‘അമ്മ’ ഞെട്ടും മുൻപേ ലോകത്തെ ഞെട്ടിച്ചവർ: അന്ന് നിർമാതാവിനെതിരെ 80 വനിതകൾ, ലൈംഗിക പീഡനത്തിന് കൊടുംതടവ്

∙ ലൈംഗിക പീഡനം, ഞെട്ടിക്കും കണക്കുകൾ

ലൈംഗികാതിക്രമങ്ങളുടെയും ആക്രമണങ്ങളുടെയും ഭയാനകമായ വ്യാപനത്തെ സമൂഹത്തിനു മുന്നിൽ ഉയർത്തിക്കാട്ടുന്നതായിരുന്നു മി ടൂ പ്രസ്ഥാനം. പ്യൂ റിസർച്ച് സെന്റർ 2018ൽ നടത്തിയ സർവേ പ്രകാരം യുഎസിലെ 59 ശതമാനം സ്ത്രീകളും ഏതെങ്കിലും തരത്തിലുള്ള ലൈംഗിക പീഡനം അനുഭവിക്കുന്നതായി റിപ്പോർട്ട് ചെയ്തിട്ടുണ്ട്. കൂടാതെ, ലോകമെമ്പാടുമുള്ള മൂന്ന് സ്ത്രീകളിൽ ഒരാൾ ശാരീരികമോ ലൈംഗികമോ ആയ അതിക്രമങ്ങൾ അനുഭവിച്ചിട്ടുണ്ടെന്ന് യുഎൻ വിമൻസ് ഗ്ലോബൽ ഡേറ്റാബേസിന്റെ 2019ലെ റിപ്പോർട്ട് വെളിപ്പെടുത്തുന്നു. അടുപ്പമുള്ളവരിൽ നിന്നാണ് ഇത് കൂടുതലായും നേരിടുന്നത് എന്ന റിപ്പോർട്ടും ലോകത്തെ ഞെട്ടിച്ചു. മി ടൂവിന് സമാന്തരമായി ഇത്തരം കണക്കുകളും പുറത്തുവന്നുകൊണ്ടേയിരുന്നു.

∙ ഡിജിറ്റൽ വിജയം

മി ടൂ പ്രസ്ഥാനത്തിന്റെ വ്യാപനത്തിൽ ഡിജിറ്റൽ മാധ്യമങ്ങളും സോഷ്യൽ നെറ്റ്‌വർക്കുകളും നിർണായക പങ്കാണ് വഹിച്ചത്. അതിജീവിച്ചവർക്ക് അവരുടെ ജീവിത യാഥാർഥ്യങ്ങൾ പങ്കിടാനും മറ്റുള്ളവരുമായി ബന്ധം സ്ഥാപിക്കാനും ഇന്റർനെറ്റിലൂടെ ഒരു പ്ലാറ്റ്ഫോം ലഭ്യമാകുകയായിരുന്നു. ഇതോടൊപ്പംതന്നെ സമൂഹത്തിന്റെ ഐക്യദാർഢ്യം എത്രത്തോളമുണ്ടെന്ന് മനസ്സിലാക്കാനും സോഷ്യൽ മീഡിയ സഹായിച്ചു. നേരിട്ടുള്ള ഏറ്റുമുട്ടലിനെ ഭയക്കാതെ എല്ലാം തുറന്നു സംസാരിക്കാനും #MeToo എന്ന ഹാഷ്‌ടാഗ് അതിജീവിതമാരെ പ്രാപ്തരാക്കി. സോഷ്യൽ മീഡിയയുടെ വൈറൽ സ്വഭാവം പ്രശ്‌നത്തിന്റെ വ്യാപ്തിയും ശ്രദ്ധയും പൊതുഇടത്തിലേക്ക് കൊണ്ടുവരാൻ അത്രയേറെയാണ് സഹായിച്ചത്

∙ ഇന്ത്യയിൽ സംഭവിച്ചത്...

2008ൽ നടൻ നാനാ പടേക്കർക്കെതിരെ നടി തനുശ്രീ ദത്ത ലൈംഗികാരോപണം ഉന്നയിച്ചതോടെയാണ് ഇന്ത്യയിൽ മി ടൂ പ്രസ്ഥാനം സജീവമാകാൻ തുടങ്ങിയത്. ഇതിനു പിന്നാലെ ഒട്ടേറെ പേർ തങ്ങൾക്കു നേരിട്ട മോശം അനുഭവങ്ങൾ പറഞ്ഞ് രംഗത്തെത്തി. വിനോദ വ്യവസായം, മാധ്യമങ്ങൾ, മറ്റ് മേഖലകൾ എന്നിവിടങ്ങളിൽ നിന്നെല്ലാം വെളിപ്പെടുത്തലുകൾ വന്നു. ബോളിവുഡ് ചലച്ചിത്ര നിർമാതാവ് സാജിദ് ഖാൻ, നടൻ അലോക് നാഥ്, മാധ്യമപ്രവർത്തകൻ എം.ജെ. അക്ബർ തുടങ്ങിയ പ്രമുഖ വ്യക്തികൾക്കെതിരെ ലൈംഗികാരോപണം ഉയർന്നു. ഇത് അവരുടെ താൽക്കാലിക രാജിയിലേക്കും ചില നിയമനടപടികളിലേക്കും നയിച്ചു. അനുചിതമായ പെരുമാറ്റത്തിന് നിരവധി പ്രഫസർമാർക്കെതിരെ വിദ്യാർഥികൾ രംഗത്തിറങ്ങി.

