പീഡിപ്പിച്ച ശേഷം അവളെ കത്തിച്ചു; ഓരോ അരമണിക്കൂറിലും ‘കൊല’; അരുണയ്ക്കു ശേഷവും ഒന്നും മാറിയില്ല

‘ഒരു രാജ്യത്തിന്റെ അവസ്ഥ മനസ്സിലാക്കാന്‍ അവിടുത്തെ സ്ത്രീകളുടെ സ്ഥിതി പരിശോധിച്ചാല്‍ മതി’ എന്നു ജവാഹർലാൽ നെഹ്റു പറഞ്ഞുവച്ച വാക്കുകൾ തലകുനിച്ചു തന്നെ രാജ്യം അംഗീകരിക്കേണ്ടി വരും. അത്രത്തോളം പരിതാപകരമായിരിക്കുന്നു രാജ്യത്തെ സ്ത്രീസുരക്ഷ. ഒരുപക്ഷേ ഇന്ത്യയിൽ ജീവിക്കുന്ന സ്ത്രീകളിൽ ഭൂരിഭാഗത്തിന്റെയും സ്വപ്നങ്ങളിലൊന്നായിരിക്കും, ഭയമില്ലാതെ, ഏതു സമയത്തു വേണമെങ്കിലും പൊതുനിരത്തുകളിൽ ഇറങ്ങി സുരക്ഷിതബോധത്തോടെ നടക്കുകയെന്നത്. പൊതുനിരത്തിൽ മാത്രമല്ല, വീടുകളുടെയോ തൊഴിലിടത്തിന്റെയോ അകത്തളങ്ങളിൽ പോലും സ്ത്രീകൾ സുരക്ഷിതയല്ല എന്നതാണ് ഇപ്പോഴത്തെ ഞെട്ടിക്കുന്ന യാഥാർഥ്യം. ‘സന്തോഷങ്ങളുടെ നഗരം’ എന്ന് ഇതുവരെ വിളിക്കപ്പെട്ടിരുന്ന കൊൽക്കത്തയിലും അത് സംഭവിച്ചുകഴിഞ്ഞു. പ്രതിരോധത്തിൽ പരാജയപ്പെട്ട് പീഡനത്തിനിരയായി അതിക്രൂരമായി കൊല ചെയ്യപ്പെട്ട പിജി ഡോക്ടറുടെ ചോര പുരണ്ട നഗരമെന്ന മായാത്ത കറ ആ നഗരത്തെ ഇപ്പോൾ കളങ്കമുള്ളതാക്കിയിരിക്കുന്നു.

സഹപ്രവർത്തകർക്കൊപ്പം ഭക്ഷണം കഴിച്ച് കോളജിലെ സെമിനാർ ഹാളിലേക്കു വിശ്രമിക്കാനായി പോയ യുവ ഡോക്ടറെ ജീവന്റെ തുടിപ്പോടെ പിന്നീടാരും കണ്ടിട്ടില്ല, അവളുടെ നിലവിളികൾ ആരും കേട്ടിട്ടില്ല. ലൈംഗിക വൈകൃതത്തിനിരയായി, സമാനതകളില്ലാത്ത പീഡനങ്ങൾ നേരിട്ട്, ചേതനയറ്റ്, അർധനഗ്നയായാണ് തൊട്ടടുത്ത ദിവസം ആ പെണ്ണുടൽ കണ്ടെത്തിയത്. ഇന്ത്യയിൽ പീഡനത്തിനിരയായി കൊല്ലപ്പെടുന്ന ആദ്യ സ്ത്രീയല്ല കൊൽക്കത്തയിലെ യുവഡോക്ടർ. അവസാനത്തേതും ആയിരിക്കില്ല എന്ന നിത്യമായ സത്യം ഓരോ സ്ത്രീയുടെയും തുടർന്നുള്ള ജീവിതത്തെ ഭീതിയുടെ നിഴലിലാക്കുന്നു. നിയമസംവിധാനങ്ങൾ നോക്കുകുത്തിയാകുമ്പോൾ സ്വന്തം രാജ്യത്ത് ഭയപ്പാടോടെയല്ലാതെ സ്ത്രീകൾക്കെങ്ങനെ നേരം വെളുപ്പിക്കാൻ സാധിക്കും? 

∙ അതിക്രൂരം, അസഹനീയം!

