പോക്കറ്റ് കാലിയാകാതെ വിദേശ യാത്ര : ഇതാണ് ബെസ്റ്റ് ചോയ്സ്

പലപ്പോഴും ഇന്ത്യയ്ക്കു പുറത്തേക്ക് യാത്ര ചെയ്യുമ്പോൾ ആദ്യം നമ്മൾ ചിന്തിക്കുന്നത് ബജറ്റിനെക്കുറിച്ചു തന്നെയാണ്. എങ്ങനെ പോക്കറ്റ് കാലിയാവാതെ ചെലവ് ചുരുക്കി യാത്ര ചെയ്യാം എന്നതായിരിക്കും നമ്മുടെ പ്രധാന ആലോചന. കാഴ്ചകൾക്ക് കുറവ് വരരുത്, യാത്രയും അടിപൊളിയാകണം. എന്നാൽ പോക്കറ്റ് കാലിയാകാനും പാടില്ല. എങ്കിൽ നിങ്ങൾക്കുള്ള ബെസ്റ്റ് ചോയ്സാണ് നേപ്പാൾ. 

ഊഷ്മളമായ ആതിഥ്യമര്യാദയും സ്വാഗതാർഹമായ അന്തരീക്ഷവും വാഗ്ദാനം ചെയ്യുന്ന നേപ്പാൾ വിനോദസഞ്ചാരികൾക്കു സുരക്ഷിതമായി കണക്കാക്കപ്പെടുന്ന രാജ്യമാണ്. സാഹസികത ഇഷ്ടപ്പെടുന്നവരുടെ കേന്ദ്രവും ലോകത്തിലെ ഏറ്റവും ഉയരം കൂടിയ കൊടുമുടിയായ എവറസ്റ്റിന്റെ ആസ്ഥാനവും ഇന്ത്യയ്ക്കും ചൈനയ്ക്കും ഇടയിൽ സ്ഥിതി ചെയ്യുന്ന മനോഹരമായ ഹിമാലയൻ രാജ്യമാണല്ലോ നേപ്പാൾ. ലോകത്തിന്റെ മേൽക്കൂര എന്നു പലപ്പോഴും വിളിക്കപ്പെടുന്ന ഇത് സമാനതകളില്ലാത്ത പ്രകൃതി സൗന്ദര്യത്തിന്റെയും വൈവിധ്യമാർന്ന ഭൂപ്രകൃതിയുടെയും കൂടി നാടാണ്. ഹിമാലയത്തിലെ ഉയർന്ന കൊടുമുടികൾ മുതൽ സമൃദ്ധമായ താഴ്‌വരകൾ, പുരാതന ക്ഷേത്രങ്ങൾ, സാഹസികത, ആത്മീയത, സാംസ്‌കാരിക നിമജ്ജനം എന്നിങ്ങനെ നേപ്പാളിന്റെ സാധ്യതകൾ നീണ്ടു കിടക്കുകയാണ്.

ബജറ്റ് ഫ്രണ്ട്​ലിയായി യാത്ര ചെയ്യാൻ പറ്റിയ മികച്ച ഒരു ലക്ഷ്യസ്ഥാനം കൂടിയാണ് നേപ്പാൾ. ഒറ്റയ്ക്ക് യാത്ര ചെയ്യുന്നവർക്കും അല്ലാത്തവർക്കും ഒരുപോലെ അധികം പണച്ചെലവില്ലാതെ ചുറ്റിക്കറങ്ങി വരാവുന്ന നേപ്പാളിലെ ചില മനോഹരമായ സ്ഥലങ്ങൾ ഇതാ. 

നഗർകോട്ട്

ഹിമാലയത്തിന്റെ അതിമനോഹരമായ കാഴ്ചകൾ നിങ്ങൾക്കു നൽകുന്ന സ്ഥലമാണിത്. ഭക്തിപൂരിന് സമീപമുള്ള വളരെ പ്രശസ്തമായ ഒരു ഹിൽ സ്റ്റേഷൻ കൂടിയാണ് ഇത്. മനോഹരമായ സൂര്യോദയങ്ങളും സൂര്യാസ്തമയങ്ങളും സഹിതം എട്ട് ഹിമാലയൻ പർവ്വതനിരകളുടെ അതിമനോഹരമായ കാഴ്ച നിങ്ങൾക്ക് ഇവിടെനിന്ന് ആസ്വദിക്കാം. ട്രെക്കിങ്ങും മൗണ്ടൻ ബൈക്കിങ്ങും തിരഞ്ഞെടുക്കാം. പാരാഗ്ലൈഡിങ് പോലെയുള്ള സാഹസിക വിനോദ പ്രവർത്തനങ്ങളും ഇവിടെ സംഘടിപ്പിക്കുന്നുണ്ട്. എങ്കിലും നഗർകോട്ടയിൽ നിന്നുള്ള ഹിമാലയത്തിന്റെ അതിമനോഹരമായ കാഴ്ച തന്നെയാണ് അതിന്റെ ഏറ്റവും വലിയ സവിശേഷത. 

