സിവിൽ എൻജിനീയറിങ്ങിൽ ബിടെക്; ജോലി പശുവളർത്തൽ, ഇഷ്ടമുള്ള തൊഴിൽ സ്വീകരിക്കാൻ മടിക്കേണ്ടെന്ന് ശ്രീജിത്ത്

പെരുമ്പിലാവ് ∙ സിവിൽ എൻജിനീയറിങ്ങിൽ ബിടെക് ബിരുദം നേടിയ ശേഷം മറ്റു ജോലികൾക്കൊന്നും പോകാതെ പശു വളർത്തലിലേക്ക് തിരിഞ്ഞ പൊറവൂർ കൊളങ്ങര കൊങ്ങത്ത് ശ്രീജിത്തിന് 2023 നേട്ടങ്ങളുടെ വർഷം. 8 പശുക്കളും 28 ആടുകളും 3 ഏക്കർ നെൽക്കൃഷിയുമായി ഈ ചെറുപ്പക്കാരൻ വിജയത്തിന്റെ പാതയിലാണ്.

2020ലാണ് ശ്രീജിത് ബിടെക് പൂർത്തിയാക്കിയത്. ഉന്നത വിദ്യാഭ്യാസവും മികച്ച ജോലിയും ഉണ്ടായിരുന്ന പലരും കോവിഡ് സമയത്ത് പ്രതിസന്ധിയിലായതാണു ക്ഷീരോൽപാദനത്തിലേക്കും കൃഷിയിലേക്കും തിരിയാൻ ശ്രീജിത്തിനെ പ്രേരിപ്പിച്ചത്.ചെറുപ്പം മുതൽ വീട്ടിൽ പശുവുണ്ട്. ഇവയുടെ പരിപാലനം ഇഷ്ടവുമായിരുന്നു. 

പഠനം കഴിഞ്ഞതോടെ 5 പശുക്കളുമായി ഫാം തുടങ്ങുകയായിരുന്നു.രാവിലെ 5ന് ശ്രീജിത് തൊഴുത്തിൽ എത്തും. പശുക്കളെ കഴുകലും തൊഴുത്ത് വൃത്തിയാക്കലും എല്ലാം തനിച്ചാണ്. കറവ യന്ത്രം ഉണ്ടെങ്കിലും കൈകൊണ്ട് സ്വയം കറന്നെടുക്കാനാണ് ഇഷ്ടം. ഇഷ്ടമുള്ള തൊഴിൽ സ്വീകരിക്കാൻ വിദ്യാഭ്യാസമുള്ള ചെറുപ്പക്കാർ മടിക്കേണ്ടതില്ല എന്നാണു ശ്രീജിത്തിന്റെ അഭിപ്രായം.