കമന്റിട്ട് മുങ്ങിയാലും ലൈംഗിക അതിക്രമത്തിന് കേസ്; സിം മാറ്റിയാൽ പ്രശ്നം തീരുമോ! അശ്ലീലച്ചിരിക്കും പിടി വീഴും

തൃഷ, റിമ കല്ലിങ്കൽ, വിനി രാമൻ, മരിയ ഷറപ്പോവ, അനുഷ്‌ക ശർമ, അനശ്വര രാജൻ... ഇങ്ങനെ നീളും സമൂഹമാധ്യമത്തിൽ ലൈംഗികച്ചുവയുള്ള പരാമർശങ്ങൾ വഴി അധിക്ഷേപിക്കപ്പെടുന്ന സ്ത്രീകളുടെ പട്ടിക. സച്ചിൻ തെൻഡുൽക്കറെ അറിയില്ലെന്ന് പറഞ്ഞതിന്റെ പേരിലാണ് മരിയ ഷറപ്പോവ അധിക്ഷേപം നേരിട്ടതെങ്കിൽ ലോകകപ്പില്‍ ഓസ്ട്രേലിയയോട് തോറ്റതാണ് ഓസ്ട്രേലിയൽ ക്രിക്കറ്റ് താരം ഗ്ലെൻ മാക്സ്‌വെലിന്റെ ഭാര്യ വിനി രാമനെ സദാചാര ആൺകൂട്ടത്തിന്റെ നോട്ടപ്പുള്ളിയാക്കിയത്. അതിനും മുൻപ് വിരാട് കോലി ക്രിക്കറ്റിൽ മികച്ച പ്രകടനം കാഴ്ച വയ്ക്കാത്ത സമയത്ത് ഇതേ ആൾക്കൂട്ടത്തിന്റെ വേട്ടമൃഗം കോലിയുടെ ഭാര്യ അനുഷ്ക ശർമ ആയിരുന്നുവെന്നതും യാദൃശ്ചികമല്ല.

‘ലിയോ’ സിനിമയില്‍ അഭിനയിക്കാൻ വിളിച്ചപ്പോൾ തൃഷയ്ക്കൊപ്പമുള്ള കിടപ്പറ രംഗങ്ങൾ പ്രതീക്ഷിച്ചിരുന്നെന്നു പറഞ്ഞ തമിഴ് നടൻ മൻസൂർ അലിഖാനാണ് ഏറ്റവുമൊടുവിൽ ഈ വിഷയത്തിൽ വാർത്തയിൽ നിറഞ്ഞത്. സമൂഹമാധ്യമങ്ങളിൽ മുഖമില്ലാതെയാണ് പലരും ഇത്തരം അഭിപ്രായങ്ങൾ വിളിച്ചു പറയുന്നതെങ്കിൽ മൻസൂർ അലിഖാൻ മുഖത്തു നോക്കി പറഞ്ഞു എന്ന വ്യത്യാസം മാത്രം. ഈ ‘കമന്റടി’ അത്ര നിസ്സാരമാണോ? സമൂഹമാധ്യമങ്ങൾ വഴി സ്ത്രീകളെ അധിക്ഷേപിക്കുകയും പിന്നീട് പിൻവലിക്കുകയും ചെയ്താൽ പ്രശ്നം തീരുമോ? ലൈംഗിക അധിക്ഷേപവും അനുവാദമില്ലാതെ ഫോട്ടോ എടുക്കലും ഒരേ നിയമത്തിന്റെ പരിധിയിലാണോ? ഇക്കാര്യത്തിൽ നിയമം പറയുന്നത് എന്താണ്? വിശദമായി പരിശോധിക്കാം... ഒപ്പം പരാതിപ്പെട്ടവരുടെ അനുഭവവും..

∙ എന്താണ് നിയമം പറയുന്നത്?

