Duke 250
ബജാജ് ഓട്ടോ ലിമിറ്റഡിന്റെ ഉടമസ്ഥതയിലുള്ള ഓസ്ട്രിയൻ ബൈക്ക് നിർമാതാക്കളായ കെ ടി എം ആന്റി ലോക്ക് ബ്രേക്ക് സംവിധാന(എ ബി എസ്)ത്തോടെ ഡ്യൂക്ക് 250 അവതരിപ്പിക്കാൻ ഒരുങ്ങുന്നു. മിക്കവാറും അടുത്ത മാസത്തോടെ കെ ടി എം 250 ഡ്യൂക്ക് എ ബി എസ് വിൽപ്പനയ്ക്കെത്തുമെന്നാണു സൂചന. ഇതുവരെ ഡ്യൂക്ക് 125, ഡ്യൂക്ക് 200 മോഡലുകളിൽ കെ ടി എം ആന്റി ലോക്ക് ബ്രേക്ക് ഘടിപ്പിച്ചിരുന്നു. എന്നാൽ ഈ ബൈക്കുകളിലെ സിംഗിൾ ചാനൽ എ ബി എസിനു പകരം ‘ഡ്യൂക്ക് 390’ പോലെ ഇരട്ട ചാനൽ എ ബി എസാണത്രെ കെ ടി എം ‘ഡ്യൂക്ക് 250’ ബൈക്കിനായി പരിഗണിക്കുക.
മാത്രമല്ല 250 ഡ്യൂക്കിനു പുറമെ കെ ടി എം ആർ സി 200 ബൈക്കും കമ്പനി അടുത്ത മാസത്തോടെ പരിഷ്കരിക്കുന്നുണ്ട്. ഈ മോഡലിൽ പക്ഷേ സിംഗിൾ ചാനൽ എ ബി എസാവും ലഭ്യമാക്കുക. ഡ്യുവൽ ചാനൽ എ ബി എസ് എത്തുന്നതോടെ ‘250 ഡ്യൂക്കി’ന്റെ വിലയിൽ 10,000 — 13,000 രൂപയുടെ വർധനവാണു പ്രതീക്ഷിക്കുന്നത്. എ ബി എസില്ലാത്ത ‘കെ ടി എം 250 ഡ്യൂക്കി’നു നിലവിൽ 1.81 ലക്ഷം രൂപയാണു ഡൽഹി ഷോറൂമിലെ വില. എ ബി എസിന്റെ വരവിനപ്പുറമുള്ള മാറ്റമൊന്നും ‘250 ഡ്യൂക്കി’ൽ പ്രതീക്ഷിക്കേണ്ടതില്ല.
ബൈക്കിനു കരുത്തേകുന്നത് 249 സി സി, ലിക്വിഡ് കൂൾഡ്, സിംഗിൾ സിലിണ്ടർ എൻജിനാണ്; 30 പി എസ് വരെ കരുത്തും 24 എൻ എം ടോർക്കുമാണ് ഈ എൻജിൻ സൃഷ്ടിക്കുക. സ്ലിപ്പർ ക്ലച്ച് സഹിതമെത്തുന്ന ബൈക്കിന്റെ ട്രാൻസ്മിഷൻ ആറു സ്പീഡ് ഗീയർബോക്സാണ്. ട്രെല്ലിസ് ഫ്രെയിമുള്ള ബൈക്കിന്റെ മുൻ സസ്പെൻഷൻ അപ്സൈഡ് ഡൗൺ ഫോർക്കാണ്; പിന്നിൽ മോണോഷോക്കും. മുൻപിൻ ഡിസ്ക് ബ്രേക്കുകളോടെ എത്തുന്ന 250 ഡ്യൂക്കിന് ഇന്ത്യയിൽ നേരിട്ടുള്ള മത്സരമില്ല; വില അടിസ്ഥാനമാക്കിയാൽ ഹോണ്ട ‘സി ബി ആർ 250 എ ബി എസ്’, എൻഫീൽഡ് തണ്ടർബേഡ് 350 എക്സ് തുടങ്ങിയവയോടാണു 250 ഡ്യൂക്കിന്റെ മത്സരം.
