ആദർശിന് നാടിന്റെ സല്യൂട്ട്; ഷിംലയിൽ അപകടത്തിൽ മരിച്ച സൈനികന്റെ സംസ്കാരം നടത്തി

കോഴിക്കോട്∙ ഹിമാചൽപ്രദേശിലെ ഷിംലയിൽ അപകടത്തിൽ മരിച്ച സൈനികൻ ആദർശിന്റെ ഭൗതികശരീരം ഔദ്യോഗിക ബഹുമതികളോടെ സംസ്കരിച്ചു. ഫറോക്ക് ചുങ്കം ഖാദിസ്സിയ്യ സ്കൂളിൽ പൊതുദർശനത്തിനു വച്ചശേഷം തിങ്കളാഴ്ച രാവിലെ പത്തേകാലോടെയാണ് സംസ്കരിച്ചത്. എം.കെ.രാഘവൻ എംപി, മന്ത്രി മുഹമ്മദ് റിയാസിന് വേണ്ടി സച്ചിൻ ദേവ് എംഎൽഎ, സംസ്ഥാന സർക്കാരിന് വേണ്ടി എഡിഎം കെ.അജീഷ് എന്നിവർ അന്തിമോപചാരം അർപ്പിച്ചു.

വെള്ളിയാഴ്ച ഉച്ചയ്ക്ക് സൈനിക വാഹനത്തിനു മുകളിലേക്ക് കല്ല് പതിച്ചാണ് ഫറോക്ക് സ്വദേശിയായ ചുങ്കം കുന്നത്ത്മോട്ട വടക്കേ വാൽപറമ്പിൽ അതിപറമ്പത്ത് ജയരാജന്റെ മകൻ ആദർശ് മരിച്ചത്. ആർമിയിൽ എൻജിനീയർ റെജിെമന്റിൽ ജോലി ചെയ്തിരുന്ന ആദർശ് കരസേനയുടെ വാഹനത്തിൽ ജോലി സ്ഥലത്തേക്ക് പോകുമ്പോൾ വാഹനത്തിനുമേൽ കല്ല് വീഴുകയായിരുന്നു.