പൂരത്തിരക്കിനിടെ പാർക്ക് ചെയ്തിരുന്ന കാർ 20 മീറ്റർ പിന്നോട്ടുനീങ്ങി; രക്ഷകനായി തിരുവില്വാമല സ്വദേശി

തൃശൂർ ∙ നഗരത്തിൽ പാർക്ക് ചെയ്ത കാർ പൂരത്തിരക്കിനിടെ തനിയെ പിന്നോട്ടുനീങ്ങിയതു പരിഭ്രാന്തി പരത്തി.സെന്റ് തോമസ് കോളജ് റോഡിൽ കോളജിനോടു ചേർന്ന് പാർക്ക് ചെയ്ത കാറാണ് ഹാൻഡ് ബ്രേക്ക് ഇടാത്തതു മൂലം 20 മീറ്ററോളം പുറകോട്ടു നീങ്ങിയത്. ആളുകളെയോ മറ്റു വാഹനങ്ങളിലോ ഇടിക്കാതിരുന്നതിനാൽ അപകടം ഒഴിവായി. ഇന്നലെ രാത്രി ഒൻപതോടെയാണ് സംഭവം.

പിറകോട്ടു നീങ്ങുന്ന കാറിൽ ഡ്രൈവറില്ലെന്നു കണ്ട് തിരുവില്വാമല സ്വദേശിയായ യുവാവാണ് ആളെ വിളിച്ചുകൂട്ടിയത്. അപകടമൊഴിവാക്കാൻ കാറിനു പിന്നാലെ ഓടുന്നതിനിടെ യുവാവിന്റെ മൊബൈൽ ഫോൺ റോഡിൽ വീണു പൊട്ടുകയും ചെയ്തു. പിന്നീടു യുവാവും കോളജിനു എതിർവശത്തു പൂരക്കച്ചവടം ചെയ്തിരുന്നവരും ചേർന്നാണു തടഞ്ഞുനിർത്തി, ടയറിനു പുറകിൽ കല്ലുകളിട്ട് കാർ സുരക്ഷിതമാക്കിയത്.