‘നത്തി’നെ ചേർത്തുപിടിച്ച്, പിറന്നാൾ കേക്ക് മുറിച്ച് മമ്മൂട്ടി; വിഡിയോ

‘ഒതളങ്ങ തുരുത്ത്’ എന്ന വെബ് സീരിസിലൂടെ ശ്രദ്ധേയനായി പിന്നീട് ബിഗ് സ്‌ക്രീനിലെത്തിയ താരമാണ് ‘നത്ത്’ എന്നറിയപ്പെടുന്ന അബിന്‍ ബിനോ. അബിന്റെ പിറന്നാള്‍ ആഘോഷത്തിന്റെ വിഡിയോയാണ് ഇപ്പോള്‍ ശ്രദ്ധ നേടുന്നത്. മലയാളത്തിന്റെ മെഗാസ്റ്റാർ മമ്മൂട്ടിക്കൊപ്പം ബസൂക്കയുടെ സെറ്റില്‍വച്ചായിരുന്നു താരത്തിന്റെ പിറന്നാള്‍ ആഘോഷം.

 ‘ജീവിതത്തിന് യഥാർഥ അര്‍ത്ഥം തോന്നിയ നിമിഷം’ എന്ന അടിക്കുറിപ്പോടെയാണ് അബിന്‍ വിഡിയോ പങ്കുവച്ചിരിക്കുന്നത്. ‘ബസൂക്ക’ ടീമിനും അബിന്‍ നന്ദി പറയുന്നുണ്ട്. കേക്ക് മുറിക്കുമ്പോൾ അബിനെ ചേർത്തുപിടിക്കുന്ന മമ്മൂട്ടിയെ വിഡിയോയിൽ കാണാം. അബിന് പിറന്നാള്‍ ആശംസകളുമായി നിരവധി പേരാണ് രംഗത്തെത്തുന്നത്. 

രോമാഞ്ചം, സാറാസ് എന്നീ സിനിമകളിൽ അബിൻ അഭിനയിച്ചിട്ടുണ്ട്. ‘പുള്ളി’യാണ് അബിന്റെ പുതിയ പ്രോജക്ട്.

അതേസമയം, 45 ദിവസത്തിന് ശേഷം ബസൂക്കയുടെ ഷൂട്ടിങ് പൂര്‍ത്തിയാക്കിയിരിക്കുകയാണ് മമ്മൂട്ടി. നവാഗതനായ ഡിനോ ഡെന്നിസ് ആണ് ചിത്രം സംവിധാനം ചെയ്യുന്നത്. തിരക്കഥാകൃത്ത് കലൂര്‍ ഡെന്നിസിന്റെ മകനാണ് ഡിനോ ഡെന്നിസ്. ഡെന്നിസിന്റേതാണ് ചിത്രത്തിന്റെ തിരക്കഥയും. ക്രൈം ഡ്രാമ ജോണറിലെത്തുന്ന ചിത്രത്തിന്റെ ഫസ്റ്റ് ലുക്ക് ഏറെ ശ്രദ്ധയാകര്‍ഷിച്ചിരുന്നു