മമ്മൂട്ടിയും മോഹൻലാലും വ്യക്തമാക്കുന്നു: ഞങ്ങൾ ഇവിടൊക്കെത്തന്നെ കാണും; ‘നേര്’ പറഞ്ഞാൽ സൂപ്പർ സ്റ്റാറുകളോട് ‘കാതൽ’ തോന്നിയ വർഷം

യുവ താരങ്ങൾക്കൊപ്പം ബാബു ആന്റണിയും ബൈജുവും ഉൾപ്പെടെയുള്ള വെറ്റേറൻ താരങ്ങളും ആക്‌ഷനിലും മാസ് ഡയലോഗിലും മിന്നിയതോടെ തിയറ്റര്‍ നിറഞ്ഞുകവിഞ്ഞു. വിവാദങ്ങളെല്ലാം എങ്ങോ പോയ്മറയുകയും ചെയ്തു. സമാനമായിരുന്നു മധുര മനോഹര മോഹത്തിന്റെയും നെയ്മറുടെയും പ്രണയവിലാസത്തിന്റെയും പൂക്കാലത്തിന്റെയുമെല്ലാം അവസ്ഥ. നിർമാതാവിന് ലാഭമുണ്ടാക്കിക്കൊടുത്ത ഹിറ്റ് പട്ടികയിലാണ് ഈ ചിത്രങ്ങളെല്ലാം. ഇതിനെയെല്ലാം കോർത്തിണക്കുന്ന ഒരു ഘടകം നർമമായിരുന്നു. അതും തിരുകിക്കയറ്റിയതല്ല, ജീവിതത്തോടു ചേർന്നു നിൽക്കുന്ന ശുദ്ധഹാസ്യം. അത്തരം വിഷയങ്ങൾ തിരഞ്ഞെടുത്ത് അതിന് മികച്ച തിരക്കഥയൊരുക്കി, മികവുറ്റ നടീനടന്മാരെ കൃത്യമായി കഥാപാത്രങ്ങളില്‍ പ്രതിഷ്ഠിച്ചു കഴിഞ്ഞതോടെ സിനിമ കഴിഞ്ഞാലും മനസ്സിൽനിന്ന് ആരും വിട്ടുപോകാത്ത അവസ്ഥ. 

ഉദാഹരണത്തിന് ‘പൂക്കാല’ത്തിലെ ഇട്ടൂപ്പും കൊച്ചുത്രേസ്യയും. നൂറാം വയസ്സിലേക്കെത്തുന്ന ഇട്ടൂപ്പ് ഭാര്യയെ സംശയിക്കുന്നതാണ് ചിത്രത്തിന്റെ ഇതിവൃത്തം. എല്ലാറ്റിനും കാരണമാകുന്നതാകട്ടെ ഒരു കത്തും. മൂന്നു തലമുറയുടെ പ്രണയവും മനസ്സും വായിച്ചെടുക്കാം നമുക്കാ ചിത്രത്തിൽനിന്ന്. ‘മധുര മനോഹര മോഹം’ പ്രണയത്തെയും ‘തേപ്പി’നെയും നർമത്തിലൂടെ അവതരിപ്പിച്ചപ്പോൾ, ചിത്രത്തിൽ അവസാന നിമിഷം വരെ മനു മോഹൻ എന്ന മീരയുടെ ചേട്ടന്റെ നെഞ്ചിനൊപ്പം പ്രേക്ഷകരുടെ ഹൃദയവും പടപടാ മിടിച്ചില്ലേ! ഫാലിമിയും നെയ്മറും പ്രണയവിലാസവുമെല്ലാം നർമത്തോടൊപ്പം ഒരൽപം സീരിയസ്‌നെസും കൂടി ചേർത്ത്, മികച്ച തിരക്കഥയുടെ കൂട്ടൊരുക്കി പ്രേക്ഷകനെ പിടിച്ചിരുത്തിയ പടങ്ങളാണ്. കുടുംബപ്രേക്ഷകരെ ആകർഷിക്കാനുള്ള ഘടകങ്ങളും ആ സിനിമകളിലെല്ലാം ഉണ്ടായിരുന്നു. 