മൻസൂർ അലിഖാനെതിരെ പൊലീസ് കേസെടുത്തത് രണ്ട് വകുപ്പുകളുടെ അടിസ്ഥാനത്തിലാണ്. സെക്‌ഷൻ 354 എ, സെക്‌ഷൻ 590 (ബി) എന്നിവയാണ് ആ വകുപ്പുകൾ. ഒരുവർഷം മുതൽ 5 വർഷം വരെ തടവും പിഴയും ലഭിക്കാവുന്ന വകുപ്പുകളാണ് രണ്ടും. രാജ്യത്തെയാകെ പിടിച്ചുലച്ച നിർഭയ സംഭവത്തിനു ശേഷം ക്രിമിനൽ നിയമത്തെപ്പറ്റി പഠിക്കാൻ ചുമതലപ്പെടുത്തിയ ജെ.എസ്.വർമ കമ്മിറ്റിയുടെ ശുപാർശയുടെ അടിസ്ഥാനത്തിലാണ് 2013 ൽ ക്രിമിനൽ നിയമങ്ങൾ ഭേദഗതി ചെയ്യപ്പെടുന്നത്. അതിനുശേഷമാണ് 6 മാസത്തിൽ നിന്ന് 1 വർഷം എന്നതിലേക്ക് ശിക്ഷാ കാലാവധി ഉയർന്നത്. ഏതെല്ലാം സാഹചര്യത്തിലാണ് ഈ വകുപ്പുകൾ ചുമത്തപ്പെടുന്നതെന്നും ശിക്ഷ എങ്ങനെയാണ് വ്യത്യാസപ്പെട്ടിരിക്കുന്നതെന്നും നോക്കാം; സ്ത്രീകൾക്ക് എതിരെയുള്ള ലൈംഗികാതിക്രമങ്ങളും അവയ്ക്കുള്ള ശിക്ഷയുമാണ് 354–ാം വകുപ്പിൽ പറയുന്നത്.

1. സെക്‌ഷൻ 354 എ- സ്ത്രീകളെ ശല്യം ചെയ്യുക, ലൈംഗികച്ചുവയോടെ സംസാരിക്കുക, അവരുടെ ശരീരത്തെപ്പറ്റിയും ലൈംഗികതയെപ്പറ്റിയുമുള്ള പരാമർശങ്ങൾ നടത്തുക, അനുവാദമില്ലാതെ സ്പർശിക്കുക തുടങ്ങിയവയാണ് ഈ വകുപ്പിൽ വരുന്നത്. ഒരു തൊഴിലിടം ഉദാഹരണമായെടുക്കാം. ഒപ്പം ജോലി ചെയ്യുന്ന സ്ത്രീയുടെ ശരീരത്തെപ്പറ്റി മോശമായ തരത്തിൽ സംസാരിക്കുകയും ലൈംഗികച്ചുവയുള്ള സന്ദേശങ്ങൾ അയയ്ക്കുകയും ചെയ്തുവെന്നിരിക്കട്ടെ. അവർ പരാതിപ്പെട്ടാൽ കേസ് എടുക്കുക ഈ വകുപ്പിന് കീഴിലാവും. ഈ വകുപ്പിന് കീഴിൽ പരമാവധി 1 വർഷം മുതൽ മൂന്നു വർഷം വരെ തടവും പിഴയും ലഭിക്കാം.

2. സെക്‌ഷൻ 354 ബി - ഒരു സ്ത്രീയുടെ അനുവാദമില്ലാതെ ബലം പ്രയോഗിച്ച് അവരെ കീഴ്പ്പെടുത്താൻ ശ്രമിക്കുക, ബലമായി വസ്ത്രങ്ങൾ വലിച്ചൂരുക, ഊരാൻ ശ്രമിക്കുക, അതുവഴി അവരുടെ അഭിമാനം കളങ്കപ്പെടുത്തുക തുടങ്ങിയവയാണ് സെക്‌ഷൻ 354 ബിയുടെ പരിധിയിൽ വരുന്നത്. ഇത്തരമൊരു സാഹചര്യത്തിൽ പരാതി ഉന്നയിച്ച ആളും കുറ്റാരോപിതനും തീർത്തും അചരിചിതരായിരിക്കണം എന്നുപോലുമില്ല. ബലം പ്രയോഗിച്ച് സ്ത്രീയുടെ അഭിമാനം കളങ്കപ്പെടുത്താൻ ശ്രമിച്ചിട്ടുണ്ടോ എന്നതാണ് പ്രസക്തം. ജാമ്യമില്ലാത്ത വകുപ്പാണിത്. പരമാവധി 5 വർഷം വരെ തടവും പിഴയും ലഭിക്കാം.

