രാമ ക്ഷേത്രം നിർമിച്ചതിൽ അഭിമാനം; എഴുത്തുകാരൻ തൂലികയുടെ മൂർച്ച കളയരുത്! ഡോ. ജോർജ് ഓണക്കൂറിന്റെ മുന്നറിയിപ്പ്

? ‘മാറ്റുവിൻ ചട്ടങ്ങളെ സ്വയമല്ലെങ്കിൽ മാറ്റുമതുകളീ നിങ്ങളെത്താൻ’ എന്നെഴുതിയ കുമാരനാശാന്റെ ദേഹവിയോഗത്തിന് കഴിഞ്ഞ ദിവസം നൂറ് വർഷം തികഞ്ഞുവല്ലോ. അദ്ദേഹം എഴുതിയ ഈ വരി ഇന്നും പ്രസക്തമല്ലേ. ചട്ടങ്ങൾ മാറ്റിയെഴുതേണ്ട സമയമായെന്ന് കരുതുന്നുണ്ടോ. മാത്രമല്ല എഴുത്തുകാരൻ ആ കടമ നിറവേറ്റുന്നുണ്ടോ.

∙ സമൂഹത്തിൽ വർഗീയത കൊടിക്കുത്തിവാണ  കാലത്താണ് കുമാരനാശാൻ ഇങ്ങനെയെഴുതിയത്. പണാസക്തി, ജാതിയുടെ ആധിപത്യം, മാനവികത പൊലിയുന്ന ഒരു കാലം ഇങ്ങനയൊക്കെയായിരുന്നു കുമാരനാശാൻ ഈ വരികളെഴുതുന്ന കാലത്തെ കേരളം. പെൺകുട്ടിയുടെ മുന്നിൽ ദാഹിച്ച് ബുദ്ധഭിക്ഷു വന്ന് യാചിക്കുമ്പോൾ ജലം കൊടുക്കാൻ പോലും അവൾ മടിക്കുകയാണ്. തനിക്ക് പാപമുണ്ടാകുമെന്നാണ് അവൾ പറയുന്നത്. ആശാന്റെ കാലഘട്ടം അതാണെന്ന് നമ്മൾ ഓർക്കണം. ഇങ്ങനെയൊരു കാലത്ത് മാനവികത ഉയർത്തിപ്പിടിക്കേണ്ടത് കവിയുടെ ഉത്തരവാദിത്തമാണ്. ഏതുകാലത്തും തമസ്കരിക്കപ്പെടുന്ന ജീവിതങ്ങൾക്കൊപ്പം നിൽക്കുക എന്നതാണ് എഴുത്തുകാരന്റെ കടമ.

കടമ നിറവേറ്റുന്നുവെന്ന് പറയാനുളള ധൈര്യം എനിക്കില്ല. കാരണം ഇപ്പോഴത്തെ എഴുത്ത് ആത്മാവിഷ്കാരമോ ജീവിതാവിഷ്കാരമോ ആണ്. സമൂഹത്തിന്റെ ആവിഷ്കാരം നടക്കുന്നില്ല. സാമൂഹിക ജീവിതത്തിന്റെ പകർത്തിയെഴുത്തല്ല സാഹിത്യം. എന്നാൽ, അനീതികളോട് പ്രതികരിക്കണം. സമൂഹത്തിലെ പലതരം പ്രവണതകളോടും ഏറ്റവും ആദ്യം പ്രതികരിക്കാൻ ബാധ്യതപ്പെട്ടത് എഴുത്തുകാരാണ്. പ്രസംഗിച്ചോ പത്രപ്രസ്താവന ഇറക്കിയോ പ്രതികരണം നടത്തണമെന്ന് ഞാൻ പറയുന്നില്ല. എഴുത്തിലൂടെ പ്രതികരിക്കണം. കഥാകാരനാണെങ്കിൽ കഥയിലൂടെയും ചിത്രകാരനാണെങ്കിൽ ചിത്രത്തിലൂടെയും പ്രതിഷേധിക്കണം. തൂലിക പടവാളാക്കിയില്ലെങ്കിലും മൂർച്ചയുള്ള ഒരു എഴുത്തിനെങ്കിലും തൂലികയെ ആയുധമാക്കണം. അതിനുപറ്റുന്ന കാലാവസ്ഥകൾ ഉണ്ടാകുന്നുണ്ട്. സ്വാർഥപ്രേരിതമായ കാലഘട്ടത്തിലാണ് നാം ജീവിക്കുന്നത്. സ്വാർഥത വലിയതോതിൽ നമ്മളെയൊക്കെ ഭരിക്കുന്നുവെന്ന ഭയം എനിക്കുണ്ട്. ധനം മോഹിച്ചും പണം മോഹിച്ചും സ്ഥാനമാനങ്ങൾ മോഹിച്ചുമൊക്കെയുളള സ്വാർഥതയുടെ ചുഴിയിൽ എല്ലാവരും വീണുകിടക്കുകയാണ്.