പാച്ചുവും അദ്ഭുത വിളക്കും, ഗരുഡൻ എന്നീ സിനിമകളാകട്ടെ വലിയ കാൻവാസിൽ, മുൻനിര താരങ്ങളോടെ ഒരുക്കി വിജയം നേടിയെടുത്തവയായിരുന്നു. ഞാൻ പ്രകാശന്റെ തുടർക്കഥ പോലെയായിരുന്നു ‘പാച്ചു’വിലൂടെ ഫഹദ് ഫാസിലിന്റെ വരവ്. ഗരുഡനാകട്ടെ, കോമഡി കാട്ടി ചിരിപ്പിച്ചും ചിന്തിപ്പിച്ചുംകൊണ്ടിരുന്ന ഒരു താരം സീരിയൽ കില്ലറുടെ പേടിപ്പിക്കുന്ന ചേഷ്ടകളോടെ പ്രേക്ഷക മനസ്സിലേക്കു കയറുന്നതും കാണിച്ചുതന്നു. ഒരിടവേളയ്ക്കു ശേഷം സുരേഷ് ഗോപിയുടെ പൊലീസ് കഥാപാത്രം നമ്മെ ആനന്ദിപ്പിച്ച ചിത്രം കൂടിയായിരുന്നു ഗരുഡൻ. ജോജു ജോർജിന്റെയും കല്യാണി പ്രിയദർശന്റെയും പ്രകടനവും ജോഷി എന്ന സംവിധായകന്റെ പരിചയ സമ്പന്നതയുമാണ് ആന്റണി എന്ന സിനിമയെ രക്ഷിച്ചെടുത്തത്. ‌‌

പ്രിയദർശന്റെ കൊറോണ പേപ്പേഴ്സ് പക്ഷേ ഹിറ്റ് ചാർട്ടുകളിലേക്ക് കയറി വന്നില്ല. ദിലീപിന്റെ വോയിസ് ഓഫ് സത്യനാഥന്റെയും കുഞ്ചാക്കോ ബോബന്റെ ചാവേറിന്റെയും അവസ്ഥയും അതുതന്നെ. ഇതിനിടയിലും പരാജയത്തിന്റെ ചാരവും വിജയത്തിന്റെ കനലിനു കീഴെ കെട്ടുകിടപ്പുണ്ട്. ഏറെ പ്രതീക്ഷയോടെ വന്ന ദുൽഖർ സൽമാന്റെ കിങ് ഓഫ് കൊത്ത, നിവിൻ പോളിയുടെ രാമചന്ദ്ര ബോസ് ആൻഡ് കോ., ഫഹദിന്റെ ധൂമം, ടൊവിനോയുടെ നീലവെളിച്ചം, ദിലീപിന്റെ ബാന്ദ്ര തുടങ്ങിയ ചിത്രങ്ങൾ നിരാശപ്പെടുത്തി. പക്ഷേ പരാജയങ്ങളൊന്നും ഈ താരങ്ങളുടെ മൂല്യമിടിക്കുന്നില്ല. ‘ദ് ഷോ മസ്റ്റ് ഗോ ഓൺ’ എന്നാണല്ലോ! വിജയം കാണുകയെന്ന ലക്ഷ്യത്തോടെത്തന്നെ പ്രദർശനം ഇനിയും തുടരുമെന്നർഥം; താരങ്ങളുടെയും സിനിമകളുടെയും...

∙ മധുര മനോഹര മലയാള സിനിമ

മമ്മൂട്ടിയുടെ ‘കാതലി’ന്റെയും മോഹൻലാലിന്റെ കോർട്ട് ഡ്രാമ ‘നേരി’ന്റെയും വിജയത്തോടെയാണ് 2023 അവസാനിക്കുന്നത്. രണ്ടു ചിത്രങ്ങളും മലയാള സിനിമയ്ക്കു നൽകുന്ന പ്രതീക്ഷകളേറെയാണ്. തോക്കെടുത്തും മീശ പിരിച്ചും മാത്രമല്ല നെഞ്ചു തകർന്ന് കരഞ്ഞും, പരാജയത്തിന്റെ കയ്പ്പറിഞ്ഞ് മുഖംതാഴ്ത്തി നിന്നുമെല്ലാം പ്രേക്ഷക മനസ്സു കീഴടക്കാമെന്ന് വീണ്ടും സൂപ്പർ താരങ്ങൾ തെളിയിക്കുകയാണ് ഈ ചിത്രങ്ങളിലൂടെ. മുഖ്യധാരാ സിനിമയിൽ ഏറ്റെടുക്കാൻ പോലും ആശങ്കപ്പെടുന്ന സ്വവർഗലൈംഗികത എന്ന വിഷയത്തെ സംശയമേതുമില്ലാതെ കൈനീട്ടി ഒപ്പം ചേർത്തു നിർത്തി അഭിനയിച്ചു പ്രതിഫലിപ്പിച്ചെടുക്കാൻ മമ്മൂട്ടി കാണിച്ച ധൈര്യത്തിന്റെ ഫലമായിരുന്നു ‘കാതലി’ന്റെ വിജയം. പരാജയപ്പെട്ടു മുഖം താഴ്ത്തി നിന്നു പോകുന്ന അഭിഭാഷകന്റെ ഒരു ചെറു വിജയത്തിനായി പ്രേക്ഷകൻ പ്രാ‍ർഥിക്കുന്നിടത്തുനിന്നു തുടങ്ങുന്നു ‘നേരി’ൽ മോഹൻ ലാലിന്റെ പടയോട്ടം. ‘കാതൽ– ദ് കോർ’ എന്നാണു സിനിമയുടെ പേരെങ്കിലും സൂപ്പർ സ്റ്റാറുകളോട് ‘കാതൽ– ദ് ലവ്’ എന്നു പറയിപ്പിക്കുന്ന പ്രകടനമായിരുന്നു 2023ൽ.