രാജ്യത്തെ നടുക്കിയ ഡൽഹിയിലെ നിർഭയ കേസിലെ പെൺകുട്ടി നേരിട്ടതിനു സമാനമായ ക്രൂരപീഡനമാണ് കൊൽക്കത്തയിലെ യുവ ഡോക്റും നേരിട്ടത്. പ്രതിസ്ഥാനത്തുള്ള പൊലീസ് സിവിക് വൊളന്റിയർ സഞ്ജയ് റോയ് വൈകൃതമായ ലൈംഗികാസക്തിയുള്ളയാളാണെന്നു വെളിപ്പെടുംവിധത്തിലാണ് യുവതിയുടെ പോസ്റ്റ്മോർട്ടം റിപ്പോർട്ട് പുറത്തുവന്നത്. പീഡനശ്രമം ചെറുത്തപ്പോൾ മൂക്കും വായും ശക്തമായി പൊത്തിപ്പിടിക്കുകയും തല ഭിത്തിയിൽ ഇടിക്കുകയും ചെയ്തു. യുവതിയുടെ സ്വകാര്യഭാഗങ്ങളിൽ ആഴത്തിൽ മുറിവേറ്റ് രക്തസ്രാവമുണ്ടായി. കണ്ണട പൊട്ടി ചില്ല് തുളച്ചുകയറി കണ്ണിൽ നിന്നും രക്തം വാർന്നൊഴുകി. ഇടുപ്പെല്ല് തകർന്നു. കഴുത്തിൽ കടിയേറ്റ പാടുകൾ, മുഖത്തും മറ്റു ശരീരഭാഗങ്ങളിലും മുറിവുകൾ, കഴുത്ത് ഞെരിച്ചു ശ്വാസം മുട്ടിച്ചു കൊല്ലുന്നതിനിടെ തൈറോയ്ഡ് അസ്ഥി തകർന്നു. ഒടുവിലവൾ മരണത്തിനു കീഴടങ്ങി.

∙ രാജ്യം തലകുനിച്ച ‘കറുത്ത വാവുകൾ’

∙ ഡൽഹി കേസ്: 2012 ഡിസംബറിലാണ് രാജ്യത്തെ നടുക്കിയ ഡൽഹി പീഡനം നടന്നത്. സുഹൃത്തിനൊപ്പം യാത്ര ചെയ്യുകയായിരുന്ന 23കാരിയെ നഗരമധ്യത്തിൽ ഓടിക്കൊണ്ടിരുന്ന ബസിൽ വച്ച് ആറംഗ സംഘം അതിക്രൂര പീഡനത്തിന് ഇരയാക്കി. പ്രതിരോധിക്കാൻ ശ്രമിച്ച സുഹൃത്തിനെ തല്ലിച്ചതച്ച് റോഡിലേക്കു വലിച്ചെറിഞ്ഞു. പിറ്റേന്ന് രാജ്യമുണർന്നത് യുവതി നേരിട്ട നരകാനുഭവത്തെപ്പറ്റി കേട്ടുകൊണ്ടാണ്. ജീവച്ഛവമായ അവൾ സിംഗപ്പൂരിൽ ചികിത്സയിൽ കഴിയവെ മരണത്തിനു കീഴടങ്ങി. ജീവന്റെ അവസാന നൂലിഴയും അറ്റു പോകുമ്പോഴും, തന്നെ കടിച്ചുകീറിയവരെ വെറുതെ വിടരുതെന്നു പറഞ്ഞ അവളുടെ കണ്ണുകളിൽ പ്രതിഷേധത്തിന്റെ അണയാത്ത കനലുണ്ടായിരുന്നു.

അത് ഡൽഹിയുടെ തെരുവുകളിൽ അഗ്നിയായി ആളിക്കത്തി, രാജ്യമാകെ പടർന്നുപിടിച്ചു. യുവശബ്ദങ്ങൾ അവൾക്കു വേണ്ടി തെരുവിലിറങ്ങി. അവളുടെ ചുടുചോരയുടെ ചുവപ്പു പടർന്ന പാതകളിലിരുന്ന് അവർ നീതിക്കായി വാദിച്ചു. 8 വർഷത്തെ പോരാട്ടത്തിനൊടുവിൽ അവൾക്കു നീതി. സ്വകാര്യത മാനിച്ച്, മരണശയ്യയിലെ പോരാട്ട വീര്യം തിരിച്ചറിഞ്ഞ് രാജ്യം അവളെ വിളിച്ചു, ‘നിർഭയ’! കേസിലെ പ്രതികളിൽ ഒരാളെ പ്രായപൂർത്തിയായിട്ടില്ലെന്ന ഇളവിന്മേൽ വിട്ടയച്ചു. മറ്റൊരാളെ ജയിലിൽ തൂങ്ങി മരിച്ച നിലയിൽ കണ്ടെത്തി. ശേഷിച്ച നാല് പേരെ 2020 മാർച്ച 20ന് തൂക്കിലേറ്റി.

