ഇന്ത്യ- പാക് മത്സരത്തിനിടെ 24 കാരറ്റ് ഗോൾഡ് ഐഫോൺ നഷ്ടമായി: പരാതിയുമായി നടി ഉർവശി റൗട്ടേല

കഴിഞ്ഞ ദിവസം നടന്ന ഇന്ത്യ- പാക്കിസ്ഥാൻ ലോകകപ്പ് മത്സരത്തിനിടെ, 24 കാരറ്റ് സ്വർണത്തിൽ നിർമിച്ച ഐ ഫോൺ നഷ്ടപ്പെട്ടെന്ന പരാതിയുമായി ബോളിവുഡ് നടി ഉർവശി റൗട്ടേല. സമൂഹ മാധ്യമത്തിൽ പങ്കുവച്ച കുറിപ്പിലൂടെയാണ് ഫോൺ നഷ്ടപ്പെട്ട വിവരം നടി അറിയിച്ചത്. അഹമ്മദാബാദ് പൊലീസിനു നൽകിയ പരാതിയുടെ പകർപ്പും നടി പങ്കുവച്ചു.

‘‘അഹമ്മദാബാദിലെ നരേന്ദ്രമോദി സ്‌റ്റേഡിയത്തില്‍ എന്റെ 24 കാരറ്റിന്റെ ഐഫോണ്‍ നഷ്ടമായി. ആര്‍ക്കെങ്കിലും ഫോണിനെക്കുറിച്ച് വിവരം ലഭിക്കുകയാണെങ്കില്‍ ദയവായി സഹായിക്കണം. സഹായിക്കാന്‍ പറ്റുന്ന ആളുകളെ ടാഗ് ചെയ്യൂ.’’- എന്നാണ് ഉര്‍വശി കുറിച്ചത്.

മത്സരം തുടങ്ങുന്നതിന് മുന്നോടിയായി സ്റ്റേഡിയത്തിൽ നിന്നുള്ള വിഡിയോയും അവർ ഇൻസ്റ്റഗ്രാമിൽ പോസ്റ്റ് ചെയ്തിരുന്നു. ഇതിന് പിന്നാലെയാണ് ഫോൺ നഷ്ടപ്പെടുന്നത്.

സണ്ണി ഡിയോൾ നായകനായ സിങ് സാബ് ദ് ഗ്രേറ്റ് എന്ന ചിത്രത്തിലൂടെയാണ് ഉർവശി റൗട്ടേല ബോളിവുഡിൽ അരങ്ങേറ്റം കുറിച്ചത്. പിന്നീട് സനം രേ, ​ഗ്രേറ്റ് ഗ്രാൻഡ് മസ്തി, ഹേറ്റ് സ്റ്റോറി 4 എന്നീ ബോളിവുഡ് ചിത്രങ്ങളിലും ലെജൻഡ് എന്ന തമിഴ് ചിത്രത്തിലും അഭിനയിച്ചു. ഏജന്റ്, വാൾട്ടർ വീരയ്യ, സ്കന്ദ എന്നീ തെലുങ്ക് ചിത്രങ്ങളിലെ നൃത്തരം​ഗങ്ങളിലും ഉർവശി സാന്നിധ്യമറിയിച്ചു. ദിൽ ഹേ ഗ്രേ, ബ്ലാക്ക് റോസ് എന്നിവയാണ് നടിയുടെ പുതിയ പ്രോജക്ടുകൾ.