എക്കാലവും സിനിമ കൈകാര്യം ചെയ്തിരുന്ന വിഷയങ്ങൾക്കൊപ്പം ഇതുവരെ തൊടാൻ മടിച്ചിരുന്ന വിഷയങ്ങളും മലയാള സിനിമ അതിന്റെ പരീക്ഷണശാലയിലേക്ക് എടുക്കുന്നുണ്ടിപ്പോൾ അതോടൊപ്പംതന്നെ വനിതകളൊരുക്കുന്ന മികവുള്ള സിനിമകളുടെ എണ്ണവും മലയാളത്തിൽ കൂടി വരുന്നു. അവ പുരസ്കാരങ്ങളേറെ സ്വന്തമാക്കുന്നു. സ്ത്രീപക്ഷവും അത്തരമൊരു വിഷയത്തിൽ കിടന്നു കറങ്ങാത്തതുമായുള്ള ചിത്രങ്ങളും വനിതാ സംവിധായകർ ഒരുക്കുന്നുണ്ട്. വിധു വിൻസന്റിന്റെ വൈറല്‍ സെബി, ശ്രുതി ശരണ്യത്തിന്റെ ബി32 മുതൽ 44 വരെ, ഐഷ സുൽത്താനയുടെ ഫ്ലഷ്, സ്റ്റെഫി സേവ്യറുടെ മധുര മനോഹര മോഹം എന്നീ ചിത്രങ്ങൾ ഉദാഹരണം. ഇരുനൂറിലേറെ സിനിമകൾ ഒരു വർഷമിറങ്ങിയ സംസ്ഥാനത്ത് വനിതകള്‍ ഒരുക്കുന്ന ചിത്രങ്ങൾ ഇത്രയും മതിയോ എന്ന ചോദ്യവും ഉയരുന്നുണ്ട്. എന്നാൽ ഒരു സംവിധായിക പോലും ഇല്ലാതിരുന്ന കാലവും മലയാള സിനിമയ്ക്കുണ്ടായിരുന്നെന്ന് ഓർക്കണം. സംവിധായികമാർ മാത്രമല്ല, നടിമാരും വളരെ ബോൾഡായിത്തന്നെ സിനിമയെ സമീപിച്ചു തുടങ്ങിയിരിക്കുന്നു. എത്രയേറെ ധൈര്യത്തോടെയാണ് അവർ ഓരോ കഥാപാത്രത്തെയും ഏറ്റെടുത്ത് വിജയിപ്പിക്കുന്നത്, പ്രേക്ഷകരെ തുടരെ അദ്ഭുതപ്പെടുത്തുന്നത്.

∙ തിയറ്ററിൽ ആളെക്കയറ്റുന്നതാരാണ്?

എത്ര നല്ല പടമാണെങ്കിലും തിയറ്ററുകളിൽ ആളു കയറുന്നില്ലെന്ന പതിവു പല്ലവിയും 2023ൽ കേട്ടു. അങ്ങനെ ആളു കയറുന്നില്ലെങ്കിൽ മേൽപ്പറഞ്ഞ ചിത്രങ്ങളെല്ലാം എങ്ങനെ വിജയിച്ചു? തമിഴിൽനിന്നു വന്ന ‘ജയിലർ’ എങ്ങനെ ശതകോടികൾ കേരളത്തിൽനിന്നു കൊണ്ടുപോയി. അതിലൊരു കഥാപാത്രമായി മോഹൻലാൽ ഉണ്ടെന്നെങ്കിലും പറയാം. അപ്പോൾപ്പിന്നെ ഷാറുഖ് ഖാന്റെ പത്താനും ജവാനും വിജയ്‌യുടെ ലിയോയുമെല്ലാം കേരളത്തിലെ തിയറ്ററുകളിൽനിന്ന് കോടികൾ വാരിയതെങ്ങനെയാണ്! നല്ല സിനിമകളാണെങ്കിൽ തിയറ്ററിൽ ആളുണ്ടെന്നുതന്നെയാണ് ഇതെല്ലാം അർഥമാക്കുന്നത്. അപ്പോഴും ഒരു ചോദ്യം ബാക്കി, എന്താണ് ഈ നല്ലത് എന്നതുകൊണ്ട് അർഥമാക്കുന്നത്? അക്കാര്യത്തിൽ പ്രേക്ഷകനെ പൂവിട്ടു തൊഴുക തന്നെ വേണം. 