? ഇടതു പക്ഷത്തോട് ചേർന്നു നിൽക്കുന്ന ഭൂരിപക്ഷ എഴുത്തുകാരുടെ പാതയിൽ നിന്നെല്ലാം വ്യതിചലിച്ചായിരുന്നല്ലോ താങ്കളുടെ നടത്തം. ശരിക്കുമൊരു കോൺഗ്രുകാരൻ ആയിരുന്നില്ലേ

∙ ശരിക്കും കോൺഗ്രുകാരൻ എന്നുപറഞ്ഞത് അടിവരയിടണം. ഗാന്ധിജിയും നെഹ്റുവും പട്ടേലുമൊക്കെ ഉൾപ്പെട്ട ഒരു ദേശീയ നിരയുണ്ടല്ലോ. ജനാധിപത്യം, സോഷ്യലിസം എന്നീ സംസ്കാരങ്ങൾ അതിനുണ്ട്. അതിൽ അടിയുറച്ച് നിന്ന ആളാണ് ഞാൻ. സംശയമൊന്നും വേണ്ട. എന്നാൽ, വർത്തമാന കാലത്ത് കോൺഗ്രസിന്റെ മൂല്യങ്ങളൊക്കെ എവിടയോ നഷ്ടപ്പെട്ട് പോവുകയാണ്. നമ്മൾ വിചാരിക്കുന്നത് പോലെ സമൂഹത്തിൽ മാറ്റം നടക്കുന്നില്ല. കോൺഗ്രസിൽ ഓരോരുത്തർക്കും അവരവർ പ്രധാനികളെന്ന തോന്നലാണ്. ജനങ്ങളാണ് പ്രധാനികളെന്ന് ഇവർ ഓർക്കുന്നില്ല. പാർട്ടി പോലും പ്രധാനമല്ലാതെ പോകുന്നു. വ്യക്തിപരമായ ആവശ്യങ്ങളും അതിനുവേണ്ടിയുള്ള ഉത്സാഹങ്ങളും മുറുകുമ്പോൾ പാവപ്പെട്ടവർക്കും എഴുത്തുകാർക്കുമൊക്കെ അതിനോട് ചേർന്നുനിൽക്കാൻ ബുദ്ധിമുട്ട് വരും. ഒരു വ്യവസ്ഥാപിത സ്ഥാപനത്തോടും എനിക്ക് ഇപ്പോൾ ബന്ധമില്ല. അതിനകത്ത് നമുക്ക് ഒരുപാട് പരിമിതികളുണ്ട്. കോൺഗ്രസ് സർക്കാരുകളുടെ കാലത്ത് പല സ്ഥാപനങ്ങളുടെയും ചുമതലക്കാരനായിരുന്നു ഞാൻ. എന്നാൽ ഇന്നുവരെ ഒരു അപേക്ഷയും കൊടുത്തല്ല ഞാൻ എവിടെയും കയറിയത്.

? കോൺഗ്രസിൽ പ്രതീക്ഷവയ്ക്കേണ്ട കാര്യമില്ല എന്നാണോ

∙ അങ്ങനെയൊരു രാഷ്ട്രീയ പ്രവചനത്തിനൊന്നും ഞാനില്ല. കോൺഗ്രസിലാണോ വേറെ എവിടെയെങ്കിലുമാണോ പ്രതീക്ഷ വയ്ക്കേണ്ടതെന്ന് കാലം തെളിയിക്കട്ടെ. പാർട്ടിക്കുള്ളില്‍  നിൽക്കുന്ന ആളുകൾ നന്നാകണം. വ്യക്തികളല്ല ആശയങ്ങളാണ് വേണ്ടതെന്ന് മനസ്സിലാക്കണം. സ്വാർഥത പാടില്ലെന്ന് അതത് പാർട്ടിക്കുളളിൽ നിൽക്കുന്നവർ ശ്രദ്ധിക്കണം. കോൺഗ്രസല്ല ഏത് പാർട്ടിയാണെങ്കിലും ആശയത്തിന് മുൻകൈ കൊടുക്കണം. അങ്ങനെ മാത്രമേ പുരോഗതിയുണ്ടാവകയുള്ളൂ. അല്ലെങ്കിൽ പാർട്ടി അപ്രസക്തമാകും.

