മനസ്സ് സംഘർഷത്തിലാണോ? ജീവിതമൊടുക്കല്ലേ, ഈ പുസ്തകങ്ങൾ സങ്കടം കേൾക്കും; വായന മരുന്നാവുമ്പോള്‍...

രണ്ടാമത്തേത് ഒരു വ്യക്തി സ്വയം പുസ്തകം വായിച്ച് മനസ്സിലാക്കുമ്പോൾ സംഭവിക്കുന്ന ഉൾക്കാഴ്ചയാണ്. ഒരു തെറപ്പിസ്റ്റിന്റെ സഹായമില്ലാതെതന്നെ വായനയിലൂടെ ലോകത്തെയും സ്വന്തം ജീവിതത്തിനെയും ആഴത്തിൽ മനസ്സിലാക്കുവാൻ കഴിയുന്ന സാഹചര്യമാണിത്. മാനസിക സംഘർഷങ്ങളിലൂടെ കടന്നുപോകുന്ന വ്യക്തികൾക്ക് ഈ പ്രക്രിയ പലപ്പോഴും വലിയ ആശ്വാസം നൽകുന്നതായി തെളിയിക്കപ്പെട്ടിട്ടുണ്ട്. വികാരവിരേചനം അഥവാ കഥാർസിസ് എന്ന അവസ്ഥയിലൂടെ വായനക്കാരൻ കടന്നു പോവുകയും കാലങ്ങളായി അനുഭവിച്ചുകൊണ്ടിരുന്ന മനക്ലേശങ്ങൾക്ക് ലാഘവത്വം അനുഭവപ്പെടുകയും ചെയ്യുന്നു. ഇപ്രകാരം ചികിത്സാ വിധികൾക്കോ മരുന്നുകൾക്കോ തുല്യമായി വായന മാറുന്നു.

∙ സ്വയം കണ്ടെത്തലിനുള്ള ഉപാധിയായി മാറുന്ന സാഹിത്യം

അമേരിക്കൻ സാഹിത്യകാരി സിൽവിയ പ്ലാത്തിന്റെ ആത്മകഥാപരമായ നോവലാണ് ‘ദ് ബെൽ ജാർ’. അതിലെ എസ്റ്റർ ഗ്രീൻവുഡ് എന്ന കഥാപാത്രം വിഷാദരോഗത്താൽ ബുദ്ധിമുട്ടുന്ന ഒരാളാണ്. അവളുടെ പ്രശ്നങ്ങളും അവയെക്കുറിച്ചുള്ള കാഴ്ചപ്പാടും വായനയിലൂടെ നമുക്ക്  മനസ്സിലാക്കാം. വിഷാദരോഗിയായ ഒരാളെ സംബന്ധിച്ച് ഈ വായന സ്വയം കണ്ടെത്തലിന് തുല്യമാണ്. തന്റേതിന് സമാനമായ പ്രശ്നം ലോകത്തിൽ പലരും അനുഭവിക്കുന്നുണ്ട് എന്ന തോന്നൽ ഏകാന്തതയിൽനിന്ന് പുറത്തു കടക്കാൻ സഹായിക്കുന്നു. പൊതുവായി കാണപ്പെടുന്ന പല ലക്ഷണങ്ങൾക്കുമപ്പുറം പെരുമാറ്റത്തിലെയും ചിന്തകളിലെയും മാറ്റങ്ങൾ മനസ്സിലാക്കി, വ്യക്തിത്വത്തിന്റെ ആഴങ്ങളിലേക്ക് ഇറങ്ങിച്ചെല്ലുവാൻ അത് ഒരാളെ പ്രേരിപ്പിക്കുന്നു. ജീവിതത്തിൽ മുന്നോട്ടു പോകുവാനുള്ള ആത്മബലവും ഇത്തരം വായനകൾ നൽകാറുണ്ട്.