തമിഴിലെയോ തെലുങ്കിലെയോ പോലെ ഒരു പ്രത്യേക ആക്‌ഷൻ ‘അച്ചിൽ’ വാർത്തെടുത്ത സിനിമകളെ മാത്രം തിയറ്ററിൽ വിജയിപ്പിക്കുന്ന മനസ്സല്ല മലയാളി പ്രേക്ഷകരുടേത്. അവര്‍ അവരുടെ മനസ്സിലേക്ക് പതിയുന്ന ഏതൊരു ചിത്രത്തെയും ഏറ്റെടുക്കുന്നു, അതു മറ്റുള്ളവരെ കാണാൻ പ്രേരിപ്പിക്കുന്നു. പറഞ്ഞുപറഞ്ഞറിഞ്ഞാണ് പല സിനിമകളും മലയാളത്തിൽ ഹിറ്റാകുന്നതുതന്നെ. മലയാളി പ്രേക്ഷകന്റെ ഈ സ്വഭാവം അറിയാവുന്നതുകൊണ്ടുതന്നെയാണ് സിനിമാ റിവ്യൂ നടത്തുന്നവർക്ക് കോടതി കയറേണ്ടിയും വന്നത്. ഒരു സിനിമയുടെ റിവ്യു അതിന്റെ ജയപരാജയങ്ങളെ നിശ്ചയിക്കുന്നുണ്ടോ എന്ന ചോദ്യമുയർത്തിയ വർഷം കൂടിയാണ് 2023. അതേസമയം കേരളത്തിൽ നടക്കുന്നത് ചലച്ചിത്ര നിരൂപണമല്ലെന്നും വെറും അഭിപ്രായ പ്രകടനം മാത്രമാണെന്നും സിനിമാമേഖലയിലെ വിദഗ്ധർതന്നെ വ്യക്തമാക്കുന്നു. അത്തരം അഭിപ്രായപ്രകടനങ്ങളിലൂടെ തകർന്നടിഞ്ഞ ഒരു സിനിമ 2023ൽ കാണിച്ചു തരാനുണ്ടാകുമോ? ഉത്തരം കിട്ടുക ഏറെ ബുദ്ധിമുട്ടായിരിക്കും.

ഒരാളുടെ കയ്യിൽ കുറേ കാശുണ്ട്, മറ്റൊരാളുടെ കയ്യില്‍ ഒരു സിനിമ തട്ടിക്കൂട്ടാനുള്ള എന്തൊക്കെയോ ഉണ്ട്. എന്നാലൊരു സിനിമ പിടിച്ചേക്കാം. ഇങ്ങനെ ചിന്തിക്കുന്നവർ ഇപ്പോഴും മലയാള സിനിമയിലുണ്ട്. 2023ലിറങ്ങിയ സിനിമകളുടെ നീണ്ട പട്ടിക നോക്കിയാൽ അക്കാര്യവും മനസ്സിലാകും. എന്നാൽ ആത്മാർഥമായി പരിശ്രമിച്ചിട്ടും ഹിറ്റ് ചാർട്ടിലേക്ക് ഇടിച്ചു കയറാനാകാത്ത സിനിമകളുമുണ്ട്. പലതും ഹിറ്റായില്ലെങ്കിലും പ്രേക്ഷകർക്ക് സംതൃപ്തി നല്‍കുന്ന എന്തൊക്കെയോ ഉണ്ടെന്ന തോന്നലിൽ ‘ശുഭം’ എഴുതിക്കാണിച്ച് അവസാനിക്കുന്നതുമാണ്. രേഖ, തുറമുഖം, പുരുഷപ്രേതം, സുലേഖ മൻസില്‍, ജാനകി ജാനെ, ത്രിശങ്കു, ഒ .ബേബി, കൊറോണ ധവാൻ, നദികളിൽ സുന്ദരി യമുന, തോൽവി എഫ്സി, അദൃശ്യജാലകങ്ങൾ, ശേഷം മൈക്കിൽ ഫാത്തിമ തുടങ്ങിയ ചിത്രങ്ങളിലെല്ലാം ആ പരിശ്രമത്തിന്റെ വിയർപ്പുതുള്ളികൾ നമുക്കു കാണാം. അവയെല്ലാം നമുക്കു നൽകുന്നത് വലിയ പ്രതീക്ഷകളാണ്. സൂപ്പർ ഹിറ്റുകളും ഹിറ്റുകളും ഒരുക്കിയവരുടെ കയ്യിൽ മാത്രമല്ല, മികവിനു വേണ്ടി പരിശ്രമിക്കുന്നവരുടെയും കൈകളില്‍ ഭദ്രമാണു മലയാള സിനിമയെന്ന വലിയ പ്രതീക്ഷ. അതിലേക്കാണ് 2024 നമ്മെ നയിക്കുന്നതും.