‘എന്റെ ഭാര്യയും കുട്ടിയും ഹമാസ്’; ചെരിപ്പിടാതെ ജയിലിലെ സ്വന്തം ‘മണ്ണിൽ’; രക്ഷിക്കാൻ ഇറാനും വന്നില്ല; ഇനി തലപ്പത്ത് ‘ഹോട്ടൽ ഗയ്സ്’?

ഇനിയൊരിക്കലും പഴയ പ്രതാപത്തോടെ തിരിച്ചു വരാനാനാകാത്ത വിധം ഈ സായുധ സംഘടനകളിൽ പലതിനെയും ഇസ്രയേൽ അടിച്ചൊതുക്കുകയും ചെയ്തിരിക്കുന്നു. കഴിഞ്ഞ ഒരു വർഷമായി ഹമാസിനോട് ചെയ്തിരുന്നതിന് തുല്യമായ ആക്രമണമാണ് വെറും രണ്ടാഴ്ച കൊണ്ട് ലബനനിലെ ഹിസ്ബുല്ലയ്ക്കു നേരെ ഇസ്രയേൽ നടത്തിയത്. തലസ്ഥാനമായ ടെൽ അവീവിലേക്ക് മിസൈൽ ആക്രമണം നടത്തിയിട്ടും ഇറാനെ മാത്രം ഇസ്രയേൽ ആക്രമിക്കാതെ വെറുതെവിട്ടു. എന്നാൽ യഹ്യയുടെ മരണം ഇറാനും കനത്ത തിരിച്ചടിയാകും. കനത്ത തിരിച്ചടിയുണ്ടാകുമെന്ന് ഇറാനും ഇസ്രയേലിന് മുന്നറിയിപ്പ് നൽകിയിട്ടുണ്ട്. 

ഹനിയയ്ക്കു ശേഷം തലപ്പത്ത് ചുമതലയേറ്റതിനു പിന്നാലെ ഹമാസിനെ ആക്രമണത്തിന് അഴിച്ചുവിട്ട് യഹ്യയും സംഘടനയിലെ ടോപ് കമാൻഡർമാരിലൊരാളായ സഹോദരനും ഗാസയിലെ എണ്ണമറ്റ രഹസ്യത്തുരങ്കങ്ങളില്‍ ഒന്നിലേക്കു വലിഞ്ഞു. ഇടക്കാലത്തെപ്പോഴോ ഗാസയിലെ ഖാൻ യൂനിസിലെ തുരങ്കങ്ങളിലൊന്നിലെ ഇരുട്ടിലൂടെ നടക്കുന്ന യഹ്യയുടെ വിഡിയോ ആണ് ഇദ്ദേഹം ജീവിച്ചിരിപ്പുണ്ട് എന്നതിന്റെ ഏക തെളിവായിരുന്നത്. യഹ്യയ്ക്കൊപ്പം ഒക്ടോബർ 7 ആക്രമണപദ്ധതി തയാറാക്കിയ സൈനിക നേതാവ് മുഹമ്മദ് റീഫ് തുരങ്കത്തിനു നേരെയുണ്ടായ മിസൈലാക്രമണങ്ങളിലൊന്നിൽ വധിക്കപ്പെടുകയും ചെയ്തു. 

∙ ആരെയും വിശ്വാസമില്ല

രഹസ്യാത്മകതയായിരുന്നു എന്നും യഹ്യയുടെ രീതികൾ. ചെകുത്താന്റെ പ്രതിരൂപം എന്നായിരുന്നു അദ്ദേഹത്തെ ഇസ്രയേൽ വിശേഷിപ്പിച്ചിരുന്നത്. ഒരിടത്തും സ്ഥിരമായി നിൽക്കില്ല. തുടർച്ചയായി സഞ്ചരിക്കും. ആശയവിനിമയത്തിന് ഡിജിറ്റൽ ഉപകരണങ്ങളൊന്നും ഉപയോഗിക്കില്ല. ഏറ്റവും അടുത്ത അനുയായികളെയും കൊറിയറുകളുമാണ് സന്ദേശങ്ങളറിയാനുള്ള വഴിയായി ഉപയോഗിച്ചിരുന്നത്. ഇതിനിടെ ഈജിപ്തിന്റെയും ഖത്തറിന്റെയും യുഎസിന്റെയും നേതൃത്വത്തിൽ വെടിനിർത്തൽ ശ്രമങ്ങളേറെ നടന്നിട്ടും യഹ്യ മാത്രം ഒന്നും മിണ്ടിയില്ല. എവിടെയാണെന്നു പോലും അറിയാത്ത അവസ്ഥ. 

