‘മൃഗങ്ങൾ കാടിറങ്ങുന്നതിന് ആശങ്കപ്പെടുത്തുന്ന ഒരു കാരണമുണ്ട്; കാട്ടിലെ പൂവിൽ വരെ വിഷം; കയ്യേറ്റക്കാരിൽ ‘കമ്യൂണിസ്റ്റ്, കോൺഗ്രസ് പച്ച’യും

ചുറ്റുമുള്ള ചെടികളുടെ വളർച്ച തടയുന്ന രാസവസ്തുക്കൾ സ്വയം ഉൽപാദിപ്പിക്കുന്ന കൊങ്ങിണിച്ചെടിയും തേയിലത്തോട്ടങ്ങളിൽ ആവരണ വിളയായി ഉപയോഗിച്ചിരുന്ന ധൃതരാഷ്ട്രപ്പച്ചയും വനഭൂമിയിലെ തദ്ദേശീയ സസ്യങ്ങളെ ഇല്ലാതാക്കി. ആനത്തൊട്ടാവാടിയിലെ മുള്ളുകള്‍ മൃഗങ്ങളുടെ സഞ്ചാരത്തെ തടസ്സപ്പെടുത്തിയപ്പോൾ ഇവ ഉൽപാദിപ്പിക്കുന്ന മൈമൊസിൻ എന്ന വിഷവസ്തു പ്രാദേശിക സസ്യങ്ങളുടെ വളർച്ച തടഞ്ഞു. കൃഷിഭൂമിയിലും വനങ്ങളിലും തരിശുഭൂമിയിലും വരെ വേരുപടർത്തി ആധിപത്യമുറപ്പിക്കാൻ കമ്യൂണിസ്റ്റു പച്ചയ്ക്കായി. ശരാശരി എൺപതിനായിരം വിത്തുകൾ വരെ വഹിക്കാൻ കഴിയുന്ന ഒരു ചെടിക്ക് ചുറ്റുമുള്ള ചെടികളെ ഇല്ലാതാക്കാനുള്ള രാസവസ്തുക്കളും ഉൽപാദിപ്പിക്കാൻ കഴിയും. 

പൂമ്പൊടിയിൽ വരെ വിഷം വഹിക്കുന്ന പാർത്തീനിയം ഹിസ്റ്റിറൊഫോറസ് (കോൺഗ്രസ് പച്ച) എന്ന ചെടിയും കാടിന്റെ സ്വാഭാവികതയെ തകർത്തു. ഉമ്മം, തോട്ടപ്പയർ, മഞ്ഞക്കൊന്ന എന്നിവയും വനമേഖലകളിൽ ഉയർത്തുന്ന ഭീഷണി ചെറുതല്ല. ഇത്തരത്തിലുള്ള അധിനിവേശ സസ്യങ്ങൾ തദ്ദേശീയ ജൈവവൈവിധ്യത്തെ പ്രതികൂലമായി ബാധിക്കാൻ കഴിയുന്നവയാണ്. സ്വന്തം സ്വാഭാവിക ആവാസവ്യവസ്ഥയ്ക്ക് പുറത്തുള്ള ഒരു അന്തരീക്ഷത്തിൽ സ്വയം ഇടം കണ്ടെത്താനും അവിടെ വ്യാപിക്കാനും കഴിയുന്നവയാണ് ഈ അധിനിവേശ സസ്യങ്ങൾ. അധിനിവേശ സസ്യങ്ങളുടെ കടന്നുകയറ്റം കാരണം ഭക്ഷ്യലഭ്യതയിലുണ്ടായ കുറവും വന്യമൃഗങ്ങളെ നാട്ടിലേക്കാകർഷിച്ച പ്രധാന ഘടകങ്ങളിലൊന്നാണ്.

∙ കാടുകളിൽ മൃഗങ്ങളുടെ എണ്ണം വർധിച്ചോ?

മൃഗങ്ങളുടെ എണ്ണം കാടുകളിൽ കൂടിയോ എന്നുള്ളതിൽ വ്യക്തതയില്ല. മൃഗങ്ങളുടെ സെൻസസ് പ്രകാരമുള്ള കണക്കിലും പലപ്പോഴും വ്യത്യാസം വരാറുണ്ട്. ആന പോലുള്ള ജീവികളുടെ എണ്ണം കൂടിയെന്നു പറയുന്നത് ശരിയല്ല. ആനകളുടെ എണ്ണം കൃത്യമായി എടുക്കാൻ സാധിക്കാറില്ല. ഏകദേശ കണക്കെടുപ്പ് മാത്രമേ ഇവയുടെ കാര്യത്തിൽ നടക്കാറുള്ളൂ. രണ്ട് വർഷത്തോളം ഗർഭകാലമുള്ള ആനകളുടെ എണ്ണത്തിൽ വലിയ വർധനവുണ്ടായിട്ടില്ല എന്നതാണ് യാഥാർഥ്യം. അഞ്ചോ ആറോ വർഷത്തിൽ ഒരിക്കൽ മാത്രമാണ് ആന പ്രസവിക്കുന്നത്. അതുകൊണ്ട് അവയുടെ എണ്ണത്തിൽ വലിയ വ്യത്യാസമുണ്ടായിട്ടില്ല. എന്നാൽ കടുവകളുടെയും മാനുകളുടെയുമൊക്കെ എണ്ണത്തിൽ പലപ്പോഴും വ്യത്യാസം വരാറുണ്ട്. 

