ബീനാച്ചി - പനമരം റോഡിൽ അപകടം തുടർക്കഥ

നടവയൽ ∙ ബീനാച്ചി - പനമരം റോഡിൽ അപകടങ്ങൾ ഏറുന്നു. കഴിഞ്ഞ ദിവസം രാത്രി കാറും ലോറിയും കൂട്ടിയിടിച്ചുണ്ടായ അപകടമാണ് ഒടുവിലത്തേത്. ഇതിൽ കാർ യാത്രികനായ പാലക്കാട് സ്വദേശിയായ യുവാവ് മരിച്ചിരുന്നു. ചീങ്ങോട് അങ്ങാടിയിൽ ബസ് കാത്തിരിപ്പ് കേന്ദ്രത്തിന് മുന്നിലായാണ് അപകടമുണ്ടായത്.കിഫ്‌ബിയിൽ ഉൾപ്പെടുത്തി 52 കോടി ചെലവഴിച്ച് 4 വർഷം മുൻപ് വീതി കൂട്ടി പ്രവൃത്തി ആരംഭിച്ച റോഡിലാണു പണി തീരും മുൻപ് ചെറുതും വലുതുമായ അപകടങ്ങൾ ഏറെയും.ആദ്യഘട്ട ടാറിങ് നടത്തിയ ഭാഗത്ത് അടയാളങ്ങളോ സൂചന ബോർഡുകളോ ഇല്ലാത്തതും പണിയിലെ അപാകതയുമാണ് അപകടം വർധിക്കാൻ കാരണമെന്നു നാട്ടുകാർ പറയുന്നു. ദിനംപ്രതി ഉണ്ടാകുന്ന അപകടങ്ങൾ കുറയ്ക്കുന്നതിന് അധികൃതരുടെയും കരാറുകാരന്റെയും ഭാഗത്തുനിന്ന് നടപടിയുണ്ടാകണമെന്നാണ് ആവശ്യം