‘റേറ്റിങ്’ ഇടിഞ്ഞ് ഷിയുടെ തന്ത്രങ്ങൾ; കടംകൊടുത്ത് മുടിയുമോ ചൈന? ആ 8 നാവികതാവളങ്ങൾ കെണി

അയൽ രാജ്യങ്ങളിലെ തന്ത്രപ്രധാനമായ തുറമുഖങ്ങളിലേക്കും അടിസ്ഥാന സൗകര്യങ്ങളിലേക്കും പ്രവേശനം നേടുന്നതിന് ചൈന തങ്ങളുടെ ബിആർഐ പദ്ധതികൾ ഉപയോഗിച്ചതായി സെന്റർ ഫോർ സ്ട്രാറ്റജിക് ആൻഡ് ഇന്റർനാഷനൽ സ്റ്റഡീസിന്റെ റിപ്പോർട്ട് കണ്ടെത്തിയിരുന്നു. കൂടാതെ, സൈനിക ആവശ്യങ്ങൾക്കായി ഉപയോഗിക്കാവുന്ന നിരീക്ഷണ സംവിധാനങ്ങളുടെയും മറ്റ് സാങ്കേതിക വിദ്യകളുടെയും വികസനത്തിലും ചൈനീസ് കമ്പനികൾ ഏർപ്പെട്ടിട്ടുണ്ട്.

∙ ചൈനീസ് നാവിക താവളങ്ങൾ

അടുത്ത രണ്ടോ അഞ്ചോ വർഷത്തിനുള്ളിൽ ശ്രീലങ്കയിലെ ഹംബൻതോട്ട തുറമുഖത്ത് ചൈന ഒരു നാവിക താവളം സ്ഥാപിക്കുമെന്നാണ് പുതിയ നിരീക്ഷണ റിപ്പോർട്ടുകൾ അവകാശപ്പെടുന്നത്. ഇത് ഈ പ്രദേശത്ത് ഇന്ത്യയുടെ ആശങ്കകൾ വർധിപ്പിക്കുന്നതാണ്. അടുത്ത രണ്ടോ അഞ്ചോ വർഷത്തിനുള്ളിൽ ചൈനയ്ക്ക് നാവിക താവളങ്ങൾ സ്ഥാപിക്കാൻ കഴിയുന്ന എട്ട് സ്ഥലങ്ങളാണ് വിർജീനിയയിലെ വില്യം ആൻഡ് മേരിയിലെ യൂണിവേഴ്സിറ്റി റിസർച് ലാബായ എയ്ഡ്ഡേറ്റ കണ്ടെത്തിയിരിക്കുന്നത്. ഹംബൻതോട്ടയാണ് പട്ടികയിൽ ഒന്നാമത്. ഇക്വറ്റോറിയൽ ഗിനിയിലെ ബാറ്റ, പാക്കിസ്ഥാനിലെ ഗ്വാദർ; കാമറൂണിലെ ക്രിബി, കംബോഡിയയിലെ റീം, വാന്വാട്ടു, മൊസാംബിക്കിലെ നക്കാല, മൗറിട്ടാനിയയിലെ നൗക്‌ചോട്ട് എന്നിവയാണ് ലിസ്റ്റിലെ മറ്റു പ്രദേശങ്ങള്‍.