സ്വാഭാവികമായും മാനുകളുടെ എണ്ണം വർധിച്ചാൽ കടുവകളുടെ എണ്ണവും കൂടും. മാനുകളുടെ എണ്ണം കുറയുന്നതോടെ കടുവകളുടെ എണ്ണത്തിലും വ്യത്യാസം വരും. വയനാട്ടിലും മറ്റും സീസൺ അനുസരിച്ച് മൃഗങ്ങളുടെ എണ്ണത്തിൽ ഏറ്റക്കുറച്ചിലുണ്ടാകാം. സമീപത്തുള്ള മറ്റ് സംസ്ഥാനങ്ങളിലെ മൃഗങ്ങൾ കൂടി ഇവിടേക്കെത്തുന്നതുകൊണ്ടാണ് അങ്ങനെ സംഭവിക്കുന്നത്. അടുത്ത കാടുകളിൽ ഭക്ഷണം കുറയുമ്പോൾ മാനുകളും മറ്റും ജീവികളും ദേശാടനം (Migration) ചെയ്തുവരാറുണ്ട്. പിന്നാലെ അതിനെ പിടിച്ചു ഭക്ഷണമാക്കുന്ന എല്ലാ ജീവികളുമെത്തും. അങ്ങനെവരുമ്പോൾ ഒരു വർഷത്തെ എല്ലാ സീസണിലുമുണ്ടാകുന്ന മാറ്റങ്ങൾ ശ്രദ്ധിച്ചാൽ മാത്രമേ ഇത്തരം മൃഗങ്ങളുടെ കൃത്യമായ കണക്കെടുപ്പ് സാധ്യമാകൂ.

∙ കാടുകയറുന്ന വിനോദ സഞ്ചാരം

വനത്തിലേക്കുള്ള യാത്രകളും കാടുകയറിയുള്ള വിനോദസഞ്ചാരവും ഇന്ന് വലിയ കച്ചവടമായി മാറിയിട്ടുണ്ട്. വനങ്ങളെയും വന്യജീവികളെയും അമൂല്യമായി കാണുന്ന വളരെ ചെറിയൊരു വിഭാഗവും അവയ്‌ക്ക് നിരന്തരം ശല്യംമാത്രം സൃഷ്‌ടിക്കുന്ന ബഹുഭൂരിപക്ഷവുമാണു പലപ്പോഴും വിനോദ സഞ്ചാരത്തിന്റെ പേരിൽ കാടുകളിലേക്കെത്തുന്നത്. വനത്തെ അടുത്തറിയാനുള്ള ആകാംക്ഷയിലല്ല ബഹുഭൂരിപക്ഷവും കാടുകയറുന്നത്. മൃഗങ്ങൾക്കൊപ്പമുള്ള സെൽഫികളും മറ്റു ചിത്രങ്ങളുമൊക്കെയാണ് പലരുടെയും ലക്ഷ്യം. കാട്ടിലേക്കുള്ള മനുഷ്യരുടെ ഇത്തരം കടന്നുകയറ്റങ്ങളും മൃഗങ്ങളുടെ സ്വഭാവത്തെ ഏറെ സ്വാധീനിച്ചിട്ടുണ്ട്. 

പണ്ട് മനുഷ്യരെ കണ്ട് വഴിമാറി നടന്നിരുന്ന ആനകളും മറ്റു മൃഗങ്ങളുമെല്ലാം മനുഷ്യസാമീപ്യം പതിവായതോടെ അത്രകണ്ടങ്ങു ഗൗനിക്കാതെയായി. മൃഗങ്ങളുടെ ഇത്തരം പേടിയില്ലായ്മയും ജനവാസകേന്ദ്രങ്ങളിലേക്ക് ഇറങ്ങാൻ കാരണമായിട്ടുണ്ട്. വിനോദസഞ്ചാരം ഉൾപ്പെടെയുള്ള, കാടിനകത്തേക്കുള്ള കടന്നു കയറ്റങ്ങൾക്ക് നിയന്ത്രണം വേണം. കാട്ടിനുള്ളിലേക്ക് പോകുമ്പോൾ മൊബൈൽ ഫോണിൽ ഫോട്ടോ എടുക്കാൻ വേണ്ടി വാഹനം ഉൾപ്പെടെ മൃഗങ്ങളുടെ അടുത്തേക്ക് പോകുന്ന പതിവുണ്ട്. പഴയകാലത്ത് ബൈനോക്കുലർ വച്ച് നോക്കുകയോ വലിയ ടെലിലെൻസ് വച്ച് ഫോട്ടോ എടുക്കുകയോ ചെയ്യാറുണ്ടായിരുന്നു. എന്നാൽ മൊബൈൽ വന്നതോടെ പലരും സെൽഫിയെടുക്കാൻ വേണ്ടി വാഹനത്തിനു പുറത്തേക്കിറങ്ങുമ്പോൾ ഉണ്ടാകുന്ന അപകടങ്ങളാണ് ഇപ്പോൾ ദൃശ്യങ്ങളിൽ കൂടുതലും കാണുന്നത്. 