3.  സെക്‌ഷൻ 354 സി - സ്വകാര്യതയിലേക്ക് ഒളിഞ്ഞുനോക്കുക, സ്വകാര്യദൃശ്യങ്ങൾ പകർത്തുകയോ പ്രചരിപ്പിക്കുകയോ ചെയ്യുക എന്നിവയാണ് ഈ വകുപ്പിന് കീഴിൽ വരുന്നത്. ശുചിമുറികളിലോ ഹോട്ടൽമുറിയിലോ ക്യാമറകൾ വയ്ക്കുക, സ്ത്രീകളുടെ ശരീരഭാഗങ്ങളുടെ ചിത്രങ്ങൾ പകർത്തുക എന്നിവയൊക്കെ കുറ്റകരമാവുന്നത് ഈ വകുപ്പിന് കീഴിലാണ്. സ്വകാര്യത എന്താണെന്നത് സംബന്ധിച്ചും നിയമം കൃത്യമായി വിശദീകരിക്കുന്നുണ്ട്. പൊതുവിടത്തിൽ ചെയ്യുമെന്ന് കരുതപ്പെടാത്തവയുടെ ചിത്രങ്ങൾ എടുക്കുന്നതാണ് കുറ്റകരമാവുന്നത്. ഒരു സ്ത്രീയുടെ സമ്മതത്തോടെ സ്വകാര്യ ചിത്രങ്ങൾ പകർത്തിയാലും അനുവാദമില്ലാതെ അത് മറ്റൊരാൾക്ക് പങ്ക് വയ്ക്കുന്നതും ഈ വകുപ്പ് പ്രകാരം കുറ്റകരമാണ്. ജാമ്യം കിട്ടാവുന്ന വകുപ്പാണിത്. മൂന്നു വർഷം വരെ തടവും പിഴയും ലഭിക്കാം.

4.  സെക്‌ഷൻ 354 ഡി - നിരന്തരം ഒരു സ്ത്രീയെ പിന്തുടരുക, പിന്നാലെ നടന്ന് ശല്യം ചെയ്യുക, അവരുടെ എല്ലാ കാര്യങ്ങളും സസൂക്ഷ്മം നിരീക്ഷിക്കുക, നിരന്തരം ബന്ധം സ്ഥാപിക്കാൻ ശ്രമിക്കുക, നിരസിച്ചാൽ ഭീഷണിപ്പെടുത്തുക തുടങ്ങിയവയാണ് ഈ വകുപ്പിൽ പെടുന്നത്. ‘താൽപര്യമില്ല’ എന്ന് കൃത്യമായി അറിയിച്ചതിനു ശേഷവും നടത്തുന്ന പിന്തുടരലുകൾക്ക് ഈ വകുപ്പിലാണ് കേസ് എടുക്കാറുള്ളത്. നേരിട്ടുള്ള ശല്യപ്പെടുത്തലിനും പുറമേ ഇലക്ട്രോണിക് മാധ്യമങ്ങൾ വഴിയുള്ള ഇടപെടലുകളും കേസിന്റെ പരിധിയിൽപ്പെടും. ‘ഉയരെ’ സിനിമയിൽ ആസിഫ് അലി അഭിനയിച്ച ഗോവിന്ദിനെ പോലെയുള്ള കഥാപാത്രങ്ങൾ ഉദാഹരണം. ജാമ്യം കിട്ടാവുന്ന വകുപ്പാണിത്. മൂന്നുവർഷം വരെ തടവും പിഴയും ലഭിക്കാം.

