ആസ്വാദനം പലർക്കും പലവിധമാണ്. കാഴ്ചയും കേൾവിയും സംസാരശേഷിയുമുള്ള സാധാരണക്കാരെ പോലെയാകില്ല ചിലപ്പോൾ പരിമിതികൾ ഉള്ളവർക്ക് അത് അനുഭവപ്പെടുന്നത്. പാട്ടും നൃത്തവുമെല്ലാം അവർക്ക് മനസ്സിലാകും വിധം അവതരിപ്പിക്കുകയെന്നത് ശ്രമകരമാണ്. എന്നാൽ, പരിമിതികളുള്ളവർക്ക് നടുവിൽ ജീവിച്ചതുകൊണ്ടാകാം നിസാമിനത് അനായാസേന സാധിക്കുന്നതും. മഴവിൽ മനോരമയുടെ നായിക നായകൻ ഷോയിലാണ് നിസാം അതിഥിയായി എത്തിയത്. നിസാമിന്റെ അമ്മയും അച്ഛനും സംസാരശേഷിയില്ലാത്തവരും ബധിരരുമാണ്. അവർക്കു കൂടി മനസ്സിലാകും വിധമായിരുന്നു നിസാമിന്റെ പ്രകടനം.
'നീയേ വാഴ്ഗ അന്‍പേൻ' എന്ന തമിഴ് ഗാനത്തിനാണ് നിസാം ചുവടുവച്ചത്. നിസാമിന്റെ അസാധ്യ പ്രകടനം കണ്ട് വിധികർത്താക്കൾ പോലും അത്ഭുതപ്പെട്ടു. ഇതുകണ്ട കുഞ്ചാക്കോ ബോബൻ നിസാമിന്റെ മാതാപിതാക്കൾക്കായി തനിക്കും നിസാം ചെയ്യുന്ന പോലെ ഡാൻസ് ചെയ്യണമെന്ന് ആവശ്യപ്പെടുന്നു. തുടർന്നായിരുന്നു നിസാമിനൊപ്പം ചാക്കോച്ചന്റെ ഡാൻസ്. നിറ കയ്യടിയോടെയാണ് നിസാമിനെയും കുടുംബത്തെയും നായിക നായകൻ മത്സരാർഥികൾ യാത്രയാക്കിയത്
