ജി20യ്ക്ക് വില്ലനായി കുരങ്ങന്മാർ: തുരത്താൻ ‘ഒറിജിനൽ’ ലങ്കൂറിനെ ഇറക്കാനായില്ല, വേഷമിട്ട് ആളുകൾ

ശല്യക്കാരായ കുരങ്ങന്മാരെ തുരത്താൻ ജി20 ഉച്ചകോടിയോട് അനുബന്ധിച്ച് ഡൽഹിയിൽ വൻ നടപടികളാണ് സ്വീകരിച്ചിട്ടുള്ളത്. കുരങ്ങന്മാരുടെ പേടിസ്വപ്നമായ ലങ്കൂർ കുരങ്ങുകളുടെ കട്ടൗട്ടുകൾ നഗരത്തിൽ പലയിടത്തും സ്ഥാപിച്ചിട്ടുണ്ട്. കൂടാതെ, ലങ്കൂർ കുരങ്ങുകളുടെ വേഷമണിഞ്ഞ 30 പേരെയും വിവിധയിടങ്ങളിൽ വിന്യസിച്ചിട്ടുണ്ട്. ഇവർ ലങ്കൂർ കുരങ്ങുകളുടെ ശബ്ദമുണ്ടാക്കിയും ചേഷ്ടകൾ കാണിച്ചും കുരങ്ങന്മാരെ ഓടിക്കും. ഒറിജിനൽ ലങ്കൂർ കുരങ്ങന്മാരെ ഇറക്കുന്നതിൽ നിയമപരമായ തടസ്സം വന്നതോടെയാണ് ഇത്തരം നടപടികളെടുത്തത്. 

ജി20 നടക്കുന്ന പ്രദേശമെല്ലാം അതീവസുരക്ഷയിലാണ്. രാഷ്ട്രതലവന്മാർ താമസിക്കുന്ന ഹോട്ടലുകൾ, ജി20യുടെ പ്രധാനവേദിയായ പ്രഗതിമൈതാനത്തിലേക്കുള്ള പാത തുടങ്ങിയ ഇടങ്ങളിലെല്ലാം കുരങ്ങുകൾ സ്ഥാനം പിടിച്ചിരുന്നു. നിലവിൽ ഈ പ്രദേശങ്ങളിൽ നിന്നെല്ലാം കുരങ്ങന്മാരെ തുരത്തിയിട്ടുണ്ട്. ശാസ്ത്രീഭവൻ, കൗഡില്ല്യ മാർഗ്, റിജ് റോഡ് തുടങ്ങിയ സ്ഥലങ്ങളിൽ ഹനുമാൻ കുരങ്ങിന്റെ ചിത്രങ്ങൾ ഡൽഹി മുനിസിപ്പൽ കൗൺസിൽ സ്ഥാപിച്ചിട്ടുണ്ട്. 2015ൽ യുഎസ് പ്രസിഡന്റായിരുന്ന ബറാക് ഒബാമ ഡൽഹി സന്ദർശനത്തിനെത്തിയപ്പോൾ കുരങ്ങന്മാരുടെ ശല്യം രൂക്ഷമായിരുന്നു.

Content Highlights: Langur | Delhi | G20 Summit