ഉൾക്കാട്ടിലേക്കുള്ള ഇത്തരം യാത്രകൾക്ക് നിയന്ത്രണം ഏർപ്പെടുത്തണം. നമ്മുടെ വീട്ടിൽ നാലോ അഞ്ചോ അതിഥികൾ സ്ഥിരമായി വന്നാൽ വീട്ടുകാര്‍ക്ക് വീടിനുള്ളിലെ സ്ഥലം കുറയുന്നതുപോലെ വിനോദസഞ്ചാരത്തിന്റെ പേരിൽ ആളുകൾ വരുമ്പോൾ വനത്തിലെ അത്രയും സ്ഥലം മൃഗങ്ങൾക്ക് കുറയും. അതിനെയും നമ്മൾ കയ്യേറ്റമായിതന്നെ കാണണം. കൃഷിക്കു വേണ്ടി ഭൂമി കയ്യേറുന്നതു മാത്രം കയ്യേറ്റമായി കണ്ടിട്ടു കാര്യമില്ല.  മൃഗങ്ങളുടെ ആവാസവ്യവസ്ഥയിൽ കുറവു വരുത്തുന്ന എല്ലാ പ്രവർത്തനങ്ങളും, അത് വിനോദസഞ്ചാരമായാലും അണക്കെട്ട് നിർമാണമായാലും പാറമടകളുടെ പ്രവർത്തനമായാലും കയ്യേറ്റം തന്നെയാണ്. 

പാറമടകൾ വലിയ പ്രശ്നമാണ് മൃഗങ്ങൾക്ക് സൃഷ്ടിക്കുന്നത്. അവയുടെ ശബ്ദവും പ്രകമ്പനവുമൊക്കെ വലിയ ഭീതിയാണ് മൃഗങ്ങളിൽ ഉണ്ടാക്കുന്നത്. കാടിനുള്ളിലേക്കുള്ള വിനോദസഞ്ചാരങ്ങളിൽ നിയന്ത്രണം വരുത്തുന്നത് മൃഗങ്ങളെ അവയുടെ സ്വാഭാവിക ആവാസവ്യവസ്ഥയിൽ സമാധാനത്തോടെ ജീവിക്കാൻ പ്രേരിപ്പിക്കും. കാട്ടിലെ സ്വൈര്യവിഹാരത്തിനു തടസ്സം വരുന്ന എല്ലാ പ്രവൃത്തികളും മൃഗങ്ങളെ അസ്വസ്ഥരാക്കും. മനുഷ്യന്റെ സ്വഭാവത്തിൽ വന്ന മാറ്റത്തിനെ ബോധവൽക്കരണത്തിലൂടെയും നിയമത്തിലൂടെയും നിയന്ത്രിക്കണം.

∙ മൃഗങ്ങളുടെ കാടിറക്കം എങ്ങനെ നിയന്ത്രിക്കാം?

ഓരോ ജീവികൾക്കും പ്രത്യേക രീതിയിലുള്ള നിയന്ത്രണങ്ങൾ ഏർപ്പെടുത്തിയാൽ ഒരു പരിധിവരെ അവയെ അകറ്റി നിർത്താം. ഉദാഹരണത്തിന് പന്നിയുടെ കാര്യത്തിൽ അടിക്കാടുകൾ വെട്ടിത്തെളിച്ച് ഒളിക്കാനുള്ള സാഹചര്യങ്ങൾ ഒഴിവാക്കാം. ഭക്ഷണമാണ് അവയുടെ ലക്ഷ്യം. അതുകൊണ്ടു തന്നെ കൃഷിഭൂമിയിൽ വേലി കെട്ടുകയാണെങ്കിൽ ഭക്ഷണം കിട്ടാത്ത അവസ്ഥ വരും. അതോടെ അവയുടെ എണ്ണം കുറയുകയും ക്രമേണ ആ സ്ഥലത്തേക്കു വരാതാകുകയും ചെയ്യും. എന്നാൽ ആനയുടെ കാര്യത്തിൽ നമുക്ക് അത്തരമൊരു നിയന്ത്രണം പ്രായോഗികമല്ല.