ഇറാനിലേക്കുള്ള വിമാന സർവീസുകൾ നിർത്തിവച്ച് ലുഫ്താൻസയും ഓസ്ട്രിയൻ എയർലൈൻസും

ബർലിൻ ∙ ഇറാന്‍റെ തലസ്ഥാനമായ ടെഹ്റാനിലേക്കുള്ള വിമാനങ്ങൾ ലുഫ്താൻസയും ഓസ്ട്രിയൻ എയർലൈൻസും നിർത്തിവച്ചു. മിഡിൽ ഈസ്റ്റിലെ സംഘർഷം വഷളാകുന്ന സാഹചര്യത്തിലാണ് ടെഹ്റാനിലേക്കും പുറത്തേക്കുമുള്ള എല്ലാ വിമാനങ്ങളും ലുഫ്താൻസയും അനുബന്ധ കമ്പനിയായ ഓസ്ട്രിയൻ എയർലൈൻസും നിർത്തിവച്ചത്. നിലവിലെ സാഹചര്യം പരിഗണിച്ച് ടെഹ്റാനിലേക്കും പുറത്തേക്കുമുള്ള വിമാനങ്ങൾ ഏപ്രിൽ 18  വരെ താൽക്കാലികമായി നിർത്തിവെച്ചിരിക്കുകയാണെന്ന് ലുഫ്താൻസ വക്താവ് അറിയിച്ചു. ഓസ്ട്രിയൻ എയർലൈൻസും ഏപ്രിൽ 6 മുതൽ ടെഹ്റാനിലേക്കുള്ള വിമാനങ്ങൾ നിർത്തിവച്ചിരിക്കുകയാണ്.

ഈ മാസം സിറിയയിൽ നടന്ന ആക്രമണത്തിൽ രണ്ട് ഇറാനിയൻ ജനറൽമാരെ കൊലപ്പെട്ടിരുന്നു. ഈ ആക്രമണത്തിന് പിന്നിൽ ഇസ്രയേലാണെന്ന് ആരോപിച്ച് ഇറാൻ രംഗത്ത് വന്നിരുന്നു. ഗാസ മുനമ്പിൽ സംഘർഷം ആരംഭിച്ചതു മുതൽ സിറിയയിലെ ഇറാനുമായി ബന്ധപ്പെട്ട വിഷയങ്ങളിൽ ഇസ്രയേൽ ഇടപെടുന്നുണ്ട്.