ആരോഗ്യം നൽകുന്നതും എളുപ്പത്തിൽ ഉണ്ടാക്കാവുന്നതുമായ വിഭവമാണിത്. വേവിച്ചുടച്ച ഉരുളകിഴങ്ങിൽ മസാല ചേർത്ത ഗ്രീൻപീസ് നിറച്ചു തയാറാക്കാം. മൃദുലവും സ്വാദിഷ്ടവുമായ ഈ പാറ്റീസ് വെജിറ്റേറിയൻ ബർഗറിലും ഫില്ലിംഗ് ആയി ഉപയോഗിക്കാം.
ചേരുവകൾ:
പാറ്റീസിന് വേണ്ട ചേരുവകൾ :
വേവിച്ചു ഉടച്ച ഉരുളക്കിഴങ്ങ്‌ - 2 കപ്പ്‌
കോൺ ഫ്ലോർ - 1 ടേബിൾ സ്പൂൺ
പച്ചമുളക് - 1 ടീ സ്പൂൺ
ഉപ്പ് ആവശ്യത്തിന്
ഫില്ലിംഗ് :
എണ്ണ - 2 ടീ സ്പൂൺ
ജീരകം - 1/2 ടീ സ്പൂൺ
ഗ്രീൻ പീസ് - 1/2 കപ്പ്‌
ഇഞ്ചി പച്ചമുളക് ചതച്ചത് - 1 ടീ സ്പൂൺ
നാരങ്ങ പിഴിഞ്ഞത് - 1/2 നാരങ്ങ
മല്ലിയില ആവശ്യത്തിന്
ഉപ്പ് പാകത്തിന്
പാചകരീതി
വേവിച്ച് ഉടച്ച ഉരുളക്കിഴങ്ങ്‌, കോൺ ഫ്ലോർ, പച്ചമുളക്, ഉപ്പ് എന്നിവ നന്നായി കുഴച്ചെടുക്കുക. ഉരുളകളാക്കി വെക്കുക.
സ്റ്റഫിങ് :
ഒരു പാനിൽ എണ്ണ ചൂടാക്കി ജീരകം ഇട്ട് പൊട്ടിക്കുക. തീ കുറച്ച് ഇഞ്ചിയും പച്ചമുളകും ചതച്ചു ചേർക്കുക.
പച്ച മണം മാറുന്ന വരെ ഇളക്കുക. അതിനു ശേഷം ഗ്രീൻ പീസ് ചേർക്കുക. ഉപ്പും നാരങ്ങ നീരും, മല്ലിയിലയും ചേർക്കുക. നന്നായി യോജിപ്പിക്കുക.
ഉരുളകളാക്കി വെച്ച ഉരുളക്കിഴങ്ങ്‌ കൈയ്യിൽ വെച്ച് അമർത്തുക അതിന്റെ നടുവിൽ ഗ്രീൻ പീസ് മിശ്രിതം വെച്ച് ചുറ്റുമുള്ള ഭാഗങ്ങൾ നടുവിലേക്ക് കൊണ്ടുവന്ന് വീണ്ടും ഉരുളകളാക്കുക.
കൈയ്യിൽ വെച്ച് വീണ്ടും ഒന്ന് അമർത്തി പാനിൽ കുറച്ച് എണ്ണ തൂകി മൊരിച്ചെടുക്കുക.
