ഒരു ലക്ഷം റിയാൽ സമ്മാനം നേടാൻ അവസരം; പരിസ്ഥിതി ഫോട്ടോ മത്സരവുമായി സൗദി

റിയാദ് ∙ ‘‘നിങ്ങളുടെ പരിസ്ഥിതിയെ അറിയാമോ?" എന്ന പേരിൽ ഫോട്ടോ മൽസരവുമായി സൗദി.  മികച്ച പരിസ്ഥിതി ചിത്രങ്ങളും വിഡിയോകളും സമർപ്പിക്കുന്നവർക്ക് ഒരു ലക്ഷം റിയാൽ സമ്മാനം നേടാനുള്ള അവസരമാണ് ഈ മത്സരം വാഗ്ദാനം ചെയ്യുന്നത്. 2024-ലെ സൗദി പരിസ്ഥിതി വാരാചരണത്തിന്‍റെ ഭാഗമായാണ് ഈ മത്സരം സംഘടിപ്പിക്കുന്നത്. ഏപ്രിൽ 28 മുതൽ മെയ് 5 വരെയാണ് വാരാചരണം നടക്കുക.

സൗദി അറേബ്യയുടെ പ്രകൃതിദത്ത സൗന്ദര്യവും വൈവിധ്യവും പ്രദർശിപ്പിക്കുന്ന ചിത്രങ്ങളും വിഡിയോകളും മത്സരത്തിൽ ഉൾപ്പെടുത്താം. ഫൊട്ടോഗ്രാഫർമാർ, വിഡിയോഗ്രാഫർമാർ, ഫിലിം നിർമാതാക്കൾ എന്നിവർക്കെല്ലാം ഈ മത്സരത്തിൽ പങ്കെടുക്കാം. മത്സരത്തിൽ പങ്കെടുക്കാൻ ഏപ്രിൽ 27 വരെ നിങ്ങളുടെ എന്‍ട്രികൾ സമർപ്പിക്കണം. സൗദി അറേബ്യയിലെ താമസക്കാരാണ് മത്സരത്തിൽ പങ്കെടുക്കാൻ യോഗ്യതയുള്ളത്. മത്സര വെബ്‌സൈറ്റ് വഴി ഓൺലൈനായി നിങ്ങളുടെ എന്‍ട്രികൾ സമർപ്പിക്കണം. വിജയികളെ ഒരു പ്രത്യേക ചടങ്ങിൽ പ്രഖ്യാപിക്കും. പരിസ്ഥിതി സംരക്ഷണത്തെക്കുറിച്ചുള്ള അവബോധം വളർത്തുകയും രാജ്യത്തിന്‍റെ പ്രകൃതി സൗന്ദര്യം പ്രദർശിപ്പിക്കുകയുമാണ് ഈ മത്സരത്തിന്‍റെ ലക്ഷ്യം.

വിജയികളെ തിരഞ്ഞെടുക്കുന്നത് വിദഗ്ധരുടെ പാനലാണ്. ഏറ്റവും മികച്ച ഫോട്ടോയ്ക്ക് 100,000 റിയാൽ വരെ സമ്മാനം ലഭിക്കും. മത്സരത്തിൽ പങ്കെടുക്കാൻ ചില നിബന്ധനകളുണ്ട്. മത്സരത്തിൽ സമർപ്പിക്കുന്ന ഫോട്ടോകളുടെ പകർപ്പവകാശം നിങ്ങൾക്കുതന്നെ ഉണ്ടായിരിക്കണം. മുൻപ് മറ്റേതെങ്കിലും മത്സരങ്ങളിൽ സമ്മാനം നേടിയ ഫോട്ടോകൾ ഇതിൽ ഉൾപ്പെടുത്താൻ പാടില്ല. മത്സരത്തിൽ അയക്കുന്ന ഫോട്ടോകൾ പ്രദർശനങ്ങൾ, കോൺഫറൻസുകൾ, സാമൂഹിക മാധ്യമങ്ങൾ എന്നിവയിൽ ഉപയോഗിക്കാനുള്ള അവകാശം സംഘാടകർക്കായിരിക്കും. എന്നാൽ ഫൊട്ടോഗ്രാഫർമാരുടെ ധാർമ്മിക അവകാശങ്ങൾ സംരക്ഷിക്കപ്പെടും. പൊതുജനങ്ങളിൽ പരിസ്ഥിതി സംരക്ഷണത്തെക്കുറിച്ചുള്ള അവബോധം വളർത്തുക, സുസ്ഥിരമായ ജീവിത രീതികൾ പ്രോത്സാഹിപ്പിക്കുക, രാജ്യത്തിന്‍റെ പരിസ്ഥിതി സംരക്ഷിക്കുക എന്നതാണ് ഈ മത്സരത്തിന്‍റെ ലക്ഷ്യം.