∙ ഉന്നാവ് കേസ്: 2014ൽ ഉത്തര്‍പ്രദേശിലെ ഉന്നാവില്‍ പതിനേഴുകാരി ബലാല്‍സംഗം ചെയ്യപ്പെട്ടു. 2019ല്‍ ബിജെപി നേതാവ് കുല്‍ദീപ് സിങ് സെംഗാറിനെ കുറ്റക്കാരനെന്ന് കണ്ടെത്തുകയും ജീവപര്യന്തം തടവിനു ശിക്ഷിക്കുകയും ചെയ്തു. പെണ്‍കുട്ടിയുടെ അച്ഛന്‍ പൊലീസ് കസ്റ്റഡിയിലിരിക്കെ മരിച്ചതിലും കുല്‍ദീപ് സെംഗാറിന് പങ്കുണ്ടെന്ന് കോടതി കണ്ടെത്തി. 2019ല്‍ അതിജീവിതയും ബന്ധുക്കളും സഞ്ചരിച്ച വാഹനത്തില്‍ ട്രക്കിടിപ്പിച്ചും അപകടമുണ്ടാക്കി. രണ്ട് ബന്ധുക്കള്‍ മരിച്ചു. ഗുരുതരമായി പരുക്കേറ്റെങ്കിലും പെണ്‍കുട്ടി രക്ഷപ്പെട്ടു.

∙ കത്‌വ കേസ്: 2018ൽ ജമ്മു കശ്മീരിലെ കത്‌വയില്‍ നാടോടി കുടുംബത്തില്‍പ്പെട്ട എട്ടുവയസ്സുകാരിയെ തട്ടിക്കൊണ്ടുപോയി ബലാല്‍സംഗം ചെയ്തു കൊലപ്പെടുത്തി. എട്ട് പ്രതികളില്‍ മൂന്നുപേര്‍ക്ക് വിചാരണക്കോടതി ജീവപര്യന്തം തടവു വിധിച്ചു. പൂജാരിയായിരുന്ന സാഞ്ജിറാം ആണ് മുഖ്യപ്രതി. പൊലീസുകാരായ മൂന്നു പ്രതികളെ തെളിവു നശിപ്പിച്ചതിന് അഞ്ചുവര്‍ഷം വീതം തടവിനു ശിക്ഷിച്ചു. പ്രതികളില്‍ ഒരാളെ തെളിവില്ലാത്തതിനാല്‍ വെറുതെവിട്ടു. പ്രായപൂര്‍ത്തിയാകാത്ത പ്രതിയെ ജുവനൈല്‍ കോടതിക്ക് കൈമാറിയെങ്കിലും സുപ്രീംകോടതി ഇയാളെ പ്രായപൂര്‍ത്തിയായ ആളായിത്തന്നെ വിചാരണ ചെയ്യണമെന്ന് ഉത്തരവിട്ടു.

∙ ഹൈദരാബാദ് കേസ്: 2019ൽ, വെറ്ററിനറി ഡോക്ടറായ യുവതിയെ തട്ടിക്കൊണ്ടുപോയി പീഡിപ്പിച്ചശേഷം തീവച്ചുകൊന്ന കേസിൽ ലോറി ഡ്രൈവർ മുഹമ്മദ് ആരിഫ്, ക്ലീനിങ് തൊഴിലാളികളായ ജൊല്ലു ശിവ, ജൊല്ലു നവീൻ, ചന്നകേശവലു എന്നിങ്ങനെ 4 പേരാണു പിടിയിലായത്. യുവ ഡോക്ടറുടെ കത്തിക്കരിഞ്ഞ മൃതദേഹം ഹൈദരാബാദ് – ബെംഗളൂരു ദേശീയപാതയിലെ കലുങ്കിനടിയിൽ നിന്നു കണ്ടെടുക്കുകയായിരുന്നു. തൊട്ടടുത്ത ദിവസം പ്രതികൾ അറസ്റ്റിലായി. ഇരുചക്ര വാഹനം കേടായതിനെത്തുടർന്നു രാത്രി വഴിയിൽ ഒറ്റപ്പെട്ടുപോയ യുവതിയെ സഹായിക്കാൻ എന്ന വ്യാജേന അടുത്തുകൂടിയ പ്രതികൾ തട്ടിക്കൊണ്ടുപോയി പീഡിപ്പിച്ച ശേഷം തീവയ്ക്കുകയിരുന്നു. തെളിവെടുപ്പിനു കൊണ്ടുവന്ന പ്രതികൾ പൊലീസുമായി ഏറ്റുമുട്ടിയതോടെ 4 പേരെയും വെടിവച്ചു കൊന്നു. പ്രതികൾ യുവ ഡോക്ടറെ കത്തിച്ച സ്ഥലത്തിന് 100 മീറ്റർ അപ്പുറത്താണു പ്രതികളെയും പൊലീസ് വെടിവച്ചു കൊന്നത്.‌ ഇത് വ്യാജ ഏറ്റുമുട്ടലാണെന്നു പിന്നീട് തെളിഞ്ഞിരുന്നു.