പൊഖാറ

കാഠ്മണ്ഡുവിനു ശേഷം ഈ ഹിമാലയൻ രാജ്യത്തെ രണ്ടാമത്തെ വലിയ നഗരമാണ് 'നേപ്പാളിന്റെ ടൂറിസ്റ്റ് തലസ്ഥാനം' എന്നറിയപ്പെടുന്ന പൊഖാറ. 900 അടിയിൽ കൂടുതൽ ഉയരത്തിൽ, സ്ഥിതിചെയ്യുന്ന ഇത് ഏറ്റവും ഉയരമുള്ള നഗരങ്ങളിലൊന്നാണ്. ലോകപ്രശസ്തമായ നിരവധി ട്രെക്കുകളുടെ കേന്ദ്രം കൂടിയായ പൊഖാറയുടെ ഹൈലൈറ്റ് അതിന്റെ ലേക്സൈഡാണ്, ഇത് ശരിക്കുമൊരു ബോട്ടിങ് പറുദീസയാണ്. ഫേവ തടാകത്തിന്റെ തീരത്താണ് പൊഖാറ സ്ഥിതി ചെയ്യുന്നത്. മഞ്ഞുമൂടിയ അന്നപൂർണ ഹിമാലയൻ പർവ്വതനിരകളുടെ ഗംഭീരമായ കാഴ്ചയ്ക്ക് ഇത് പ്രശസ്തമാണ്. പച്ചപ്പു നിറഞ്ഞ കാടുകൾ, ഭൂഗർഭ ഗുഹകൾ, ഓർക്കിഡുകളുടെ താഴ്‌വര, മനോഹരമായ വെള്ളച്ചാട്ടങ്ങൾ, ഹിമാനികൾ അങ്ങനെ ഒരു വിനോദസഞ്ചാരിയുടെ ആഗ്രഹങ്ങൾ എല്ലാം സാധിക്കാൻ പോകുന്ന ഭൂമിയിലെ സ്വർഗ്ഗം തന്നെയാണ് പൊഖാറ. സാഹസികത ഇഷ്ടപ്പെടുന്നവർക്ക്, അന്നപൂർണ റെയ്ഞ്ചിലെ നിരവധി ട്രെക്കിങ്ങുകളും പാരാഗ്ലൈഡിങ്, റിവർ റാഫ്റ്റിങ് പ്രവർത്തനങ്ങൾ തിരഞ്ഞെടുക്കാം. 

സാഗർമാതാ നാഷണൽ പാർക്ക്

ഇവിടെയാണ് നിങ്ങൾക്ക് എവറസ്റ്റ് കൊടുമുടിയുടെ ഇതിഹാസ കാഴ്ച ലഭിക്കുക. എവറസ്റ്റ് കൊടുമുടി നേപ്പാളി ഭാഷയിൽ സഗർമാഥാ എന്നാണ് അറിയപ്പെടുന്നത്. ലോത്സെ, താംസെർകു, ചോ ഓയോ, നുപ്‌സെ, പുമോരി, അമാഡബ്ലം തുടങ്ങിയ അതിമനോഹരമായ കൊടുമുടികളും നിങ്ങൾക്ക് ഇവിടെനിന്ന് കണ്ടാസ്വദിക്കാം. കൂടാതെ, മഞ്ഞു പുള്ളിപ്പുലി, കറുത്ത കരടി, ചുവന്ന പാണ്ട, ഹിമാലയൻ തഹർ, കോറൽ തുടങ്ങിയ നിരവധി മൃഗങ്ങളുടെ ആവാസ കേന്ദ്രം കൂടിയാണ് സാഗർമാത ദേശീയ ഉദ്യാനം. നേപ്പാളിലെ ഏറ്റവും മികച്ച സ്ഥലങ്ങളിൽ ഒന്നാണിത്. കാഠ്മണ്ഡുവിൽ നിന്ന് 135 കിലോമീറ്റർ അകലെ സ്ഥിതി ചെയ്യുന്ന ഈ ദേശീയോദ്യാനം യുനെസ്‌കോയുടെ ലോക പൈതൃക സ്ഥലമായും വിശുദ്ധ ഹിമാലയൻ ലാൻഡ്‌സ്‌കേപ്പുകളിൽ ഒന്നായും പട്ടികപ്പെടുത്തിയിട്ടുണ്ട്.