∙ ഇന്റർനെറ്റിലും വിലങ്ങ് വീഴാം

‘ഭർത്താവ് കയറൂരി വിട്ടിരിക്കുകയാണോ?’, ‘സിനിമയില്ലാത്തതു കൊണ്ടാണോ തുണിയുടെ അളവ് കുറഞ്ഞത്?’ ‘മത്തി കിട്ടാത്തതു കൊണ്ട് കടലിൽ പോയ ചൈനീസ് അമ്മായി’... കഴിഞ്ഞ ദിവസം നടി റിമ കല്ലിങ്കൽ മാലദ്വീപിൽനിന്നു പങ്കുവച്ച ചിത്രങ്ങൾക്ക് താഴെ വന്ന ചില കമന്റുകളാണിത്. ഇത് ആദ്യമായല്ല റിമ കല്ലിങ്കൽ ഇത്തരം വിമർശനങ്ങൾ കേൾക്കുന്നത്. കേട്ടാലറയ്ക്കുന്ന തരത്തിലെ പരാമർശങ്ങൾ സമൂഹമാധ്യമങ്ങളിൽ കേൾക്കേണ്ടി വരുന്ന ആദ്യത്തെയോ അവസാനത്തെയോ ആളുമല്ല റിമ കല്ലിങ്കൽ. ക്രിക്കറ്റ് ലോകകപ്പിൽ ഇന്ത്യ ഓസ്ട്രേലിയയോട് തോറ്റതിനു പിന്നാലെ ഓസ്ട്രേലിയൻ ക്രിക്കറ്റ് താരങ്ങളായ ട്രാവിസ് ഹെഡ്, ഗ്ലെൻ മാക്സ്‌വെൽ എന്നിവരുടെ ഭാര്യമാർക്കു നേരെ ഇന്ത്യൻ ആരാധകർ അഴിച്ചുവിട്ടത് ലൈംഗികച്ചുവയുള്ള അധിക്ഷേപങ്ങളായിരുന്നു. ട്രാവിസ് ഹെഡിന്റെ ഒരു വയസ്സുകാരി മകളെപ്പോലും ആ ആൾക്കൂട്ടം വെറുതേ വിട്ടില്ല.

സമൂഹമാധ്യമങ്ങളിൽ കൂടി അധിക്ഷേപിച്ചാൽ പിടി വീഴില്ലെന്നും കമന്റ് പിൻവലിച്ചാൽ കേസ് ഒഴിവാകുമെന്നും കരുതുന്നവരാണ് ഭൂരിഭാഗവും. പക്ഷേ, നിയമം പറയുന്നത് അങ്ങനെയല്ല. സെക്‌ഷൻ 590 (B) പ്രകാരം ഇന്റർനെറ്റ് ഉൾപ്പെടെയുള്ള ടെലി കമ്യൂണിക്കേഷൻ മാധ്യമങ്ങൾ വഴി സ്ത്രീകളുടെ അന്തസ്സിനെ ഹനിക്കുന്ന തരത്തിലെ ചിത്രങ്ങൾ പങ്കുവയ്ക്കുകയോ മോശം പരാമർശങ്ങൾ നടത്തുകയോ ചെയ്യുന്നത് കുറ്റകരമാണ്. സമൂഹമാധ്യമങ്ങൾ, ടിവി ചാനലുകൾ തുടങ്ങിയവയൊക്കെ ഈ പരിധിയിൽ വരും. 6 മാസം മുതൽ 2 വർഷം വരെ തടവ് ലഭിക്കാവുന്ന കുറ്റമാണിത്. ടെലിവിഷൻ ചർച്ചകളിലെ പരാമർശങ്ങളുടെ പേരിൽ കേസെടുക്കാനും ഈ വകുപ്പ് വഴി കഴിയും.

∙ ചാരിത്ര്യം നിർവചിച്ച് സുപ്രീം കോടതി

ഭരണഘടനയിലെ ഈ വകുപ്പുകളോടൊപ്പംതന്നെ ചർച്ചയായിട്ടുള്ളതാണ് എന്താണ് ‘ചാരിത്ര്യം’ എന്നതും ആർക്കാണ് ആരോപണം ഉന്നയിക്കാൻ കഴിയുക എന്നതും. സ്റ്റേറ്റ് ഓഫ് മഹാരാഷ്ട്ര വേഴ്സസ് മധുകർ നാരായൺ കേസിൽ, ആരോപണം ഉന്നയിക്കുന്ന സ്ത്രീയുടെ പശ്ചാത്തലമോ സ്വഭാവമോ അവരുടെ മൊഴിയെ മുൻവിധിയോടെ നോക്കിക്കാണുന്നതിന് ഇടയാക്കരുതെന്ന് സുപ്രീം കോടതി വ്യക്തമാക്കിയിട്ടുണ്ട്. ഈ കേസിൽ ഒരു പൊലീസ് ഉദ്യോഗസ്ഥനായിരുന്നു പ്രതി. സ്റ്റേഷനിൽനിന്ന് വളരെ അകലെയല്ലാത്ത വീട്ടിൽ അതിക്രമിച്ച് കടക്കാനും ഒരു സ്ത്രീയെ അവരുടെ സമ്മതമില്ലാതെ കടന്നുപിടിക്കാനും ശ്രമിച്ചതായിരുന്നു കേസ്. മറ്റ് ഉദ്യോഗസ്ഥർ പട്രോളിങ്ങിന് പോയ സമയത്തായിരുന്നു ഇത്. വകുപ്പുതല അന്വേഷണം ഉദ്യോഗസ്ഥന് എതിരായിരുന്നുവെങ്കിലും ഹൈക്കോടതിയിൽ എത്തിയപ്പോൾ കേസിന്റെ ഗതി മാറി.

