക് രക്ഷപ്പെട്ടു
Mail This Article
പോത്തൻകോട് ∙ ഓടിക്കൊണ്ടിരുന്ന ടോറസ് ലോറിയിൽ തീപിടിച്ചു. ഡ്രൈവർ കടയ്ക്കാവൂർ തെക്കുംഭാഗം കാട്ടിൽ വീട്ടിൽ കെ.എസ്.അരുൺ തലനാരിഴയ്ക്ക് രക്ഷപ്പെട്ടു. ഇന്നലെ ഉച്ചയ്ക്ക് 12നു കഴക്കൂട്ടം–തൈക്കാട് ബൈപാസിൽ പോത്തൻകോട് ജംക്ഷനു സമീപത്തായാണ് സംഭവം. ക്യാബിനിലേക്ക് പിന്നിൽ നിന്നും പുക വരുന്നത് കണ്ടതോടെ ലോറി നിർത്തി അരുൺ പുറത്തിറങ്ങി. ലോറിയിലുണ്ടായിരുന്ന അഗ്നിശമന യന്ത്രം ഉപയോഗിച്ചെങ്കിലും തീ അണയ്ക്കാനായില്ല.
സംഭവം അറിഞ്ഞ് പോത്തൻകോട് പൊലീസ് സ്ഥലത്തെത്തി ഇരുവശത്തും വാഹനങ്ങൾ തടഞ്ഞിട്ടു. കഴക്കൂട്ടത്തു നിന്നും രണ്ട് യൂണിറ്റ് അഗ്നിരക്ഷാ സേന ഗതാഗതക്കുരുക്കിൽപെട്ട് 20 മിനിറ്റ് വൈകിയാണ് എത്തിയത്. വൈകാതെ തന്നെ തീ പൂർണമായും അണച്ചെങ്കിലും ലോറിയുടെ മുൻഭാഗം പൂർണമായും കത്തി നശിച്ചു. ഡീസൽ ടാങ്കിലേക്ക് തീ പടരാതിരുന്നതിനാൽ വൻ ദുരന്തം ഒഴിവായി. വിഴിഞ്ഞത്തേക്ക് കടയ്ക്കൽ കുമ്മിൾ എന്ന സ്ഥലത്തു നിന്നും പാറ കയറ്റാനായി പോകവെയാണ് തീപിടിച്ചത്. ഷോർട്ട് സർക്യൂട്ടാണ് കാരണം എന്നാണ് പ്രാഥമിക നിഗമനം.