അതീവ രഹസ്യമായി പ്രവർത്തിക്കുന്ന ദൂതന്മാരിലൂടെ പലപ്പോഴും വെടിനിർത്തൽ സംബന്ധിച്ച സന്ദേശങ്ങൾ യഹ്യയിലേക്ക് എത്തിച്ചിരുന്നു. ദിവസങ്ങളെടുത്തു ഇതിന്. എന്നാൽ ഒന്നിനും അനുകൂല മറുപടിയുണ്ടായില്ലെന്നു മാത്രം. അതോടെ വെടിനിർത്തൽ അനിശ്ചിതമായി തീരുമാനമാകാതെ തുടർന്നു. അതേസമയം മധ്യസ്ഥ ചർച്ചകളിൽ ഇത്തരമൊരു നിലപാട് സ്വീകരിക്കുന്നതായിരുന്നില്ല നേരത്തേ യഹ്യയുടെ രീതി. 2011ൽ ഇസ്രയേലും ഹമാസും തമ്മിൽ നടന്ന തടവുകാരുടെ കൈമാറ്റംതന്നെ ഉദാഹരണം. അന്ന് ഇസ്രയേലിന്റെ ജയിലിലായിരുന്ന യഹ്യ ഉൾപ്പെടെ 1027 തടവുകാരെയാണ് ഇസ്രയേലിന് വിട്ടയയ്ക്കേണ്ടി വന്നത്. ഹമാസ് പിടികൂടിയ ഒരു ഇസ്രയേലി സൈനികനെ മോചിപ്പിക്കുന്നതിനു വേണ്ടിയായിരുന്നു അത്. 22 വർഷമായി ഇസ്രയേൽ തടവറയിലായിരുന്ന യഹ്യ ആയിരുന്നു അന്ന് മധ്യസ്ഥ ചർച്ചകൾക്കെല്ലാം നേതൃത്വം വഹിച്ചത്. 

∙ ഖാൻ യുനിസിലെ കശാപ്പുകാരൻ.

ഗാസയിലെ അഭയാർഥി ക്യാംപുകളിലായിരുന്നു യഹ്യയുടെ കുട്ടിക്കാലം. അന്ന് ഐക്യരാഷ്ട്ര സംഘടനയുടെ നേതൃത്വത്തിൽ വിതരണം ചെയ്തിരുന്ന അരിയുടെ ചണച്ചാക്കുകൾ ഉപയോഗിച്ച് അമ്മ തനിക്ക് വസ്ത്രങ്ങള്‍ തുന്നിത്തന്ന കഥ പറഞ്ഞിട്ടുണ്ട് യഹ്യ. പിന്നീട് 1980കളിൽ ഹമാസ് രൂപീകരണത്തിനു പിന്നാലെ അതിന്റെ ആശയങ്ങളിൽ ആകൃഷ്ടനായി ഒപ്പം ചേർന്നു. വൈകാതെതന്നെ സൈനിക വിഭാഗത്തിന്റെ തലപ്പത്തേക്കെത്തി. അതിനിടെ രണ്ട് ഇസ്രയേലി സൈനികരെ കൊലപ്പെടുത്തിയ സംഭവത്തിൽ 1988ൽ ഇസ്രയേലിന്റെ പിടിയിലാവുകയും ചെയ്തു. ഇസ്രയേലിന് വിവരങ്ങൾ ചോർത്തിക്കൊടുത്ത പലസ്തീൻകാരെന്ന് ആരോപിച്ചും പലരെയും യഹ്യ ഇല്ലാതാക്കിയിട്ടുണ്ട്. അത്തരത്തിൽ നാലു പേരെ കൊലപ്പെടുത്തിയതിനും കൂടിയായിരുന്നു ശിക്ഷ. ഈ പീഡന–കൊലപാതക രീതി കാരണം മറ്റൊരു പേരും പാശ്ചാത്യമാധ്യമങ്ങൾ യഹ്യയ്ക്കു നൽകി– ‘ഖാൻ യുനിസിലെ കശാപ്പുകാരൻ’.

നാല് ജീവപര്യന്തം ഒരുമിച്ച് ലഭിച്ച്, രണ്ടു പതിറ്റാണ്ടോളം ഇസ്രയേലിന്റെ ക്രൂരപീഡനത്തിന് വിധേയനായ ശേഷമാണ് 2011ൽ യഹ്യ മോചിതനാകുന്നത്. ജയിലിലായിരിക്കെ ആത്മകഥാപരമായ ഒരു നോവലും എഴുതി. ഒരു രാക്ഷസൻ അതിന്റെ ഇരയുടെ എല്ലുകൾ ഒടിക്കുന്നതു പോലെയായിരുന്നു ഇസ്രയേൽ സൈന്യം പലസ്തീനിലെ വീടുകൾ തകർത്തത് എന്നായിരുന്നു യഹ്യ അന്നെഴുതിയത്. പലസ്തീനെന്ന സ്വതന്ത്ര രാഷ്ട്രം സ്ഥാപിക്കുക, ഇസ്രയേലിനെ എന്നന്നേക്കുമായി ഇല്ലാതാക്കുക ഇതാണ് തന്റെ ലക്ഷ്യമെന്ന് യഹ്യ പ്രഖ്യാപിക്കുകയും ചെയ്തിരുന്നു. താൻ മോചിപ്പിക്കപ്പെട്ടതു പോലെ ഇസ്രയേലിന്റെ തടവറയിലുള്ള എല്ലാ പലസ്തീൻ സ്വദേശികളെയും മോചിതരാക്കുമെന്നും യഹ്യ പറഞ്ഞിരുന്നു. അതിന്റെ ഭാഗമായിട്ടായിരുന്നു ഒക്ടോബർ 7ലെ ആക്രമണമെന്നും കരുതപ്പെടുന്നു. നയതന്ത്രപരമായും സൈനികപരമായുമുള്ള ഹമാസിന്റെ നീക്കങ്ങളുടെയെല്ലാം ചുക്കാന്‍ പിടിച്ച നേതാവ് കൂടിയായിരുന്നു യഹ്യ. 