വീട്ടിൽ അനധികൃതമായി മദ്യവിൽപന നടക്കുന്നുണ്ടെന്നറിഞ്ഞ് പരിശോധനയ്ക്ക് എത്തിയതാണെന്നും ഇതിന്റെ പേരിൽ ആ സ്ത്രീ കെട്ടിച്ചമച്ച കേസാണിത് എന്നുമായിരുന്നു ഉദ്യോഗസ്ഥന്റെ വാദം. പരാതിക്കാരിയായ സ്ത്രീയ്ക്ക് ഒരു വിവാഹേതര ബന്ധമുണ്ടെന്ന് പൊലീസ് കണ്ടെത്തുകയും അത് അവർ സമ്മതിക്കുകയും ചെയ്തിരുന്നു. ഈ സാഹചര്യത്തിൽ പരാതിക്കാരിയുടെ ‘ചാരിത്ര്യം’ എന്നത് അംഗീകരിക്കാവുന്നതല്ലെന്നും ഇത്തരമൊരാളുടെ മൊഴിയുടെ അടിസ്ഥാനത്തിൽ ഒരു പൊലീസ് ഉദ്യോഗസ്ഥനെ ശിക്ഷിക്കുന്നത് ശരിയല്ലെന്നുമായിരുന്നു ഹൈക്കോടതിയുടെ നിലപാട്.

പക്ഷേ, വിഷയത്തിൽ സുപ്രീം കോടതിയുടെ ഇടപെടൽ പിന്നീടുള്ള ഈ നിയമത്തിന്റെ വഴിയിൽ നിർണായകമായി മാറി. സ്ത്രീക്ക് വിവാഹേതര ബന്ധമുണ്ടോ എന്നതോ അവരുടെ സ്വഭാവമോ ഇത്തരമൊരു കേസിൽ അവരുടെ മൊഴിയുടെ ആധികാരികത നിർണയിക്കുന്ന ഘടകങ്ങൾ ആവേണ്ടതില്ലെന്ന് ഊന്നിപ്പറഞ്ഞ സുപ്രീംകോടതി കൃത്യമായ തെളിവുകളുടെ അടിസ്ഥാനത്തിൽ പ്രതിയായ പൊലീസ് ഉദ്യോഗസ്ഥനെ ജോലിയിൽ നിന്ന് പിരിച്ചുവിടുകയും ചെയ്തു.

∙ ചാരിത്ര്യത്തിന് പ്രായപരിധി വേണ്ട

18 വയസ്സിൽ താഴെയുള്ള കുട്ടികളോടാണ് ഇത്തരത്തിൽ ലൈംഗിക അധിക്ഷേപം നടത്തുന്നതെങ്കിലോ? കുട്ടികളുടെ നഗ്നചിത്രം എടുക്കുന്നതും പങ്കുവയ്ക്കന്നതും സമൂഹമാധ്യമത്തിൽ മോശം കമന്റുകളിടുന്നതും വരെ ഇക്കൂട്ടത്തിൽപ്പെടും. കുട്ടികളുടെ കാര്യത്തിൽ ചാരിത്ര്യം നഷ്ടപ്പെട്ടു എന്നൊക്കെ പറയാൻ കഴിയുമോ എന്നാണ് പലരുടെയും സംശയം. പക്ഷേ, 2012 ൽ പോക്സോ ആക്ട് (കുട്ടികൾക്ക് എതിരെയുള്ള ലൈംഗിക അതിക്രമങ്ങൾ തടയാനുള്ള നിയമം) നിലവിൽ വരുന്നതിന് കാലങ്ങൾക്ക് മുൻപുതന്നെ ഈ വിഷയത്തിൽ സുപ്രീം കോടതി നിലപാട് വ്യക്തമാക്കിയിട്ടുണ്ട്. സ്റ്റേറ്റ് ഓഫ് പഞ്ചാബ് വേഴ്സസ് മേജർ സിങ് കേസിലാണ് ചരിത്രപ്രധാനമായ ആ വിധിയുണ്ടായത്.