ലുംബിനി

ബുദ്ധമത പാരമ്പര്യമനുസരിച്ച്, ബുദ്ധൻ എന്ന സിദ്ധാർത്ഥ ഗൗതമന്റെ ജന്മസ്ഥലമാണ് ലുംബിനി. തെക്കൻ നേപ്പാളിലെ തെരായ് മേഖലയിൽ സ്ഥിതി ചെയ്യുന്ന ഈ സ്ഥലം ഇന്ത്യൻ നേപ്പാൾ അതിർത്തിയോട് വളരെ അടുത്താണ്. ഭൈരഹവയിലെ ഗൗതം ബുദ്ധ വിമാനത്താവളം ഉള്ളതിനാൽ ലുംബിനിയിലെത്താൻ എളുപ്പവുമാണ്.ഇവിടെ കിട്ടുന്ന സൗന്ദര്യം, സമാധാനം, ശാന്തത എന്നിവ നിങ്ങളെ ആ സ്ഥലത്തിൻറെ ആരാധകരാക്കി മാറ്റും. മായാ ദേവി ക്ഷേത്രം, ലുംബിനി മൊണാസ്റ്റിക് സൈറ്റ്, റോയൽ തായ് മൊണാസ്ട്രി, വേൾഡ് പീസ് പഗോഡ എന്നിവ ഇവിടെ സന്ദർശിക്കുക. ഇല്ലെങ്കിൽ ഒന്ന് ചുറ്റി നടന്നാൽ മതി. അത്രമാത്രം കാണാൻ ഏറെയുള്ള ഒരു മനോഹരമായ ഇടമാണ് ഇത്. 

കാഠ്മണ്ഡു

ഇതാണ് എല്ലാറ്റിന്റെയും കേന്ദ്രം. പൊടിയും തിരക്കും ബഹളവുമൊക്കെയുള്ള മറ്റേതൊരു നഗരത്തെയും പോലെയാണിത്... എന്നിരുന്നാലും, നിരവധി ക്ഷേത്രങ്ങൾ, ചരിത്ര സ്ഥലങ്ങൾ, ആരാധനാലയങ്ങൾ, റസ്റ്ററന്റുകൾ, തിരക്കേറിയ തെരുവുകൾ എന്നിവ ഇവിടെയുണ്ട്. നഗരത്തിലെത്തിക്കഴിഞ്ഞാൽ, നിങ്ങൾ പശുപതിനാഥ് ക്ഷേത്രം, ബൗധനനാഥ് സ്തൂപത്തിന്റെ യുനെസ്കോ സൈറ്റ്, സ്വയംഭൂനാഥിന്റെ (കുരങ്ങൻ ക്ഷേത്രം) കോപൻ മൊണാസ്ട്രി എന്നിവ സന്ദർശിക്കണം. ഹിമാലയൻ പർവ്വതങ്ങളാൽ ചുറ്റപ്പെട്ട അതിന്റെ പേരുകേട്ട താഴ്‌വരയിൽ വ്യാപിച്ചുകിടക്കുന്ന കാഠ്മണ്ഡു നേപ്പാളിന്റെ തലസ്ഥാനവും ഏറ്റവുമധികം ആളുകൾ സന്ദർശിക്കുന്ന സ്ഥലവുമാണ്, പുരാതന ക്ഷേത്രങ്ങളും സുവർണ്ണ പഗോഡകളും പ്രകൃതി സൗന്ദര്യവും ആകർഷകമായ ഗ്രാമങ്ങളും നിറഞ്ഞതാണ്. 4,344 അടി ഉയരത്തിലുള്ള കാഠ്മണ്ഡു ബാഗ്മതി, വിഷ്ണുമതി നദികളുടെ സംഗമസ്ഥാനത്തെ അടയാളപ്പെടുത്തുന്നു. ലോകത്തിലെ ഏറ്റവും ഉയരം കൂടിയ കൊടുമുടികൾ, അതിശയിപ്പിക്കുന്ന ഇൻഡോ-ടിബറ്റൻ, നെവാരി കരകൗശല നൈപുണ്യങ്ങൾ, യുനെസ്കോയുടെ പൈതൃക അടയാളങ്ങൾ, രുചികരമായ ഭക്ഷണം എന്നിവ ഇവിടെ ആസ്വദിക്കാം.