∙ അന്നേ പറഞ്ഞു, ‘ആക്രമിക്കും’

ഒക്ടോബർ ഏഴിലെ ആക്രമണം യഹ്യയെ സംബന്ധിച്ചിടത്തോളം ഒട്ടും രഹസ്യാത്മകമായിരുന്നില്ല. 2022ൽത്തന്നെ ഒരു പ്രസംഗത്തിനിടെ യഹ്യ പറഞ്ഞത് ഹമാസ് പ്രവർത്തകരുടെയും റോക്കറ്റുകളുടെയും ഒരു കുത്തിയൊഴുക്ക് ഏതുനിമിഷവും ഇസ്രയേലിനു പ്രതീക്ഷിക്കാം എന്നായിരുന്നു. ആ ആക്രമണത്തിന്റെ ബാക്കിപത്രം എന്തായിരിക്കുമെന്നും പ്രസംഗത്തിലുണ്ടായിരുന്നു. ഒന്നുകിൽ, 1967ൽ ഇസ്രയേൽ അധിനിവേശം നടത്തിയ പലസ്തീൻ പ്രദേശത്തുനിന്ന് അവർ ഒഴിഞ്ഞുപോയി ഒരു പുതിയ രാഷ്ട്രം സ്ഥാപിക്കുന്നതിന് ലോകം ഹമാസിനൊപ്പം നിൽക്കും, അല്ലെങ്കില്‍ ലോകത്തിനു മുന്നിൽ ഇസ്രയേൽ ഒറ്റപ്പെടും എന്നായിരുന്നു അത്. 

ഈ പ്രസംഗത്തിന്റെ സമയത്തുതന്നെ ആക്രമണത്തിന്റെ പരിശീലനം പരസ്യമായിത്തന്നെ ഹമാസ് നടത്തിത്തുടങ്ങിയിരുന്നുവെന്നാണ് പറയപ്പെടുന്നത്. ഇസ്രയേൽ അതിർത്തി കടന്നുള്ള ആക്രമണത്തിനു സമാനമായിരുന്നു പരിശീലനവും. യഹ്യയും ദീഫും അതിനു നേതൃത്വം നൽകുകയും ചെയ്തു. പക്ഷേ യഹ്യ പറഞ്ഞതു പോലൊന്നും സംഭവിച്ചില്ല. ഇസ്രയേൽ ഒറ്റപ്പെട്ടില്ല, പലസ്തീൻ രാഷ്ട്രമെന്നല്ല ഗാസയുടെ പുനർനിർമാണം പോലും അജൻഡയിൽ ഇല്ലെന്ന് ഇസ്രയേൽ പ്രധാനമന്ത്രി ബെന്യാമിൻ നെതന്യാഹു വ്യക്തമാക്കുകയും ചെയ്തിരിക്കുന്നു. മാത്രവുമല്ല ബന്ദികളെല്ലാം തിരികെ വരും വരെ ഗാസയില്‍നിന്ന് പിന്മാറില്ലെന്നും നെതന്യാഹു വ്യക്തമാക്കി.

∙ ആരെയും കൂസാത്തൊരാൾ

യഹ്യയുടെ മാതാവിന്റെ നഗരമായ അഷ്‌കെലോണിലെ ജയിലിൽ കുറേക്കാലം അദ്ദേഹത്തെ പാർപ്പിച്ചിരുന്നു. 1991 മുതൽ 1995 വരെയുള്ള സമയത്ത് ലബനനിൽനിന്നുള്ള കമ്യൂണിസ്റ്റ് സായുധ സേനാംഗം നബീഹ് അവാഡയും ജയിലിൽ ഒപ്പം വന്നു. അന്ന് യഹ്യയുമായി സംസാരിച്ചതിൽനിന്ന് മനസ്സിലായ ചില കാര്യങ്ങൾ പിൽക്കാലത്ത് അദ്ദേഹം വാർത്താ ഏജന്‍സിക്കു നൽകിയ അഭിമുഖത്തിലൂടെ പുറത്തുവിട്ടിരുന്നു. 1993ൽ ഇസ്രയേലും പലസ്തീനും തമ്മിൽ ഒപ്പിട്ട ഓസ്‌ലോ കരാർ ഒരു ദുരന്തമാണെന്നായിരുന്നു യഹ്യ പറഞ്ഞത്. ആ കരാർ ഇസ്രയേലിന്റെ കപടതന്ത്രമാണെന്നും യഹ്യ വിശ്വസിച്ചു.