ആ കാശ് രാമസിംഹൻ അടിച്ചുമാറ്റിയതല്ല; പണം പിരിച്ച് പടം ചെയ്ത കഥ; നിർമാണം: നാട്ടുകാർ

∙ ജനങ്ങൾക്കുവേണ്ടി ജനങ്ങളാൽ...

ജനങ്ങൾക്കുവേണ്ടി ജനങ്ങളാൽ നിർമിക്കപ്പെടുന്ന സിനിമ. അതായിരുന്നു ജോണിന്റെ മനസ്സിൽ. അതിനു പണം കണ്ടെത്താൻ ജോണിന്റെ സുഹൃത്തുക്കൾ കൈകോർത്തു. ഒഡേസ കലക്ടീവ് എന്ന കൂട്ടായ്മയാണ് ‘അമ്മ അറിയാൻ’ എന്ന സിനിമയ്ക്കു പിന്നിൽ. അവർ ഗ്രാമങ്ങളിലൂടെ സഞ്ചരിച്ചു. വീടുകളിൽ കയറിയിറങ്ങി. പാട്ടുപാടി. സ്കിറ്റുകൾ അവതരിപ്പിച്ചു. തെരുവുനാടകങ്ങൾ അവതരിപ്പിച്ചു. സിനിമ നിർമിക്കാൻ പണം തരണേയെന്ന് ആവശ്യപ്പെട്ടു. ചിലർ അഞ്ചുരൂപയും പത്തുരൂപയുമൊക്കെ നൽകി. അങ്ങനെയങ്ങനെ ‘അമ്മ അറിയാൻ’ സംഭവിച്ചു. പരമ്പരാഗത ചലച്ചിത്ര നിർമാണ രീതിയെ തിരുത്തിയെഴുതുകയാണ് അന്ന് ക്രൗഡ് ഫണ്ടിങ്ങിലൂടെ ജോൺ ഏബ്രഹാം ചെയ്തത്.

ഈ സിനിമയിലെ നായക കഥാപാത്രമായ ‘പുരുഷനാ’യെത്തിയത് ഇന്നത്തെ പ്രമുഖതാരമായ ജോയ് മാത്യുവാണ്. ഇപ്പോൾ ക്രൗഡ് ഫണ്ടിങ്ങിലൂടെ അലി അക്ബർ നിർമിച്ച പുഴ മുതൽ പുഴ വരെ എന്ന സിനിമയിലും ജോയ് മാത്യുവുണ്ട്. നാട്ടുകാരിൽനിന്ന് പണം പിരിച്ചുണ്ടാക്കിയതുകൊണ്ട് ‘അമ്മ അറിയാൻ’ ഒരു തട്ടിക്കൂട്ട് സിനിമയാണെന്നു കരുതരുത്. ബ്രിട്ടിഷ് ഫിലിം ഇൻസ്റ്റിറ്റ്യൂട്ടിന്റെ പത്തു മികച്ച ഇന്ത്യൻ സിനിമകളിൽ ഉൾപ്പെട്ട ഒരേയൊരു ദക്ഷിണേന്ത്യൻ സിനിമയാണിത്.

∙ പാലിൽ ചാലിച്ച സിനിമ

1976ൽ ശ്യാംബെനഗൽ നിർമിച്ച ‘മൻഥൻ’ എന്ന സിനിമ ക്രൗഡ് ഫണ്ടിങ്ങിന്റെ ലോകോത്തര മാതൃകയാണ്. ധവളവിപ്ലവം സൃഷ്ടിച്ച ഡോ.വർഗീസ് കുര്യനായിരുന്നു ശ്യാംബെനഗലിന്റെ ശക്തി. ഗുജറാത്തിലെ അഞ്ചു ലക്ഷം ക്ഷീര കർഷകരിൽനിന്ന് രണ്ടുരൂപ വീതം പിരിവെടുത്താണ് മൻഥൻ നിർമിക്കാനുള്ള പണം കണ്ടെത്തിയത്. ഹിന്ദിയിലും ബംഗാളിയിലും ഒട്ടനേകം സിനിമകൾ ക്രൗഡ് ഫണ്ടിങ്ങിലൂടെ നിർമിക്കപ്പെട്ടെങ്കിലും മലയാളത്തിൽ ഈ ഒരു രീതി അത്ര ജനപ്രിയമായിരുന്നില്ല. എങ്കിലും ഏതാനും സിനിമകൾ പിൽക്കാലത്ത് കേരളത്തിലും ക്രൗഡ് ഫണ്ടിങ്ങിലൂടെ സംഭവിച്ചിട്ടുണ്ട്.

