ഈ പ്രായത്തിൽ ഇതൊക്കെ എന്തിന്? ‘അയൺമെൻ’ മറുപടി കൊടുത്തു; ഓടിയത് 21.1 കിലോമീറ്റർ, കടലിലൂടെ 1.9 കി.മീ, സൈക്കിളിൽ 90 കി.മീ!

2024 ഒക്ടോബർ 27. ഗോവയിലെ മിരാമർ ബീച്ച് ആവേശകരമായ ഒരു കായിക മാമാങ്കത്തിന് വേദിയായി. ലോകത്തിലെ സാഹസിക കായികവിനോദങ്ങളിൽ ഒന്നായ അയൺമാൻ 70.3! നീന്തൽ, സൈക്ലിങ്, ഹാഫ് മാരത്തൺ എന്നിവ ഒന്നിനു പിറകെ ഒന്നായി പൂർത്തിയാക്കി ഫിനിഷിങ് പോയിന്റിലേക്ക് കുതിക്കാൻ തയാറായി അന്ന് അവിടെ എത്തിയത് 1300ലധികം കായികപ്രേമികളാണ്. അവരെ പിന്തുണയ്ക്കാനെത്തിയ ജനാവലിയും ചേർന്നപ്പോൾ മിരാമർ കടൽത്തീരം ഒരു ആൾക്കടലായി. ആ കൂട്ടത്തിൽ അയൺമാൻ 70.3ൽ മാറ്റുരയ്ക്കാനെത്തിയ രണ്ടു മലയാളികൾ– അരുൺജിത്ത് ഉണ്ണികൃഷ്ണനും ശ്രീനാഥും.

മറ്റു മത്സരാർഥികളിൽ നിന്ന് ഇവർക്കു രണ്ടുപേർക്കും ഒരു വ്യത്യാസമുണ്ടായിരുന്നു. വെള്ളം പോലും പേടിയായിരുന്ന അരുൺജിത്ത് ഈ കായികമത്സരത്തിനു വേണ്ടിയാണ് നാല് മാസത്തിനുള്ളിൽ നീന്തൽ പരിശീലിച്ചത്. ശ്രീനാഥ് ആകട്ടെ, മാരത്തൺ പോയിട്ട് ഒരു കിലോമീറ്റർ പോലും മുൻപ് തികച്ച് ഓടിയിരുന്നില്ല. അയൺമാനിൽ പങ്കെടുക്കാൻ സ്വന്തം പരിമിതികളെയും ഭയങ്ങളെയും കഠിനാധ്വാനത്തിലൂടെയും ആത്മവിശ്വാസത്തോടെയും മറികടന്നാണ് അവരെത്തിയത്. ആ വരവ് വെറുതെയായില്ല. ആറു മണിക്കൂർ 47 മിനിറ്റിൽ അരുൺജിത്ത് അയൺമാൻ പൂർത്തിയാക്കിയപ്പോൾ ശ്രീനാഥ് ഏഴു മണിക്കൂർ 34 മിനിറ്റിൽ ഫിനിഷിങ് പോയിന്റിലെത്തി. 

അരുണിന് പ്രായം നാൽപ്പത്തിരണ്ടും ശ്രീനാഥിന് മുപ്പത്തിയെട്ടുമാണ്. സ്പോർട്സ് ഒരു പ്രഫഷൻ ആയി എടുക്കുന്നവർ വിരമിക്കുന്ന പ്രായത്തിലാണ് അരുണും ശ്രീനാഥും സജീവമായി കായികരംഗത്തേക്ക് ഇറങ്ങുന്നത്. അതു തന്നെയാണ് ഇവരുടെ കായികയാത്രയെ സ്പെഷൽ ആക്കുന്നതും.  ഇവൈ കൊച്ചിയിൽ ഹ്യൂമൻ റിസോഴ്സ് വിഭാഗത്തിൽ അസിസ്റ്റന്റ് ഡയറക്ടറായി ജോലി ചെയ്യുന്ന അരുൺജിത്തും റിസർവ് ബാങ്ക് ഇന്ത്യയുടെ കൊച്ചി ഓഫിസിൽ അസിസ്റ്റന്റ് മാനേജർ ആയി പ്രവർത്തിക്കുന്ന ശ്രീനാഥും അയൺമാൻ 70.3 അനുഭവങ്ങൾ പങ്കുവയ്ക്കുകയാണ് മനോരമ പ്രീമിയത്തിൽ.  

∙ കയ്യടി നേടിയ അയൺമാൻ വിജയം

‘‘എന്റെ 39–ാമത്തെ വയസ്സിലാണ് ഞാൻ കായികരംഗത്തേക്ക് വരുന്നത്’’, അരുൺജിത്ത് സ്വന്തം കഥ പറഞ്ഞു തുടങ്ങി. ‘‘ഗോവയിൽ നടന്ന അയൺമാൻ 70.3യിൽ പങ്കെടുക്കുന്നതിന് വെറും നാലു മാസം മുൻപാണ് ഞാൻ ജീവിതത്തിൽ തന്നെ നീന്തുന്നത്. എനിക്ക് വെള്ളം അത്രയ്ക്കു പേടിയാണ്. നീന്തുന്നതു പോയിട്ട് ചെറിയൊരു സ്വിമ്മിങ് പൂളിൽ പോലും ഇറങ്ങാൻ മടിച്ചിരുന്ന ഞാനാണ് അയൺമാനിനു വേണ്ടി 1.9 കിലോമീറ്റർ കടലിലൂടെ നീന്തിയത്. ശ്രീനാഥിന് ആകട്ടെ നീന്തലും സൈക്ലിങ്ങും ഉണ്ടായിരുന്നു. ഓട്ടമാണ് പുതിയതായി പരിശീലിച്ചത്. അതുകൊണ്ടു തന്നെ ഇവന്റിൽ ഞങ്ങളുടെ പ്രകടനം ശ്രദ്ധിക്കപ്പെട്ടു. 