2022ൽ തൊഴിലിടത്തിൽ ഏറ്റവും കൂടുതൽ ലൈംഗികാതിക്രമ കേസുകൾ റിപ്പോർട്ട് ചെയ്തത് ഹിമാചൽ പ്രദേശിലാണ്– 97 കേസുകൾ. കേരളത്തിൽ ഇത് 83 കേസുകളാണ്. മഹാരാഷ്ട്രയിൽ 46, കർണാടകയിൽ 43 എന്നിങ്ങനെയാണ് മറ്റു കണക്കുകൾ. ഇന്ത്യയിൽ റിപ്പോർട്ട് ചെയ്യപ്പെട്ട ബലാത്സംഗ കേസുകൾ രാജ്യത്തെ സ്ത്രീകൾക്കെതിരെ നടന്ന ആകെ കുറ്റകൃത്യങ്ങളിൽ ഏകദേശം 12 ശതമാനം വരും. അതേസമയം, രാജ്യത്തെ ലൈംഗികാതിക്രമ കേസുകളിൽ 99 ശതമാനവും റിപ്പോർട്ട് ചെയ്യപ്പെടാതെ പോകുന്നു എന്ന വസ്തുതയും നമുക്കു മുന്നിലുണ്ട്.

∙ വിമർശനങ്ങളും വെല്ലുവിളികളും

ഏറെ പ്രശംസകൾ ഏറ്റുവാങ്ങുമ്പോൾ തന്നെ വിമർശനങ്ങളും വെല്ലുവിളികളും നേരിടേണ്ടി വന്നിട്ടുണ്ട് മി ടൂ പ്രസ്ഥാനത്തിന്. മതിയായ തെളിവുകളോ ന്യായമായ വാദങ്ങളോ ഇല്ലാതെ സൽപ്പേര് നശിപ്പിക്കുന്നതിനും ഉപജീവനമാർഗം നഷ്ടപ്പെടുന്നതിനും സാധ്യതയുണ്ടെന്ന ആശങ്കയും നിലനിൽക്കുന്നു. സമൂഹത്തിനു മുന്നിൽ പ്രമുഖരായ ചിലരെ കരിവാരിത്തേക്കാൻ മി ടൂ പ്രസ്ഥാനം ചിലരെങ്കിലും ഉപയോഗിച്ചെന്നും ആരോപണങ്ങളുണ്ട്. എന്നാൽ അതെല്ലാം വളരെ തുച്ഛമായ ശതമാനക്കണക്കിൽ മാത്രമായിരുന്നു.

മി ടൂ പ്രസ്ഥാനത്തിന്റെ ആഗോള വ്യാപനം ലോകമെമ്പാടും സമാനമായ സംരംഭങ്ങൾക്ക് പ്രചോദനമാവുന്നതായിരുന്നു. പൊതു ഇടങ്ങളിലെ ലൈംഗികാതിക്രമത്തെ ചെറുക്കാൻ ലക്ഷ്യമിട്ടുള്ള ഒരു നിയമം 2018ൽ ഫ്രാൻസ് പാസാക്കി. വിവിധ മേഖലകളിലെ പീഡനങ്ങൾക്കെതിരെ സംസാരിക്കുന്ന സ്ത്രീകളുടെ വർധന ഇന്ത്യയിൽ ഉള്‍പ്പെടെ ഇന്നു പ്രകടമാണ്. കേരളത്തിലെ ഹേമ കമ്മിറ്റിക്കു മുന്നിൽ മനസ്സു തുറന്നവർക്കു മുന്നിലും മി ടൂ പകര്‍ന്നുതന്ന കരുത്തുണ്ടാകുമെന്നത് ഉറപ്പ്.

ഇപ്പോഴും സജീവമാണ് മി ടൂ പ്രസ്ഥാനം. ലോകമെങ്ങും വിവിധ സമൂഹങ്ങളിലും സംസ്‌കാരങ്ങളിലും നയരൂപീകരണങ്ങളിലും വരെ അതിന്റെ സ്വാധീനം നിലനിൽക്കുന്നുണ്ട്. ‘ഹാഷ്ടാഗ് മി ടൂ’ ഒപ്പം ചേർത്തില്ലെങ്കിലും, തനിക്കു നേരെയുള്ള അതിക്രമങ്ങൾക്കെതിരെ ഒരു പെൺകുട്ടി ശബ്ദമുയർത്തുമ്പോള്‍ അദൃശ്യ ശക്തിയായി #MeToo ഒപ്പമുണ്ടാകും. മലയാള ചലച്ചിത്ര ലോകത്ത് സംഭവിച്ചുകൊണ്ടിരിക്കുന്നതും അതുതന്നെയാണ്. ഏവർക്കും തുല്യതയും നീതിയും ഉറപ്പാക്കാനുള്ള ശ്രമങ്ങൾ സർക്കാർതലത്തിൽ ഉൾപ്പെടെ നടക്കുമ്പോൾ അതിന് കരുത്തുപകർന്ന് ഇനിയും മി ടൂ ഒപ്പമുണ്ടാകുമെന്ന് ചുരുക്കം.