അമേരിക്കൻ മലയാളി ജീവിതങ്ങളെ അടയാളപ്പെടുത്തിയ സാഹിത്യക്കാരി റീനി മമ്പലം അന്തരിച്ചു

ഫിലഡൽഫിയ ∙  പ്രശസ്ത സാഹിത്യക്കാരിയും കോട്ടയം ചിങ്ങവനം സ്വദേശിനിയുമായ  റീനി മമ്പലം യുഎസിൽ അന്തരിച്ചു. നാളെ കനക്‌ടികട്ടിലെ ബ്രൂക്ക്ഫീൽഡ് ഫ്യൂണറൽ ഹോമിൽ രാവിലെ ഒൻപതിന് സംസ്കാരം നടക്കും. ഇന്ന് വൈകിട്ട് അഞ്ച് മുതൽ എട്ട് മണി വരെ ബ്രൂക്ക്ഫീൽഡ് ഫ്യൂണറൽ ഹോമിൽ(, 786 ഫെഡറൽ റോഡ്, ബ്രൂക്ക്ഫീൽഡ്, CT 06804) പൊതുദർശനം ഉണ്ടായിരിക്കും. ഭർത്താവ് ജേക്കബ് തോമസ്. മക്കൾ: വീണ, സപ്ന. റീനി.

റീനി മമ്പലത്തിന്‍റെ കഥകളും, നോവലുകളും, ലേഖനങ്ങളും, യാത്രാ വിവരണങ്ങളും മനോരമ വീക്കിലി, വനിത മാസിക തുടങ്ങിയ നിരവധി മാധ്യമങ്ങളിൽ പ്രസിദ്ധീകരിച്ചിട്ടുണ്ട്. . റീനിയുടെ ആദ്യ ചെറുകഥാ സമാഹാരം 'റിട്ടേണ്‍ ഫ്‌ലൈറ്റ്', 2010 ലെ നോര്‍ക്ക റൂട്ട്‌സിന്റെ അവാര്‍ഡ് നേടിയിരുന്നു. 2015 ലാണ് അമേരിക്കന്‍ പശ്ചാത്തലത്തില്‍ എഴുതിയ 'അവിചാരിതം' എന്ന നോവല്‍ പ്രസിദ്ധീകരിക്കുന്നത്. 2018 ല്‍ 'ശിശിരത്തില്‍ ഒരു ദിവസം' എന്ന ചെറുകഥാ സമാഹാരം പുറത്തിറങ്ങി.  2014 ല്‍ ഫോമയുടെ ലിറ്റററി അവാര്‍ഡ്, കനക്‌ടികട്ട് കേരളാ അസോസിയേഷന്റെ ലിറ്റററി അവാര്‍ഡ്, മേരിലാൻഡ് മലയാളി അസോസിയേഷന്റെ ചെറുകഥാ അവാര്‍ഡ് തുടങ്ങിയവ ലഭിച്ചിട്ടുണ്ട്. 

∙ റീനിയുടെ വിയോഗത്തിൽ അനുശോചിച്ച് സംഘടനകൾ
റീനി മമ്പലത്തിന്‍റെ വേർപാടിൽ  ഫിലഡൽഫിയ മലയാള സാഹിത്യ വേദി (ലാമ്പ്) അനുശോചിച്ചു. ലിറ്റററി അസോസിയേഷൻ ഓഫ് ഫിലഡൽഫിയ മലയാളം (ലാമ്പ്, ഫിലഡൽഫിയ മലയാള സാഹിത്യ വേദി) പ്രസിഡന്‍റ്  പ്രഫസർ കോശി തലയ്ക്കൽ, റീനി മമ്പലത്തിന്‍റെ  രചനാ വൈഭവത്തെ പ്രകീർത്തിച്ച് സംസാരിച്ചു. ജോർജ് നടവയൽ അനുശോചന പ്രമേയം അവതരിപ്പിച്ചു. അംഗങ്ങളായ നീനാ പനയ്ക്കൽ, അനിതാ പണിക്കർ, ലൈലാ അലക്സ്, ജോർജ് ഓലിക്കൽ, സോയാ നായർ എന്നിവരും അനുശോചനം രേഖപ്പെടുത്തി.