? കുമാരനാശനെപ്പറ്റി പറഞ്ഞാണല്ലോ തുടങ്ങിയത്. താങ്കൾ പറഞ്ഞതുപോലെ വർഗീയതയും ഫാഷിസവുമൊക്കെ കൊടിക്കുത്തി വാഴുന്ന ഒരു കാലത്താണല്ലോ നമ്മൾ ഇന്ന് ജീവിക്കുന്നത്. ഒരു പാർലമെന്റ് തിരഞ്ഞെടുപ്പിന്റെ പടിവാതിൽക്കൽ എത്തിനിൽക്കുമ്പോൾ എന്താണ് പറയാനുള്ളത്

∙ വർഗീയതയും ഫാഷിസവുമൊക്കെ കൊടിക്കുത്തി വാഴുന്ന കാലമാണ് ഇതെന്ന അഭിപ്രായമൊന്നും എനിക്കില്ല. എല്ലാകാലത്തും ഇതൊക്കെയുണ്ട്. ജനങ്ങൾ അഭിമുഖീകരിക്കുന്ന പ്രശ്നങ്ങൾക്ക് മുൻഗണന നൽകണം. പാർലമെന്റ് തിരഞ്ഞെടുപ്പ് പടിവാതിൽക്കൽ എത്തിനിൽക്കുമ്പോൾ ശരിക്കും ഒരുപാട് പുരോഗതിയുണ്ടായ സമയത്താണ് നമ്മൾ നിൽക്കുന്നത്. അത് കാണാതെ പോകരുത്. ശാസ്ത്ര രംഗത്ത് അടക്കം ഒരുപാട് നേട്ടമുണ്ടാക്കാൻ കഴിഞ്ഞു. അസൂയപ്പെടുത്തുന്ന പുരോഗതിയാണ് ശാസ്ത്ര രംഗത്തുണ്ടായത്. അത് വലിയ നേട്ടമാണ്. ചെറുപ്പക്കാർ കേരളം വിട്ടുപോവുകയാണ്. അക്കാര്യത്തിൽ എനിക്ക് വിഷമമുണ്ട്. ലോകത്തിന്റെ പല കോണുകളിൽ നമ്മൾ പോകുമ്പോൾ അവിടെയൊക്കെ വിവിധ രംഗങ്ങളിൽ പ്രശോഭിക്കുന്നതും മലയാളികളാണ്.

ഇതിനെ മുഴുവൻ അഭിനന്ദിക്കുമ്പോഴും അതിന്റെ പ്രയോജനം നമ്മുടെ നാടിന് ലഭിക്കാതെ പോകുന്നതിൽ വിഷമമുണ്ട്. പാവപ്പെട്ടവരുടെ നികുതിപ്പണം ഖജനാവിൽ നിന്നെടുത്താണ് ഒരു ഡോക്ടറെയോ എൻജിനീയറയോ വാർത്തെടുക്കുന്നത്. നമ്മുടെ ആളുകൾ പുറത്തേക്ക് പോകട്ടെ, വേറെ ചില ആളുകൾ ഇങ്ങോട്ടേക്ക് വരുന്നുണ്ടല്ലോയെന്ന് ചില ബുദ്ധിജീവികൾ പറയുന്നത് ഞാൻ കേട്ടു. കേരളം എജ്യൂക്കേഷനൽ ഹബ്ബാണ്, മെഡിക്കൽ ഹബ്ബാണ് എന്നൊക്കെ ആവർത്തിച്ചും ഉച്ചത്തിലും പറയുന്ന ആളുകളുണ്ട്. പക്ഷേ കേരളത്തിൽ വരുന്നതായി ഞാൻ കാണുന്നത് ബംഗാളിലെയും ബീഹാറിലെയും അതിഥിത്തൊഴിലാളികളെയാണ്.  നമ്മുടെ ചെറുപ്പക്കാർക്ക് തുല്യരായ ആരും കേരളത്തിലേക്ക് വരുന്നില്ല. കണ്ണ് തുറന്നുനോക്കിയിട്ടും ഇവിടെ ആരെയും ഞാൻ കാണുന്നില്ല. ഇന്ത്യയിലും ലോകത്തിലുമുണ്ടാകുന്ന മാറ്റങ്ങളുടെ പ്രയോജനം കേരളത്തിനും ലഭിക്കണം.