പാറക്കടവ് പുഴ വരണ്ടു; ജലക്ഷാമം രൂക്ഷം

നാദാപുരം∙ കൊടും ചൂടിനിടയിൽ പാറക്കടവ് പുഴയും വറ്റി. മയ്യഴി ഭാഗത്തേക്കൊഴുകുന്ന പുഴ പലയിടങ്ങളിലും മുറിഞ്ഞു. ചേട്യാലക്കടവ് ഭാഗത്ത് പാലം പണി നടക്കുന്നതിനാൽ നീരൊഴുക്ക് കുറവാണ്. പുഴയെ ആശ്രയിച്ചിരുന്ന നാട്ടുകാർ ഇതോടെ കടുത്ത വരൾച്ചയെ അഭിമുഖീകരിക്കുകയാണ്. പുഴയിലേക്ക് ഒഴുകിയെത്തുന്ന തോടുകൾ പലതും നേരത്തെ വറ്റി. പലയിടങ്ങളിലും തടയണകൾ പണിത് പുഴയിലെ വെള്ളം തടഞ്ഞു നിർത്തുന്ന പതിവുണ്ടെങ്കിലും പാറക്കടവ് ഭാഗത്ത് ഇത്തരം തടയണകൾ ഇല്ലാത്തതും പുഴ വരളാൻ കാരണമായി.