തിരക്കിന് കുറവില്ല; ഗ്ലോബൽ വില്ലേജ് 8 വരെ നീട്ടി
Mail This Article
ദുബായ് ∙ ഉപഭോക്താക്കളുടെ വർധിച്ച ആവശ്യം പരിഗണിച്ച് ഗ്ലോബൽ വില്ലേജ് മേയ് 8 വരെ നീട്ടി. ഇന്നു അടയ്ക്കാനിരിക്കെയാണ് 3 ദിവസത്തേക്കു കൂടി നീട്ടാൻ അധികൃതർ അനുമതി നൽകിയത്. ഇതനുസരിച്ച് ആഗോളഗ്രാമത്തിലെ വിസ്മയ കാഴ്ചകൾ ഈ മാസം 8 വരെ ആസ്വദിക്കാം. സമാപനത്തോടനുബന്ധിച്ച് 12 വയസ്സിനു താഴെയുള്ള കുട്ടികൾക്ക് സൗജന്യ പ്രവേശനം അനുവദിക്കുന്ന കിഡ്സ് ഗോ ഫ്രീ ക്യാംപെയ്ൻ തുടങ്ങിയതും ജനത്തിരക്കു കൂടാൻ കാരണമായി.
കലാസാംസ്കാരിക പരിപാടികളും വിനോദവും വിജ്ഞാനവും സമന്വയിച്ച ഗ്ലോബൽ വില്ലേജിൽ വിവിധ രാജ്യങ്ങളുടെ പങ്കാളിത്തമുള്ള 27 പവിലിയനുകൾക്കൊപ്പംപുറമെ ഇരുനൂറിലേറെ റൈഡുകളും 250ലേറെ റസ്റ്ററന്റുകളുമാണ് ജനങ്ങളെ ആകർഷിക്കുന്നത്. ഞായർ മുതൽ ബുധൻ വരെയുള്ള ദിവസങ്ങളിൽ വൈകിട്ട് 4 മുതൽ 12 വരെയും വ്യാഴം, വെള്ളി, ശനി ദിവസങ്ങളിൽ പുലർച്ചെ ഒന്നുവരെയുമാണ് പ്രവേശനം.