ജെഡി സെലിംഗറിന്റെ ‘ദ് ക്യാച്ചർ ഇൻ ദ് റൈ’ എന്ന നോവലിലെ പ്രധാന കഥാപാത്രമായ ഹോൾഡൻ കോൾഫീൽഡും വെർജീനിയ വൂൾഫിന്റെ ‘മിസിസ് ഡയലോവെ’ എന്ന നോവലിലെ ക്ലാരിസ ഡയലോവെയുമടക്കം മാനസിക സംഘർഷങ്ങൾ അനുഭവിക്കുന്ന നിരവധി കഥാപാത്രങ്ങൾ സാഹിത്യത്തിലുണ്ട്. സിൽവിയ നാസറിന്റെ ‘എ ബ്യൂട്ടിഫുൾ മൈൻഡി’ലെ ജോൺ നാഷ് (പാരാനോയ്ഡ് സ്കീസോഫ്രീനിയ), ടെന്നസി വില്യംസിന്റെ ‘എ ഡിസൈർ നെയിംഡ് സ്ട്രീറ്റ്കാറി’ലെ ബ്ലാഞ്ചെ ഡുബോയിസ് (ബോർഡർലൈൻ വ്യക്തിത്വ വൈകല്യം), ഹാർപ്പർ ലീയുടെ ‘ടു കിൽ എ മോക്കിംഗ്ബേർഡി’ലെ ബൂ റാഡ്‌ലി (സോഷ്യൽ ആങ്‌സൈറ്റി ഡിസോർഡർ) എന്നിവരെല്ലാം ഇതിന് ഉദാഹരണമാണ്.

ഈ കഥാപാത്രങ്ങളെല്ലാം രോഗഗ്രസ്തരായ വ്യക്തികളെ മാത്രമല്ല സ്വാധീനിച്ചിട്ടുള്ളത്. മാനസികപരമായ സങ്കീർണതകൾ അനുഭവിക്കാത്ത ഒരു വ്യക്തിയെ, അവ പരിഗണിക്കപ്പെടേണ്ട പ്രധാനപ്പെട്ട ഒരു വിഷയമായി ഉൾക്കൊള്ളുവാൻ പ്രേരിപ്പിക്കുന്നു എന്നത് സാഹിത്യം ചെയ്യുന്ന വലിയൊരു സേവനമാണ്. മാനസികാരോഗ്യത്തിന്റെ പ്രാധാന്യം കൂടുതൽ പേരിലേക്ക് എത്തിക്കുന്നതിലും സാഹിത്യം വളരെ പ്രധാനപ്പെട്ട ഒരു പങ്ക് വഹിക്കുന്നുണ്ട്. എം.ടി വാസുദേവൻ നായരുടെ 'ഇരുട്ടിന്റെ ആത്മാവ്' എന്ന കൃതിയിലെ വേലായുധനോട് മാനുഷിക പരിഗണന തോന്നുന്നവിധം വായനക്കാരൻ ചിന്തിക്കുന്നുണ്ടെങ്കിൽ, ആ മാറ്റം ചെറുതല്ല. സമൂഹത്തിൽ നിന്നും കുടുംബത്തിൽ നിന്നും പിന്തുണ ലഭിക്കാതെ ഒറ്റപ്പെട്ടു പോകുന്ന കഥാപാത്രങ്ങളും അതു വരുത്തുന്ന പ്രത്യാഘാതങ്ങളും ചൂണ്ടിക്കാണിക്കുന്ന കൃതികൾ രോഗികൾക്കും അവരുടെ ചുറ്റുമുള്ളവർക്കും ഉപകാരപ്രദമായി തീരും.

