സോളമനായി ജോജു; ക്യാരക്ടർ ടീസർ കാണാം

മഴവില്‍ മനോരമയുടെ നായിക നായകന്‍ റിയാലിറ്റി ഷോയുടെ വിജയികളെ കേന്ദ്രകഥാപാത്രങ്ങളാക്കി ലാല്‍ജോസ് സംവിധാനം ചെയ്ത ചിത്രം സോളമന്റെ തേനീച്ചകള്‍ റിലീസിങ്ങിനൊരുങ്ങുന്നു. അടുത്തമാസം പതിനെട്ടിന് ചിത്രം തിയറ്ററുകളിലെത്തും. ചിത്രത്തിൽ ടൈറ്റിൽ വേഷത്തിലെത്തുന്ന ജോജു ജോർജിന്റെ ക്യാരക്ടർ ടീസർ അണിയറപ്രവർത്തകർ പുറത്തിറക്കി.

മലയാളി മിനിസ്ക്രീന്‍ പ്രേക്ഷകര്‍ ഇരുകൈ നീട്ടിസ്വീകരിച്ച റിയാലിറ്റി ഷോ ആയിരുന്നു മഴവില്‍ മനോരമയിലൂടെ സംപ്രേക്ഷണം ചെയ്ത നായിക നായകന്‍. മല്‍സരത്തില്‍ ആദ്യ നാല് സ്ഥാനങ്ങള്‍ കരസ്ഥമാക്കിയ ദര്‍ശന, വിന്‍സി അലോഷ്യസ്, ശംഭു, ആഡീസ് അക്കരെ എന്നിവരെ അണിനിരത്തിയാണ് ലാല്‍ജോസ് തന്റെ പുതിയ ചിത്രമായ സോളമന്റെ തേനീച്ചകള്‍ ഒരുക്കിയിട്ടുള്ളത്. ഇവര്‍ക്കൊപ്പം പ്രധാന വേഷത്തില്‍ ജോജു ജോര്‍ജും ചിത്രത്തിലുണ്ട്. 

വിദ്യാസാഗറിന്റെ സംഗീതസംവിധാനത്തില്‍ നാല് ഗാനങ്ങളാണ് ചിത്രത്തിലുള്ളത്. ലാല്‍ ജോസും വിദ്യാസാഗറും പത്തു വര്‍ഷത്തിനു ശേഷം ഒന്നിക്കുന്ന ചിത്രം കൂടിയാണിത്. സിനിമയിലെ രണ്ട് ഗാനങ്ങള്‍ മഴവില്‍ മനോരമയുടെ യൂട്യൂബ് ചാനലിലൂടെ പ്രക്ഷകരുടെ മുന്നിലെത്തി കഴിഞ്ഞു. പി. ജി. പ്രഗീഷാണ് ചിത്രത്തിന്റെ തിരക്കഥ എഴുതിയിരിക്കുന്നത്. മനോരമ മാക്സിനാണ് ചിത്രത്തിന്റെ ഒടിടി പകര്‍പ്പവകാശം.