2001നും 2021നും ഇടയിൽ, ചൈന ലോകമെമ്പാടും 2990 കോടി ഡോളർ ചെലവിട്ട് 123 തുറമുഖ പദ്ധതികൾ നടപ്പിലാക്കിയെന്നും 46 രാജ്യങ്ങളിലായി 78 തുറമുഖങ്ങളുടെ നിർമാണത്തിനോ വിപുലീകരണത്തിനോ ധനസഹായം നൽകിയെന്നും റിപ്പോർട്ട് പറയുന്നു. ഈ നിക്ഷേപങ്ങളിൽ, ഒരു തുറമുഖ പദ്ധതിയിലെ ചൈനയുടെ ഏറ്റവും വലിയ നിക്ഷേപമാണ് ശ്രീലങ്കയിലെ ഹംബൻതോട്ട. അടുത്ത കാലത്തായി സൈനിക ആവശ്യങ്ങൾക്കായി ചൈന ഈ തുറമുഖം ഉപയോഗിക്കുന്നതിനെക്കുറിച്ച് നിരവധി ഊഹാപോഹങ്ങൾ ഉണ്ടായിരുന്നു. 2014ൽ കൊളംബോ തുറമുഖത്ത് ഒരു ചൈനീസ് അന്തർവാഹിനിയും യുദ്ധക്കപ്പലും നങ്കൂരമിടാൻ   ശ്രീലങ്ക അനുവദിച്ചപ്പോൾ ഇന്ത്യ ആശങ്ക അറിയിച്ചിരുന്നു. ശ്രീലങ്ക ചൈന മർച്ചന്റ്സ് പോർട്ട് ഹോൾഡിങ്സ് കമ്പനിക്ക് പാട്ടത്തിന് നൽകിയതിനു ശേഷം ഹംബൻതോട്ട തുറമുഖത്തെക്കുറിച്ചുള്ള ഇന്ത്യയുടെ ആശങ്കകൾ വർധിച്ചിട്ടുണ്ടെന്ന്  പറയാം.

∙ ലോകത്തിലെ ഏറ്റവും വലിയ ‘കടക്കാരൻ’ ലക്ഷ്യമിടുന്നതെന്ത്?

ലോകത്തിലെ ഏറ്റവും വലിയ ഔദ്യോഗിക കടക്കാരൻ എന്ന നിലയിൽ അപരിചിതവും അത്ര നല്ല സുഖകരവുമല്ലാത്ത റോളിലാണ് ചൈന സഞ്ചരിക്കുന്നതെന്ന് മുന്നറിയിപ്പുണ്ട്. ബെൽറ്റ്  ആൻഡ് റോഡിന്റെ ഭാഗമായി റോഡ്, റെയിൽ, തുറമുഖങ്ങൾ, പൈപ്പ് ലൈനുകൾ എന്നീ മേഖലകളിലാണ് ചൈനയുടെ പ്രവർത്തനമെങ്കിലും ലോകത്താകമാനം സൈനിക കേന്ദ്രങ്ങളും ചാര നെറ്റ്‌വര്‍ക്കുകളും സ്ഥാപിച്ച് യുഎസിനെ നേരിടുക എന്നൊരു ലക്ഷ്യവും ഈ നീക്കങ്ങൾക്കു പിന്നിലുണ്ട്. ലോകത്തെ ഭൂരിഭാഗം രാജ്യങ്ങളിലും യുഎസ് സൈനിക താവളങ്ങൾ സ്ഥാപിച്ച് ശത്രുക്കളെ നിലയ്ക്കു നിർത്താൻ ശ്രമിച്ചപ്പോൾ അതിനൊരു പ്രതിരോധമെന്ന നിലയ്ക്കാണ് ആഫ്രിക്കൻ രാജ്യങ്ങളെയും ഏഷ്യയിലെ ഏറ്റവും വലിയ എതിരാളിയായ ഇന്ത്യയുടെ ചുറ്റുമുള്ള രാജ്യങ്ങളെയും കൂടെനിർത്താൻ ചൈന കടക്കെണി ഒരുക്കിയത്. ലാറ്റിനമേരിക്കൻ രാജ്യങ്ങളിൽ വരെ ചൈനയുടെ പുതിയ ആസൂത്രണം നടപ്പിലാക്കി കഴിഞ്ഞു. എന്നാൽ മലേഷ്യയും മ്യാൻമറും ഇറ്റലി ഉൾപ്പടെയുള്ള ചില യൂറോപ്യൻ രാജ്യങ്ങളും ഭാവിയിലെ ദുരന്തം മുൻകൂട്ടി കണ്ട് ചൈനീസ് പദ്ധതികളിൽ നിന്ന് വിട്ടുനിൽക്കാൻ തീരുമാനിക്കുകയായിരുന്നു.