ഞാനും ശ്രീനാഥും നീന്തൽ പരിശീലനം നടത്തിയിരുന്നത് പെരിയാറിലായിരുന്നു. ട്രയാത്ത്‍ലണിൽ കടലിലാണ് മത്സരം. അതിനു പരിശീലനം നേടാൻ പിന്നെയും ഏറെ പ്രതിസന്ധികൾ മറികടക്കേണ്ടി വന്നു. ചെന്നൈയിൽ പോയാണ് കടലിൽ നീന്തുന്നതിന് പരിശീലനം നേടിയത്. ആ പരിശീലനത്തിന് വെറും രണ്ടാഴ്ചയ്ക്കു ശേഷം പോണ്ടിച്ചേരിയിൽ നടന്ന ട്രയാത്ത്‍ലണിൽ ഞാൻ മൂന്നാം സ്ഥാനം നേടി. അതിന് ഒരാഴ്ചയ്ക്കു ശേഷം കോഴിക്കോട്ട് നടന്ന മത്സരത്തിലും വിജയിച്ചു’’, ആത്മവിശ്വാസം പകർന്ന കായികമത്സരങ്ങളെക്കുറിച്ച് അരുൺജിത്ത് വാചാലനായി. 

ഫിനിഷിങ് പോയിന്റിലെത്തുമ്പോഴുള്ള ആനന്ദം അനിർവചനീയമാണെന്ന് ശ്രീനാഥ് പറയുന്നു. ‘‘ഫിനിഷിങ് ലൈൻ ക്രോസ് ചെയ്യുമ്പോഴുള്ള സന്തോഷം പറഞ്ഞറിയിക്കാൻ കഴിയില്ല. ദീർഘകാലത്തെ കഠിനാധ്വാനത്തിന്റെ ഫലമായിരുന്നു ആ നിമിഷം. എല്ലാ ദിവസവും രാവിലെ നാലു മണിക്ക് എഴുന്നേൽക്കുന്നു. രണ്ടു മണിക്കൂറോളം സൈക്കിൾ ചവിട്ടുന്നു. അതിനു ശേഷം ഓട്ടം പരിശീലിക്കുന്നു. വാരാന്ത്യങ്ങളിൽ പെരിയാറിൽ പോയി നീന്തൽ പരിശീലിക്കുന്നു. അതുപോലെ കിട്ടുന്ന സമയങ്ങളിലെല്ലാം ഇത്തരം ഇവന്റുകളിൽ പങ്കെടുക്കുന്നു. അങ്ങനെ ദീർഘകാലത്തെ പരിശീലനമുണ്ട്. അതുകൊണ്ട്, ഫിനിഷിങ് പോയിന്റിലെത്തിയപ്പോൾ വല്ലാത്ത സന്തോഷവും സങ്കടവും ഉണ്ടായിരുന്നു. ഇതിലും വലുത് ചെയ്യാമെന്ന ആത്മവിശ്വാസം കൂടി ഇതിലൂടെ ലഭിച്ചു,’’ ശ്രീനാഥിന്റെ വാക്കുകളിൽ ആത്മവിശ്വാസത്തിന്റെ തിളക്കം.

∙ കോവിഡിൽ തുടങ്ങിയ ശീലങ്ങൾ

കോവിഡ് സമയത്ത് ഫിറ്റ്നസിനു വേണ്ടി ഓടിത്തുടങ്ങിയതാണെന്ന് അരുൺജിത്ത് പറയുന്നു. ‘‘കോവിഡ് കാലം കഴിഞ്ഞും ആ ശീലം തുടർന്നു. ചെറുപ്പത്തിൽ ഒരുപാടു ദൂരം നടക്കുമായിരുന്നു. 30–40 കിലോമീറ്റർ ദൂരമൊക്കെ അങ്ങനെ നടക്കും. പിന്നീട് അതു വിട്ടു. കോവി‍ഡ് വന്ന് വീട്ടിൽ ഇരുന്നപ്പോഴാണ് സ്പോർട്സിനോടുള്ള ഇഷ്ടമൊക്കെ പൊടിതട്ടി എടുത്തത്. ആ സമയത്ത് ഭാരം അൽപം കൂടിയിരുന്നു. അതൊന്നു കുറയ്ക്കാൻ വേണ്ടി തുടങ്ങിയത് പിന്നീടൊരു ഹരമായി മാറി. നടക്കാൻ താൽപര്യമുള്ളതിനാൽ ഓടുന്നത് പ്രശ്നമാകില്ലെന്നായിരുന്നു ആദ്യം കരുതിയത്. പക്ഷേ, ചെയ്തു തുടങ്ങിയപ്പോൾ ഓട്ടവും നടത്തവും രണ്ടു വ്യത്യസ്ത കായിക പ്രവർത്തനമാണെന്ന് മനസ്സിലായി.