കേബിൾക്കെണി; കേബിളിൽ തട്ടി വീണ് അപകടം തുടർക്കഥയാകുന്നു
Mail This Article
മാവേലിക്കര ∙ റോഡരികിൽ അലക്ഷ്യമായി ഇട്ടിരിക്കുന്ന കേബിളുകൾ അപകട ഭീഷണിയാകുന്നു. മാവേലിക്കര നഗരസഭ–കൊറ്റാർകാവ്–പുതിയകാവ് റോഡിലാണു വൈദ്യുതി വിതരണ കേബിളുകൾ അപകട ഭീഷണിയാകുന്നത്. പുതിയകാവ് ബ്ലോക്ക് ഓഫിസിനു സമീപമുള്ള പ്രധാന റോഡിൽ ടാറിങ്ങിലേക്കു കയറ്റിയാണ് ഏരിയൽ ബഞ്ച്ഡ് കേബിളുകളുടെ വലിയ റോളുകൾ ഇട്ടിരിക്കുന്നത്. ഇവിടെ തെരുവു വിളക്കു പ്രകാശിക്കാത്തതിനാൽ രാത്രി പുതിയകാവിൽ നിന്നെത്തി കൊറ്റാർകാവ് ഭാഗത്തേക്കു തിരിയുന്ന വാഹനങ്ങൾ കേബിൾ റോളിന്റെ തടിചട്ടത്തിൽ ഇടിച്ച് അപകടമുണ്ടായി.
കൊറ്റാർകാവ് ഭാഗത്തു കഴിഞ്ഞ ദിവസം കേബിളുകൾ വൈദ്യുത തൂണുകളിൽ സ്ഥാപിക്കുന്ന ജോലികൾക്കു ശേഷം റോഡരികിൽ ചുരുട്ടി വച്ചിരുന്നു. ഇതു പിന്നീടു റോഡിലേക്കു വീണ് അപകട ഭീഷണിയായി. പുലർച്ചെ ഇതുവഴി പോയ ഇരുചക്രവാഹനയാത്രക്കാർ കേബിളിൽ തട്ടി വീണ് അപകടം ഉണ്ടായി.അപകടക്കെണിയായി റോഡിൽ കിടന്ന കേബിളുകൾ അതുവഴി എത്തിയവരാണു ചുരുട്ടി വശത്തേക്കു മാറ്റിയത്.