∙ ‘റേറ്റിങ്’ താഴോട്ട്

ബെൽറ്റ് ആൻഡ് റോഡ് പദ്ധതി വൻ സംഭവമായി അവതരിപ്പിച്ച സമയത്തെ പ്രശസ്തി ഇപ്പോൾ ചൈനയ്ക്ക് നഷ്ടമായിരിക്കുന്നു എന്നാണ് പുതിയ കണക്കുകൾ പറയുന്നത്. ഡോളറുമായുള്ള മൽസരത്തിൽ ചൈന ഏറെ പിന്നോട്ട് പോയെന്നും ചൈനീസ് വിപണിയും മുൻനിര കമ്പനികളും വൻ സാമ്പത്തിക പ്രതിസന്ധിയാണ് നേരിടുന്നതെന്നും തുടർച്ചയായി റിപ്പോർട്ടുകള്‍ വന്നതോടെ ചൈനയിലുള്ള വിശ്വാസം നഷ്ടപ്പെട്ടു തുടങ്ങിയെന്നും ഡേറ്റ വ്യക്തമാക്കുന്നു. സമീപ വർഷങ്ങളിൽ വികസ്വര രാജ്യങ്ങൾക്കിടയിൽ ചൈനയ്ക്കുണ്ടായിരുന്ന പ്രശസ്തി റേറ്റിങ് 2019 ലെ 56 ശതമാനത്തിൽ നിന്ന് 2021 ൽ 40 ശതമാനമായി കുറഞ്ഞതായും എയ്ഡ്ഡേറ്റ പറയുന്നു. എന്നാൽ, ചൈന ഇപ്പോൾ അവരുടെ തെറ്റുകളിൽനിന്ന് പാഠം പഠിക്കുകയും കടംകൊടുക്കൽ മേഖലയിൽ കൂടുതല്‍ ശ്രദ്ധിക്കുകയും ചെയ്യുന്നുണ്ടെന്നാണ് പുതിയ പഠനം പറയുന്നുണ്ട്.

ബിആർഐയുടെ 2023ലെ ഉച്ചകോടി വൻ പരാജയമായിരുന്നു എന്നതും ചൈനയുടെ ആഗോള റേറ്റിങ് താഴോട്ടാണെന്നതിന്റെ വ്യക്തമായ സൂചനയാണ്. മുൻകാലങ്ങളെ അപേക്ഷിച്ച് കുറച്ച് രാജ്യങ്ങൾ മാത്രമാണ് ഈ വര്‍ഷത്തെ ചർച്ചകളിൽ പങ്കെടുത്തത്. 2022 ലെ ഉച്ചകോടിയിൽ 40 രാഷ്ട്രത്തലവന്മാർ പങ്കെടുത്തിരുന്നെങ്കിൽ 2023ൽ അതിന്റെ പകുതി പേർ മാത്രമാണ് എത്തിയത്. പല രാജ്യങ്ങളും മുൻകാലങ്ങളെ അപേക്ഷിച്ച് താഴ്ന്ന റാങ്കിലുള്ള പ്രതിനിധികളെയാണ് അയച്ചത്. യൂറോപ്പിൽനിന്നും വടക്കേ അമേരിക്കയിൽനിന്നുമുള്ള മുൻനിര പ്രതിനിധികളെയും കണ്ടില്ല. ചൈനീസ് പ്രസിഡന്റ് ഷി ചിൻപിങ്ങിനെ കൂടാതെ ഉച്ചകോടിയിലെ ഏറ്റവും പ്രമുഖ വ്യക്തി റഷ്യൻ പ്രസിഡന്റ് വ്ലാഡിമിർ പുട്ടിൻ ആയിരുന്നു.