∙ ഗ്രാമം, ജനത, സിനിമ

പെരിങ്ങോട് എന്ന ഗ്രാമം ഒറ്റക്കെട്ടായി നല്ല സിനിമയ്ക്കായി കൈകോർത്ത കഥയാണ് സുദേവൻ എന്ന സംവിധായകൻ മലയാളികളോട് പറഞ്ഞത്. തന്റെ ഗ്രാമത്തിലെ ജനങ്ങളെ ഒരുമിപ്പിച്ച് സുദേവൻ ആദ്യം ഷോർട് ഫിലിമുകളാണ് എടുത്തത്, തട്ടിൻപുറത്തപ്പൻ പോലുള്ള ചെറുസിനിമകൾ അക്കാലത്ത് അനേകം പുരസ്കാരങ്ങൾ വാങ്ങിക്കൂട്ടി. അങ്ങനെയാണ് വലിയ സിനിമയിലേക്ക് സുദേവനും നാട്ടുകാരും തിരിഞ്ഞത്. ‘ക്രൈം നമ്പർ 89’ എന്നൊരു ചെറുസിനിമ അവർ നിർമിച്ചത് ഏഴു ലക്ഷത്തോളും രൂപ ചെലവഴിച്ചാണ്. കോടികൾ ചെലവഴിച്ചു മലയാള സിനിമ കോടികൾ വാരുന്ന സമീപകാലത്താണ് ഇതേ സിനിമയും വന്നത്. ആ വർഷം മലയാളത്തിലെ ഏറ്റവും മികച്ച സിനിമയ്ക്കുള്ള സംസ്ഥാന സർക്കാരിന്റെ പുരസ്കാരം ക്രൈം നമ്പർ 89ലൂടെ സുദേവനും നാട്ടുകാരും തങ്ങളുടെ ഗ്രാമത്തിലേക്ക് കൊണ്ടുപോയി.

സുദേവന്റെ ചിത്രത്തിൽ ഛായാഗ്രാഹകനായിരുന്ന പ്രതാപ് ജോസഫ് സംവിധാനം ചെയ്ത ‘ഒരു രാത്രി ഒരു പകൽ’ അടക്കമുള്ള സിനിമകളും ക്രൗഡ് ഫണ്ടിങ്ങിലൂടെയാണ് പണം കണ്ടെത്തിയത്. ഡോൺ പാലത്തറയുടെ ‘വിത്ത്’ എന്ന സിനിമയും ജനങ്ങളിൽനിന്ന് പണം പിരിച്ചാണ് നിർമിച്ചത്. ഇതിനായി ഒരു ക്രൗഡ് ഫണ്ടിങ് വെബ്സൈറ്റിന്റെ സഹായവും തേടിയിരുന്നു. സംവിധായകൻ ഷാജൂൺ കാര്യാലിന്റെ നേതൃത്വത്തിലുള്ള ഫസ്റ്റ് ക്ലാപ് എന്ന കൂട്ടായ്മയ്ക്കും ക്രൗഡ് ഫണ്ടിങ്ങിലൂടെ സിനിമ നിർമിക്കാനുള്ള മാജിക്ക് അറിയാം. ജനങ്ങളിൽനിന്നു പണം പിരിച്ചാണ് അവർ ‘പുള്ള്’ എന്ന സിനിമ നിർമിച്ചത്. ജനങ്ങളിൽനിന്ന് അവർ പിരിച്ചത് നൂറും അഞ്ഞൂറുമൊക്കെ രൂപ വീതമാണ്. തെയ്യത്തിന്റെ പശ്ചാത്തലത്തിൽ കഥ പറഞ്ഞ പുള്ള് ഷിംല രാജ്യാന്തര ഫെസ്റ്റിവലിൽ പുരസ്കാരം നേടി. പുള്ളിൽ തെയ്യത്തിന്റെ വേഷമിട്ട കെ.സി പീതാംബരന് ഫോക്‌ലോർ അക്കാദമി പുരസ്കാരവും കിട്ടി. ഇതുപോലെ കലാമൂല്യമുള്ള ഒരുപിടി സിനിമകൾ മലയാളത്തിൽ ക്രൗഡ് ഫണ്ടിങ്ങിലൂടെ പുറത്തുവന്നിട്ടുണ്ട്.്