∙ ഒറ്റപ്പെടലിൽ നിന്നുള്ള രക്ഷാമാർഗമാകുന്ന വായന

മാനസിക പ്രതിസന്ധികൾ നേരിടുന്ന വ്യക്തികളിൽ പൊതുവേ കണ്ടുവരുന്ന ഒന്നാണ് സാമൂഹ്യ ഉത്കണ്ഠയും ഒറ്റപ്പെടലും. സംഘർഷഭരിതമായ മനസ്സുമായി, ചടുലമായ ഈ ലോകത്തിൽ ജീവിക്കുമ്പോൾ, തന്നെ ആരും മനസ്സിലാക്കുന്നില്ല എന്ന തോന്നൽ പലരെയും കടുത്ത ഒറ്റപ്പെടലിൽ കൊണ്ടെത്തിച്ചേക്കാം. തന്റെ സമയം ക്രിയാത്മകമായി ഉപയോഗപ്പെടുത്തുന്നതിന്റെ ഭാഗമായിട്ടാണ് പലരും വായന ആരംഭിക്കുന്നതെങ്കിലും കാലക്രമേണ അതിന്റെ സ്വഭാവത്തിന് മാറ്റം സംഭവിക്കുന്നു. തനിക്ക് ആത്മബന്ധം തോന്നാത്ത മനുഷ്യന്മാരെക്കാൾ ഉപരി തന്നോട് ചേർന്ന് നിൽക്കുന്ന പുസ്തകങ്ങളെയാണ് അപ്പോൾ അവർ സ്നേഹിക്കുക. ജീവിതത്തിൽ നിന്ന് ലഭിക്കാതെ പോയ മനസ്സിലാക്കലുകളും സന്തോഷങ്ങളും തുറന്നുപറച്ചിലുകളും സാഹിത്യം അവർക്ക് നൽകുന്നു.

സൈക്കോളജിസ്റ്റായ എബ്രഹാം മാസ്ലോവിന്റെ ‘ഹൈറാക്കി ഓഫ് നീഡ്സ്’ എന്ന സിദ്ധാന്തപ്രകാരം ഒരു വ്യക്തിയുടെ വളർച്ചയ്ക്ക് അയാളുടെ ചുറ്റുപാടിൽ നിന്ന് ലഭിക്കേണ്ട സുരക്ഷിതത്വബോധം, സ്നേഹം, പരിഗണന, ഭൗതികാവശ്യങ്ങൾ എന്നിവയുടെ ഇല്ലായ്മയാണ് പല മാനസിക പ്രശ്നങ്ങൾക്കും അടിസ്ഥാനമായി മാറുന്നത്. പലപ്പോഴും വായന ആ വിടവാണ് നികത്തുന്നത്. തനിക്ക് ലഭിക്കാതെ പോയ പലതും ആ ഭാവനാലോകത്ത് നിന്ന് അയാൾ കണ്ടെത്തുകയും സമൂഹത്തിൽ നിന്ന് ഒറ്റപ്പെട്ട് നിൽക്കുമ്പോഴും ഏകാന്തതയുമായി പൊരുത്തപ്പെട്ട് പോകുവാൻ സഹായിക്കുകയും ചെയ്യുന്നു.

∙ അപകർഷതാബോധത്തിൽ നിന്നുള്ള മുക്തി വായനയിലൂടെ

മനഃക്ലേശങ്ങളുടെ ഭാഗമായി ഒരു വ്യക്തിയിൽ ഉടലെടുക്കാൻ സാധ്യതയുള്ള ഒന്നാണ് അപകർഷതാബോധം. ഈ സമൂഹത്തിൽ ജീവിക്കുവാൻ പ്രാപ്തനല്ല എന്ന തോന്നലിനോടൊപ്പം തനിക്ക് ജീവിക്കുവാൻ സാധിക്കുന്ന ഒരു സമാന്തര ലോകം ഉണ്ടായിരുന്നെങ്കിൽ എന്ന ആഗ്രഹവും പലപ്പോഴും ഇത്തരം വ്യക്തികളിൽ കാണാം. തന്നെ മനസ്സിലാക്കാത്ത ലോകത്തിനോടുള്ള വെറുപ്പിനോടൊപ്പം ഒരു സാധാരണ ജീവിതം നയിക്കുവാൻ സാധിക്കാനാവാത്ത അവനവനോടും ഒരു വിരക്തി അനുഭവപ്പെട്ടേക്കാം. വ്യത്യസ്തമായി ചിന്തിക്കുന്നവർക്കും ഈ ലോകത്തിൽ സ്ഥാനമുണ്ടെന്നും വ്യത്യസ്ത പുലർത്തിക്കൊണ്ടുതന്നെ ജീവിതത്തിൽ മുന്നേറാൻ സാധിക്കുമെന്നും തോന്നൽ നൽകുന്നയിടത്താണ് വായനയുടെ പ്രാധാന്യം. അപകർഷതാബോധത്തിൽ നിന്നും ആത്മസംതൃപ്തിയിലേക്കുള്ള ഒരു യാത്രയായി പുസ്തകങ്ങൾ മാറുന്നു.