∙ വീണ്ടും ക്രൗഡ് ഫണ്ടിങ്

മലബാർ കലാപചരിത്രം പറയുന്ന സിനിമ പ്രഖ്യാപിച്ചതു മുതൽ വിവാദത്തിലായ സംവിധായകനാണ് അലി അക്ബർ. സംഘപരിവാർ അനുകൂല സിനിമയായിരിക്കുമെന്ന ധാരണയുള്ളതിനാൽ സമൂഹമാധ്യമങ്ങളിൽ കടുത്ത സൈബർ ആക്രമണത്തിനാണ് അലി അക്ബർ വിധേയനായത്. ജനങ്ങളിൽനിന്ന് ബാങ്ക് അക്കൗണ്ട് വഴി നൂറും ഇരുനൂറുമൊക്കെ സ്വരൂപിച്ചാണ് അലി അക്ബർ ഒന്നരക്കോടിയോളം രൂപ ഉണ്ടാക്കിയത്. അദ്ദേഹം ഈ പണം അടിച്ചുമാറ്റിയെന്നുവരെ ആരോപണം നേരിടേണ്ടിവന്നു. രണ്ടരക്കോടിയോളം രൂപ പലരിൽനിന്നായി സ്വരൂപിച്ചാണ് താൻ സിനിമ പൂർത്തിയാക്കിയതെന്ന് അലി അക്ബർ പറയുന്നു. മലയാളത്തിൽ ഏറ്റവുമൊടുവിൽ പുറത്തുവരുന്ന ക്രൗഡ് ഫണ്ടഡ് സിനിമയാണ് ‘പുഴ മുതൽ പുഴ വരെ’. പക്ഷേ മലയാളത്തിലെ അവസാനത്തെ ക്രൗഡ് ഫണ്ടഡ് സിനിമയല്ല ഇത്. 

കേന്ദ്രസർക്കാർ ന്യൂനപക്ഷ സ്കോളർഷിപ്പുകളും ആനുകൂല്യങ്ങളും നിഷേധിച്ചതു സംബന്ധിച്ച് കൊടുങ്ങല്ലൂരിൽ ഒരു സിനിമ ഒരുങ്ങുന്നുണ്ട്. ഈ സിനിമയും ക്രൗഡ് ഫണ്ടിങ്ങിലൂടെയാണ്. ഇനിയുമനേകം സിനിമകൾ ക്രൗഡ് ഫണ്ടിങ്ങിലൂടെ പുറത്തിറങ്ങും. കലാകാരന്റെ ആത്മാഭിമാനം പണയം വയ്ക്കാത്ത സിനിമകൾ. ജനങ്ങൾക്കുവേണ്ടി ജനങ്ങളാൽ നിർമിക്കപ്പെടുന്ന സിനിമകൾ. ജനങ്ങൾക്കുവേണ്ടി സുതാര്യമായി സിനിമ നിർമിക്കുകയെന്ന കാഴ്ചപ്പാടാണ് ഓരോ ക്രൗഡ് ഫണ്ടഡ് സിനിമയ്ക്കുപിന്നിലുമുള്ളത്. ഇവിടെ വൻകിട നിർമാണക്കമ്പനികളുടെ വാണിജ്യ താൽപര്യം സിനിമയിൽ അടിച്ചേൽപ്പിക്കപ്പെടുകയില്ല. കഥയും കലയും ഇവിടെ സമൂഹമാണ് ഓഡിറ്റു ചെയ്യുന്നത്. ഈ പ്രക്രിയയെ അല്ലേ ജനാധിപത്യം എന്നു വിശേഷിപ്പിക്കുന്നത്? 

∙ ഒരു കൈ നോക്കിയാലോ?

സിനിമ സ്വപ്നം കാണുന്ന ഒരായിരം യുവാക്കൾ കേരളത്തിലുണ്ട്. അവരുടെ കയ്യിൽ കഥയുണ്ട്. അവരുടെ കയ്യിൽ കഴിവുണ്ട്. എന്തുകൊണ്ട് അവർക്ക് കൈകോർത്തുകൂടാ? എന്തുകൊണ്ട് അവർക്ക് നാട്ടുകാരോട് സംവദിച്ചുകൂടാ? അവർ ഒരുമിച്ച് കൈനീട്ടിയാൽ പണം വരും. ഓരോ യുവാവും തന്റെ സ്വപ്നം യാഥാർഥ്യമാക്കും. കേരളത്തിൽത്തന്നെയുണ്ടല്ലോ അതിന്റെ മികച്ച മുൻകാല മാതൃകകൾ. അപ്പോഴെങ്ങനെയാ? ഒരു കൈ നോക്കിയാലോ?

English Summary: Crowd-Funded Malayalam Movies Soon to be a Trend in Kerala?